قوي جىلى باستالعالى ەلىمىزدىڭ ورتالىق جانە جەرگىلىكتى اتقارۋشى ورگاندارىندا تاعايىنداۋلار از بولعانمەن، سپورت سالاسىندا جانە سوت جۇيەسىندە ايتارلىقتاي كادرلىق ءاۋىس-تۇيىس ورىن الدى.

سونىمەن، بۇدان بۇرىن حابارلاعانىمىزداي، وتكەن اپتادا ق ر دەنساۋلىق ساقتاۋ جانە الەۋمەتتىك دامۋ مينيسترلىگىندە ۆەدومستۆو باسشىسىنىڭ جاڭا ورىنباسارى تاعايىندالدى. بۇل تۋرالى قازاقپارات تىلشىسىنە مينيسترلىكتىڭ باسپا ءسوز قىزمەتى ءمالىم ەتكەن بولاتىن.

بۇل قىزمەتتە سەرىكبول ءمۋسينوۆتى الەكسەي سوي الماستىردى.

الەكسەي ۆلاديميروۆيچ سوي بۇنىڭ الدىندا 3 جىل بويى «استانا قالالىق №1 اۋرۋحاناسىنىڭ» باس دارىگەرى قىزمەتىن اتقارعان بولاتىن.

ال سەرىكبول مۋسينوۆ دەنساۋلىق ساقتاۋ جانە الەۋمەتتىك دامۋ ۆيسە-مينيسترى قىزمەتىنەن بوساتىلدى.

اقمولا وبلىسىنىڭ كىمى سەرگەي كۋلاگيننىڭ وكىمىمەن جانە قالالىق ءماسليحات دەپۋتاتتارى كەلىسىمىنىڭ نەگىزىندە ەرمەك بورانباي ۇلى مارجىقپايەۆ كوكشەتاۋ قالاسىنىڭ اكىمى بولىپ تاعايىندالدى.

ەرمەك بورانباي ۇلى 1969 جىلى تۋعان، ءۇش جوعارى ءبىلىمى بار، 1994 جىلى س.سەيفۋللين اتىنداعى اقمولا مەملەكەتتىك پەداگوگيكالىق ينستيتۋتىن تاريح ءپانى ءمۇعالىمى ماماندىعى بويىنشا، 2001 جىلى «تۇران» ۋنيۆەرسيتەتىن زاڭگەر ماماندىعى بويىنشا، 2009 جىلى كوكشەتاۋ ۋنيۆەرسيتەتىن قارجى باكلاۆرى ماماندىعى بويىنشا اياقتاعان.

ەڭبەك جولىن 1991 جىلى استانا قالاسىنىڭ №29 ورتا مەكتەبىنىڭ دەنە شىنىقتىرۋ ءپانىنىڭ ءمۇعالىمى، بوكس باپكەرى بولىپ باستادى. 1993 جىلعى قاڭتاردان باستاپ 1994 جىلعى قاراشا ارالىعىندا ششۋچە اۋدانى بۋراباي كەنتىنىڭ №7 ورتا مەكتەبىندە تاريح ءپانىنىڭ ءمۇعالىمى بولىپ جۇمىس جاسادى. 1994 جىلعى قاراشا مەن 1995 جىلعى ماۋسىم ارالىعىندا ششۋچە قالاسى «شوناي» شاعىن كاسىپورىنىنىڭ ديرەكتورى قىزمەتىندە بولدى. 1995 جىلعى ماۋسىمنان باستاپ «بەرەكە-بۋراباي» ج ش س باس ديرەكتورى قىزمەتىن اتقاردى.

2008 جىلعى تامىزدان باستاپ ارشالى اۋدانىنىڭ اكىمى لاۋازىمىن، 2012 جىلعى ساۋىردەن باستاپ 2013 جىلعى قىركۇيەك ارالىعىندا زەرەندى اۋدانىنىڭ اكىمى لاۋازىمىن اتقاردى. كەيىن 2014 جىلعى ماۋسىمعا دەيىن اقمولا وبلىسى اكىمىنىڭ ورىنباسارى قىزمەتىندە بولدى.

سوڭعى قىزمەت ورنى 2014 جىلدىڭ ماۋسىم ايىنان باستاپ قازاقستان رەسپۋبليكاسى پرەزيدەنتىنىڭ اكىمشىلىگى مەملەكەتتىك باقىلاۋ جانە اۋماقتىق-ۇيىمداستىرۋ ءبولىمىنىڭ مەملەكەتتىك ينسپەكتورى لاۋازىمىن اتقاردى.

اقمولا وبلىستىق ءماسليحاتىنىڭ دەپۋتاتى بولىپ سايلانعان. «قۇرمەت» وردەنىمەن، مەرەيتويلىق مەدالدارمەن ناگرادتالعان.

قالا اكتيۆىنە جاڭا اكىمدى تانىستىرا كەلىپ، ءوڭىر باسشىسى سەرگەي كۋلاگين وبلىس ورتالىعىنداعى الدىڭعى كەزەكتە شەشۋدى قاجەت ەتەتىن مىندەتتەرگە قىسقاشا توقتالىپ ءوتتى.

ەسكە سالا كەتسەك، قالانىڭ بۇرىنعى اكىمى جومارت نۇرعالييەۆ بار بولعانى 5 ايعا جۋىق قىزمەت ىستەپ، وتكەن جىلدىڭ 30 قازانىندا جۇرەك تالماسىنان قايتىس بولعان ەدى. سودان بەرى كوكشەتاۋ قالاسى اكىمىنىڭ مىندەتىن قالا اكىمىنىڭ ورىنباسارى امانگەلدى سمايىلوۆ اتقارىپ كەلدى.

ال قىزىلوردا قالاسىندا اكىمنىڭ جاڭا ورىنباسارى تاعايىندالدى. قىزىلوردا قالاسى اكىمىنىڭ وكىمىمەن قوسىم دۇيسەنالى ۇلى اڭساتبايەۆ قالا اكىمىنىڭ ورىنباسارى بولدى.

قوسىم دۇيسەنالى ۇلى 1981 جىلدىڭ 2 قاڭتارىندا تۇركىمەنستان رەسپۋبليكاسىندا دۇنيەگە كەلگەن. 1998-2002 جىلدارى استانا قالاسىنداعى قازاق مەملەكەتتىك زاڭ ۋنيۆەرسيتەتىن «زاڭگەر» جانە 2008-2010 جىلدارى قىزىلوردا قالاسىنداعى «بولاشاق» ۋنيۆەرسيتەتىن «قۇرىلىسشى» ماماندىقتارى بويىنشا بىتىرگەن.

ەڭبەك جولىن 2002 جىلى قىزىلوردا قازاق گۋمانيتارلىق-زاڭ ۋنيۆەرسيتەتىندە وقىتۋشى قىزمەتىنەن باستاعان. 2004-2005 جىلدارى قىزىلوردا وبلىسىنىڭ ساۋدا جانە مەملەكەتتىك ساتىپ الۋ باسقارماسىنىڭ جەتەكشى مامانى، باس مامانى؛

2005-2006 جىلدارى  قىزىلوردا وبلىسىنىڭ ساۋلەت، قالا قۇرىلىسى جانە قۇرىلىس دەپارتامەنتىنىڭ باس مامانى، ءبولىم باسشىسى؛

2006-2011 جىلدارى قىزىلوردا وبلىسىنىڭ مەملەكەتتىك ساۋلەت-قۇرىلىس باقىلاۋ باسقارماسىنىڭ ءبولىم باسشىسى، باسقارما باسشىسىنىڭ ورىنباسارى؛

 2011 جىلدان وسى ۋاقىتقا دەيىن قىزىلوردا وبلىسى بويىنشا مەملەكەتتىك ساۋلەت-قۇرىلىس باقىلاۋ جانە ليسەنزيالاۋ دەپارتامەنتى ديرەكتورىنىڭ ورىنباسارى، دەپارتامەنت باسشىسى قىزمەتتەرىن ابىرويمەن اتقارعان.

«نۇر وتان» پارتياسى رەسپۋبليكالىق قوعامدىق قابىلداۋىنىڭ جەتەكشىسى بولىپ ابىلايحان وسپانوۆ تاعايىندالدى. ابىلايحان وسپانوۆ ل.ن.گۋميليەۆ اتىنداعى ەۋرازيالىق ۇلتتىق ۋنيۆەرسيتەتىن «اقپاراتتاندىرۋ» ماماندىعى بويىنشا ءتامامداعان. 2006-2010 جىلدارى وڭتايلاندىرۋ جانە باسقارۋ جوباسى بويىنشا بولىمدەردەگى كوممەرسيالىق ۇيىمداردا جۇمىس ىستەدى. 2010-2014 جىلدارى ق ر ىشكى ىستەر مينيسترلىگىندە اعا ينجەنەر، ق ر بايلانىس جانە اقپارات مينيسترلىگىنىڭ اقپاراتتىق تەحنولوگيالار سالاسى مەملەكەتتىك ساياسات دەپارتامەنتى ديرەكتورىنىڭ ورىنباسارى، ق ر كولىك جانە كوممۋنيكاسيا مينيسترلىگىنىڭ مەملەكەتتىك قىزمەتتى اۆتوماتتاندىرۋ جانە حالىققا قىزمەت كورسەتۋ ورتالىقتارىنىڭ قىزمەتىن ۇيلەستىرۋ بويىنشا باقىلاۋ كوميتەتى ءتوراعاسىنىڭ ورىنباسارى، ەلەكتروندىق قىزمەت جانە بايلانىس پەن اقپارات بويىنشا، قازاقستان رەسپۋبليكاسى اگەنتتىگىنىڭ حقو دامىتۋ دەپارتامەنتىنىڭ ديرەكتورى قىزمەتتەرىن اتقاردى. بۇل قىزمەتكە تاعايىندالعانعا دەيىن ق ر ينۆەستيسيا جانە دامۋ مينيسترلىگىنىڭ بايلانىس، اقپاراتتاندىرۋ جانە اقپارات بويىنشا كوميتەتىنىڭ مەملەكەتتىك قىزمەت كورسەتۋدى وڭتايلاندىرۋ باسقارماسىنىڭ جەتەكشىسى قىزمەتىندە بولدى.

سۋديالار:

قوي جىلى باستالىسىمەن ەل وڭىرلەرىندە سوت ءتوراعالارى اۋىستىرىلا باستادى.ءبىرقاتار ايماقتاردا  قازاقستان رەسپۋبليكاسى پرەزيدەنتىنىڭ جارلىعىنا سايكەس جاڭادان تاعايىندالعان وبلىستىق جانە وعان تەڭەستىرىلگەن سوتتاردىڭ ءتوراعالارى مەن سۋديالارى تانىستىرىلدى.

ماسەلەن، الماتى قالالىق سوت جۇيەسىندە ءبىرقاتار تاعايىنداۋلار ورىن الدى.

قالالىق سوت ءتوراعاسى اقجان ەشتاي جاڭادان تاعايىندالعان اۋداندىق جانە وعان تەڭەستىرىلگەن سوت ءتوراعالارىن تانىستىردى.

الماتى مامانداندىرىلعان اۋدانارالىق ەكونوميكالىق سوتىنىڭ ءتوراعاسى لاۋازىمىنا بۇرىن استانا قالالىق سوتىنىڭ سۋدياسى بولىپ قىزمەت اتقارعان داۋلەن جۇما ۇلى بالىقوۆ تاعايىندالدى. بۇرىن مامانداندىرىلعان اۋدانارالىق ەكونوميكالىق سوتىنىڭ ءتوراعاسى قىزمەتىن اتقارعان جانات ساكىباي ۇلى بەكجانوۆ بوستاندىق اۋدانىنىڭ №2 اۋداندىق سوتىنىڭ ءتوراعاسى بولىپ تاعايىندالدى. بوستاندىق اۋدانىنىڭ №2 اۋداندىق سوتىنىڭ ءتوراعاسى قىزمەتىن اتقارىپ كەلگەن ارمان جۇماباي ۇلى شامشييەۆ قوستاناي وبلىستىق سوتىنىڭ قىلمىستىق ىستەر جونىندەگى اپەللياسيالىق سوت القاسىنىڭ ءتوراعاسى قىزمەتىنە اۋىستى. ولاردى تاعايىنداۋ جونىندەگى جارلىققا قازاقستان رەسپۋبليكاسىنىڭ پرەزيدەنتى 2014 جىلدىڭ 24 جەلتوقسانىندا قول قويدى.

5 قاڭتار كۇنى جامبىل، قوستاناي، شىعىس قازاقستان، باتىس قازاقستان وبلىستىق سوتتارىندا جانە الماتى قالالىق سوتىندا قازاقستان رەسپۋبليكاسى پرەزيدەنتىنىڭ 2014 جىلعى 24 جەلتوقسانداعى جارلىعىنا سايكەس جاڭادان تاعايىندالعان وبلىستىق جانە وعان تەڭەستىرىلگەن سوتتاردىڭ ءتوراعالارى مەن سۋديالارى تانىستىرىلدى، دەپ حابارلادى جوعارعى سوتتىڭ باسپا ءسوز قىزمەتىنەن.

الماتى قالاسى مامانداندىرىلعان اۋدانارالىق ەكونوميكالىق سوتىنىڭ ءتوراعاسى لاۋازىمىنا - داۋلەن بالىقوۆ، بوستاندىق اۋدانىنىڭ №2 اۋداندىق سوتىنىڭ ءتوراعاسى بولىپ، جانات بەكجانوۆ تاعايىندالدى.

باتىس قازاقستان وبلىستىق سوتىنىڭ سۋدياسى لاۋازىمىنا ورال قالالىق №2 سوتىنىڭ سۋدياسى قىزمەتىن اتقارعان داۋلەتقالييەۆا عاليا ماناربەك قىزى تاعايىندالدى.

قوستاناي وبلىسىنىڭ سوت قاۋىمداستىعىنا وبلىستىق سوتتىڭ قىلمىستىق ىستەر جونىندەگى اپەللياسيالىق سوت القاسىنىڭ جاڭا ءتوراعاسى شامشييەۆ ارمان تانىستىرىلدى.

جامبىل وبلىستىق سوتىنىڭ ءتوراعاسى م.بەكتۇرعانوۆ سوت ۇجىمىنا مامانداندىرىلعان اۋدانارالىق ەكونوميكالىق سوتىنىڭ ءتوراعاسى قىزمەتىنە تاعايىندالعان سەمبەك بايماحانوۆتى، قورداي اۋداندىق سوتىنىڭ ءتوراعاسى ساكەن تۇرعىنبايەۆتى، تاراز قالالىق №2 سوتىنىڭ سۋدياسى ەرنار جامانقۇلوۆتى رەسمي تۇردە تانىستىردى.

شىعىس قازاقستان وبلىستىق سوتىنىڭ ءتوراعاسى ا.راحمەتۋلين ۇجىمعا شەمونايحا اۋدانىنىڭ مامانداندىرىلعان اكىمشىلىك سوتىنىڭ ءتوراعاسى قىزمەتىنە تاعايىندالعان سارسەنبايەۆ ساناتتى، بەسقاراعاي اۋداندىق سوتىنىڭ ءتوراعاسى ءابدىراحمانوۆ ءارىپحاندى، شىعىس قازاقستان وبلىستىق سوتىنىڭ سۋدياسى قايىربايەۆا لاۋرانى تانىستىردى.

قىزىلوردا قالاسىنىڭ مامانداندىرىلعان اكىمشىلىك سوتىنىڭ ءتوراعاسى بولىپ مەيرامبەك يبراشيەۆتى تاعايىندالعان.

قاراعاندى وبلىسىنىڭ كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتىنىڭ ءتوراعاسى لاۋازىمىنا داۋرەن ءتۇسىپحان ۇلى سايحانوۆ تاعايىندالدى.

اقمولا وبلىستىق سوتىنىڭ ءتوراعاسى ن.ءابدىقانوۆ وبلىستىڭ سۋديالار قاۋىمداستىعىنا قىلمىستىق ىستەر جونىندەگى اپەللياسيالىق سوت القاسىنىڭ جاڭا ءتوراعاسىن جانە وبلىستىڭ جەرگىلىكتى سوتتارىنىڭ جاڭادان تاعايىندالعان ءتوراعالارىن تانىستىردى.

قازاقستان رەسپۋبليكاسى پرەزيدەنتىنىڭ 2014 جىلعى 24 جەلتوقسانداعى №983 جارلىعىنا سايكەس، اقمولا وبلىستىق سوتىنىڭ قىلمىستىق ىستەر جونىندەگى اپەللياسيالىق سوت القاسىنىڭ ءتوراعاسى قىزمەتىنە - بەردىعۇلوۆا جاننا، ساندىقتاۋ اۋداندىق سوتىنىڭ ءتوراعاسى قىزمەتىنە - ايمۇحامەدوۆ ازامات، بۋراباي اۋدانىنىڭ مامانداندىرىلعان اكىمشىلىك سوتىنىڭ ءتوراعاسى قىزمەتىنە - تەمىروۆ جانات، مامانداندىرىلعان اۋدانارالىق ەكونوميكالىق سوتىنىڭ ءتوراعاسى قىزمەتىنە - ىزتايەۆ ەرعالي جانە شورتاندى اۋداندىق سوتىنىڭ ءتوراعاسى قىزمەتىنە - بەيسەكەيەۆ قانات تاعايىندالدى.

سونداي-اق اقتوبە وبلىستىق سوتىندا وبلىستىق سوت سۋديالارىنىڭ جالپى وتىرىسىندا اتالعان جارلىققا سايكەس تاعايىندالعان سوت ءتوراعالارى مەن سۋديالار ۇجىمعا تانىستىرىلدى. جالپى وتىرىستا العا اۋداندىق سوتىنىڭ ءتوراعاسى لاۋازىمىنا - ءيسداۋىر مۇراتقانوۆ، اقتوبە قالاسىنىڭ مامانداندىرىلعان اكىمشىلىك سوتىنىڭ ءتوراعاسى لاۋازىمىنا - ەرعالي ەرنازاروۆ، وبلىستىق سوتتىڭ سۋدياسى لاۋازىمىنا - گۇلنار يبرايموۆا، اقتوبە قالاسىنىڭ №2 سوتىنىڭ سۋدياسى لاۋازىمىنا - ءاليا بەكتالييەۆا تانىستىرىلدى.

جامبىل وبلىسىندا جاڭادان ءبىرقاتار سوت باسشىلارى تاعايىندالدى، دەپ حابارلايدى وبلىستىق سوتتىڭ باسپا ءسوز قىزمەتىنەن.

اتاپ ايتقاندا، قازاقستان رەسپۋبليكاسى پرەزيدەنتىنىڭ 2014 جىلعى 24 جەلتوقسانداعى جارلىعىمەن جامبىل وبلىسى بويىنشا مامانداندىرىلعان اۋدانارالىق ەكونوميكالىق سوتىنىڭ ءتوراعاسى قىزمەتىنە بۇرىن قىزىلوردا وبلىستىق سوتىنىڭ سۋدياسى بولعان سەمبەك بايماحانوۆ پەن قورداي اۋداندىق سوتىنىڭ ءتوراعاسى قىزمەتىنە بۇرىن وڭتۇستىك قازاقستان وبلىسىنىڭ سايرام اۋداندىق سوتىنىڭ ءتوراعاسى بولعان ساكەن تۇرعىنبايەۆ تاعايىندالدى. ال قورداي اۋداندىق سوتىنىڭ ءتوراعاسى ەرنار جامانقۇلوۆ تاراز قالالىق №2 سوتىنىڭ سۋدياسى لاۋازىمىنا تاعايىندالدى.

باتىس قازاقستان وبلىستىق سوتىنىڭ سۋدياسى بولىپ ق ر پرەزيدەنتىنىڭ سايكەس جارلىعىمەن عاليا ماناربەك قىزى داۋلەتقالييەۆا تاعايىندالدى.

شىعىس قازاقستان وبلىستىق سوتىنىڭ ءتوراعاسى ا.راحمەتۋلين شەمونايحا اۋدانىنىڭ مامانداندىرىلعان اكىمشىلىك سوتىنىڭ جانە بەسقاراعاي اۋداندىق سوتىنىڭ جاڭا ءتوراعالارىن تانىستىردى.

قازاقستان رەسپۋبليكاسى پرەزيدەنتىنىڭ 2014 جىلدىڭ 24 جەلتوقسانىنداعى № 983 جارلىعىنا سايكەس، شەمونايحا اۋدانىنىڭ مامانداندىرىلعان اكىمشىلىك سوتىنىڭ ءتوراعاسى قىزمەتىنە - سارسەنبايەۆ سانات ءسلامجان ۇلى، بەسقاراعاي اۋداندىق سوتىنىڭ ءتوراعاسى قىزمەتىنە - ءابدىراحمانوۆ ءارىپحان ارىن ۇلى، شىعىس قازاقستان وبلىستىق سوتىنىڭ سۋدياسى لاۋازىمىنا - قايىربايەۆا لاۋرا ەركىن قىزى تاعايىندالدى.

سپورت:

بىرەر كۇن بۇرىن AIBA ۆيسە-پرەزيدەنتى، ازيا بوكس فەدەراسياسىنىڭ پرەزيدەنتى سەرىك قوناقبايەۆ الداعى ءتورت جىلعا سپورتشىلار مەن جاستاردىڭ ءىسى بويىنشا AIBA كوميسسياسىنىڭ ءتوراعاسى بولىپ تاعايىندالدى.

AIBA پرەزيدەنتى چينگ كۋو ۆۋو قوناقبايەۆتى وسى لاۋازىمعا تاعايىندالۋىمەن قۇتتىقتاپ، ونىڭ بۇل جاۋاپتى قىزمەتكە لايىقتى ەكەندىگىن اتاپ ءوتتى.

«ءسىزدىڭ بوكسشى رەتىندەگى ۇلكەن جەتىستىكتەرىڭىز، سونداي-اق بوكس سالاسىنداعى تەرەڭ ءبىلىمىڭىز بۇل مىندەتتى تابىستى ورىنداۋعا كومەكتەسەتىنى ءسوزسىز»، - دەپ قوسىپ ءوتتى چينگ كۋو ۆۋو.

ۇلكەن اۋىس-تۇيىستەردىڭ ءبىرى قاراعاندىنىڭ «شاحتەر» كلۋبىندا ورىن الدى. اتاپ ايتقاندا،  «شاحتەر» فك-نىڭ جاڭا ديرەكتورى تاعايىندالدى. بۇل قىزمەتتى جارىلعاپوۆ نۇرعازى عالىم ۇلى اتقاراتىن بولدى.

جارىلعاپوۆ نۇرعازى عالىم ۇلى 1963 جىلى تۋعان. بوكستان ق ر ەڭبەك سiڭiرگەن باپكەرى، ە.ا.بوكەتوۆ اتىنداعى ءقارمۋ-دىڭ قۇرمەتتى پروفەسسورى، ماماندىعى بويىنشا زاڭگەر، ەكونوميست، پەداگوگ. نۇرعازى جارىلعاپوۆ شقو، قوستاناي، قاراعاندى وبلىستارى بويىنشا كەدەن باسقارمالارىن باسقارعان، ق ر كەدەن كوميتەتى ءتوراعاسىنىڭ ورىنباسارى بولعان. قاراعاندى وبلىستىق تۋريزم، دەنە شىنىقتىرۋ جانە سپورت باسقارماسىنا جەتەكشىلىك ەتكەن.

قازىرگى ۋاقىتتا اتالمىش كلۋب ويىنشىلارىنىڭ نەگىزگى قۇرامى مەن جاتتىقتىرۋشىلار توبى تۇركياداعى وقۋ-جاتتىعۋ جيىندارىنا اتتاندى. حاليلين ەردەن بالتاباي ۇلى وزگە قىزمەتكە اۋىسۋىنا بايلانىستى بۇل ورىننان بوساتىلدى.

«اقتوبە» فك باس ديرەكتورىنىڭ مىندەتىن اتقارۋشى بولىپ عالىمبەك قۇرمانسەيىت تاعايىندالدى.

32 جاستاعى عالىمبەك قوجاعالي ۇلى قۇرمانسەيىت بەس جىلدان استام «اقتوبە» فك قۇرىلىمىندا جۇمىس ىستەۋدە. بۇرىن ول باس ديرەكتوردىڭ ورىنباسارى قىزمەتىن اتقارعان.  ەسكە سالا كەتەيىك، وسىعان دەيىن بۇل قىزمەتتە بيحامبەتوۆا ءشاريپا شايقامال قىزى بولعان.

اقتوبە قالاسىنىڭ اكىمى ەرحان وماروۆتىڭ بۇيرىعىمەن دەنە شىنىقتىرۋ جانە سپورت ءبولىمى باسشىسىنىڭ مىندەتىن اتقارۋشى بولىپ كىر تاسىن كوتەرۋ سپورتى بويىنشا 12 دۇركىن الەم چەمپيونى جانە 20 دۇركىن قازاقستان چەمپيونى، سپورت شەبەرى ەۆگەنيي گونچاروۆ تاعايىندالدى.

ەۆگەنيي گونچاروۆ ق. جۇبانوۆ اتىنداعى اقتوبە مەملەكەتتىك ۋنيۆەرسيتەتىن ءتامامداعان. وبلىستىق بالالار مەن جاسوسپىرىمدەر سپورت مەكتەبىندە ۆەلوسپورت بويىنشا جاتتىقتىرۋشى-وقىتۋشى، «كوكتاس-اقتوبە» اق فيتنەس-ورتالىعىنىڭ باسقارۋشىسى، «الاتاۋ كورپوراسياسى» ج ش س باس ديرەكتورىنىڭ ورىنباسارى، «استارتا-زاپاد» ج ش س ديرەكتورى بولىپ قىزمەت ەتكەن.

33 جاستاعى ەۆگەنيي گونچاروۆ ەلىمىزدىڭ، ازيا، ەۋروپا جانە الەمنىڭ ۇزدىك كىر تاسىن كوتەرۋشىلەرىنىڭ ءبىرى.

بۇل قىزمەتتە بولعان ىسكەندەربەك ماحانوۆ 2014 جىلدىڭ جەلتوقسانىندا وبلىس اكىمىنىڭ بۇيرىعىمەن اقتوبە وبلىستىق دەنە شىنىقتىرۋ جانە سپورت باسقارماسىنىڭ باسشىسى بولىپ تاعايىندالدى.

ايەلدەر كۇرەسىنەن ق ر ۇلتتىق قۇراماسىنىڭ جاتتىقتىرۋشىلىق قۇرامىندا وزگەرىس بولدى. اتالعان ق ر قۇراماسىنىڭ بۇرىنعى باس جاتتىقتىرۋشىسى گوزەل مانيۋروۆانىڭ ورنىنا بۇل قىزمەتكە جاستار قۇراماسىنىڭ تالىمگەرى قايرات ساعادييەۆ كەلدى.

گوزەل مانيۋروۆا ەلدىڭ باس كومانداسىن لوندون قالاسىنداعى وليمپيادادان كەيىن باسقاردى. ەستەرىڭىزگە سالا كەتەيىك، گ.مانيۋروۆا انگليا استاناسىنان قولا جۇلدەمەن ورالعان.

«قازىرگى ۋاقىتقا دەيىن اتاقتى سپورتشى جاتتىقتىرۋشىلىق قىزمەتىن رەسمي جارىستارمەن قاتار جۇرگىزدى. باس جاتتىقتىرۋشى بولىپ ەكى جارىم جىلداي ۋاقىت جۇمىس ىستەدى. گوزەل مانيۋروۆا ايەلدەردىڭ ۇلتتىق قۇراماسىندا جەتەكشى اتلەت جانە ەندى ريو-دە-جانەيرو قالاسىندا وتەتىن ءتورتجىلدىقتىڭ باستى جارىستارىنا تولىق دەڭگەيدە دايىندالۋعا بارىنشا نيەت قويا الادى»، - دەيدى ق ر گرەك-ريم، ەركىن كۇرەس جانە ايەلدەر كۇرەسى فەدەراسياسى.

«بۇل - القا شەشىمى. سپورتشى ءارى كوماندانىڭ باس جاتتىقتىرۋشىسى قىزمەتتەرىن بىرگە الىپ ءجۇرۋ، ارينە، وڭاي ەمەس. ءوز الدىما مىناداي ماقسات قويدىم - 2016 جىلى وتەتىن وليمپيادادا تابىستى شىعۋ. ەندى ماقساتتى دايىندالىپ، جانكۇيەرلەرىمىزدىڭ سەنىمىن اقتاۋعا تىرىسامىن. ءوز تاراپىمنان سول ءۇشىن قولدان كەلەتىننىڭ ءبارىن جاسايمىن. قايرات ساعادييەۆكە العا قويعان مىندەتتەرىنە قول جەتكىزۋدى جانە جاقسىلىقتىڭ بارلىعىن تىلەيمىن»، - دەپ اتاپ ءوتتى گوزەل مانيۋروۆا.

ۇلتتىق قۇرامانىڭ جاڭا باپكەرى قايرات ساعادييەۆتىڭ نازىك جاندىلارمەن جۇمىس جاساۋدا ءبىرشاما تاجىريبەسى بار.

«ول ق ر جاسوسپىرىمدەر مەن جاستار كوماندالارىنىڭ اعا جاتتىقتىرۋشىسى بولىپ، قاراماعىندا بولعان سپورتشىلارمەن بىرگە جاقسى ناتيجەلەرگە قول جەتكىزگەن: وتكەن جىلعى ازيا چەمپيوناتىندا ءبىزدىڭ جاستارىمىز بەس مەدالدى (ءبىر التىن، ءبىر كۇمىس، ءۇش قولا) قانجىعاسىنا بايلاپ، قورىتىندى بەيرەسمي ەسەپتە ەكىنشى ورىننان كورىنگەن. الەم چەمپيوناتىندا ساعادييەۆتىڭ قامقورلىعىنداعى سپورتشىلار ءبىر كۇمىس پەن ءبىر قولا مەدالدى جەڭىپ الدى»،دەلىنگەن حابارلامادا.

ق ر جاستار قۇراماسىنىڭ اعا جاتتىقتىرۋشىسى بولىپ ادىلەت ەرماكوۆتىڭ تاعايىندالعانىن اتاپ وتەيىك. وسىعان دەيىن ول جاسوسپىرىمدەر قۇراماسىندا بويجەتكەندەرمەن جۇمىس ىستەگەن. جاسوسپىرىمدەر كومانداسىن ەندى مۇرات جۇمابايەۆ باسقاردى. بۇعان دەيىن ول ۇزاق ۋاقىت بويى وقو ايەلدەر قۇراماسىنىڭ اعا جاتتىقتىرۋشىسى قىزمەتىن اتقارىپ كەلدى.

اۆتور: جاسۇلان جولدىبايەۆ، يا قازينفورم