وڭتۇستىك قازاقستان وبلىسى تولە بي اۋدانىندا تاۋەلسىزدىك كۇنى مەرەكەسىنە تارتۋ رەتىندە 5 قاباتتى 8 تۇرعىن ءۇي  پايدالانۋعا  تاپسىرىلدى دەپ جازادى inform.kz.  كوپ قاباتتى تۇرعىن ۇيدەگى  پاتەردىڭ كىلتى «نۇرلى جەر» باعدارلاماسى بويىنشا تولەبيلىك 480 وتباسىعا بەرىلدى. بۇل تۋرالى وڭىرلىك اكىمدىكتىڭ باسپا ءسوز قىزمەتى حابارلايدى. جاڭا قونىس تولە بي اۋدانى لەنگىر قالاسىنىڭ 1-مولتەك اۋدانىندا بوي كوتەرگەن. سالتاناتتى شاراعا وبلىس باسشىسى جانسەيىت تۇيمەبايەۆ، وبلىستىق ءماسليحات حاتشىسى قايرات بالابييەۆ، «نۇر وتان» پارتياسى وقو فيليالى ءتوراعاسىنىڭ ءبىرىنشى ورىنباسارى نۇرماحان جولداسوۆ  باستاعان حالىق قالاۋلىلارى قاتىستى.

تۇرعىنداردى ارنايى مەرەكەمەن قۇتتىقتاي كەلگەن وڭتۇستىك قازاقستان وبلىسىنىڭ اكىمى ج.تۇيمەبايەۆ پاتەر كىلتتەرىن جەتىم جانە اتا-اناسىنىڭ قامقورلىعىنسىز قالعان بالالارعا، اسكەري جانە بيۋدجەتتىك مەكەمە قىزمەتكەرلەرى مەن الەۋمەتتىك از قامتىلعان وتباسىلارعا سالتاناتتى تۇردە تابىس ەتتى. «ءبىزدىڭ باستى مىندەتىمىز - حالىقتىڭ الەۋمەتتىك جاعدايىن جاقسارتىپ، ساپالى قىزمەت كورسەتۋ. وبلىس، اۋدان ورتالىقتارىندا، ەلدى مەكەندەردە تۇرعىن ۇيلەر سالىنىپ جاتىر. سونىڭ ءبىر دالەلى - بۇگىن سىزدەردىڭ اۋداندارىڭىزداعى 8 كوپ قاباتتى تۇرعىن ءۇيدىڭ قۇرىلىسى اياقتالىپ، 480 وتباسى باسپانامەن قامتاماسىز ەتىلىپ، قۋانىشقا بولەنىپ وتىر. بۇل باعىتتاعى جۇمىستار بارلىق ەلدى مەكەندەردە ەلباسىمىزدىڭ «نۇرلى جەر» باعدارلاماسى اياسىندا جانە جەرگىلىكتى، وبلىستىق بيۋدجەت ەسەپتەرىنەن جالعاسىن تابا بەرمەك»، - دەدى اكىم.

تولە بي اۋدانى تۇرعىن ۇيلەردىڭ قۇرىلىسىنا 2016-2017 جىلدارى وبلىستىق بيۋدجەتتەن 2 ملرد. 735 ملن. 406 مىڭ 084 تەڭگە قارالىپ، بۇگىندە تولىعىمەن يگەرىلىپ وتىر. ناتيجەسىندە 29 264 شارشى مەتر تۇرعىن ءۇي ەل يگىلىگىنە بەرىلدى. قازىرگى تاڭدا كوممۋنالدىق تۇرعىن ءۇي كەزەگىندە اۋداندا جالپى 2961 ادام كەزەككە تىركەلگەن. ولاردىڭ ىشىندە 1676 ادام حالىقتىڭ الەۋمەتتىك جاعىنان ءالسىز توپتاعى، 345 ازامات جەتىم جانە اتا-انا قامقورلىعىنسىز قالعان بالالار تىزىمىندە بولسا، 940-ى مەملەكەتتىك پەن بيۋدجەتتىك قىزمەتكەرلەر تىزىمىندە تۇر.