الماتىدا شوب سۋبەكتىلەرى ءۇشىن ساۋدا الاڭدارىن قۇرۋ ماسەلەسى تالقىلاندى.
الماتىدا «قازىنا كاپيتال مەنەدجمەنت» كومپانياسىنىڭ ۇيىمداستىرۋىمەن شاعىن جانە ورتا بيزنەس سۋبەكتىلەرى ءۇشىن ساۋدا الاڭدارىن قۇرۋ ماسەلەسى تالقىلاندى.
جيىندا تىكەلەي ينۆەستيسيا قورلارىنىڭ قاتىسۋىمەن ورتا جانە شاعىن بيزنەس سۋبەكتىلەرى ساۋدا الاڭدارىن قۇرۋ مۇمكىندىگى قاراستىرىلۋدا. تالقىلاۋعا كاسىپكەرلەر، قازاقستان قور بيرجاسى (KASE) تىكەلەي ينۆەستيسيالار قورىن باسقاراتىن بروكەرلىك كومپانيالاردىڭ وكىلدەرى قاتىستى. «قازىنا كاپيتال مەنەدجمەنت» دوڭگەلەك ۇستەل بارىسىندا ينفراقۇرىلىمدى دامىتۋدىڭ 3 بالاما نۇسقاسى كورسەتىلگەن تالداۋمەن تانىستىردى.
«حالىقارالىق تاجىريبەنى ەسكەرە كەلە 3 تۇجىرىمداما شىعاردىق. بىرىنشىدەن، KASE بازاسىندا ارنايى ساۋدا الاڭىن قۇرۋ، ەكىنشىدەن، بيرجالىق ەمەس نارىق تاجىريبەسىن قولدانۋ، ۇشىنشىدەن، ارنايى پاي قورلارىن قولدانۋ تۇجىرىمدارىن ۇسىنامىز»، - دەدى CKIF ديرەكتورى داۋرەن وڭايەۆ.
مامان قازاقستانداعى شاعىن جانە ورتا بيزنەس فورمالارىنىڭ ەرەكشەلىگىن ەسكەرە كەلە KASE بازاسىنداعى ارنايى ساۋدا الاڭىنىڭ ەرەكشەلىگىن انىقتاپ كورسەتتى.
«KASE بازاسىندا جشس-لاردى بيرجا الاڭىنا شىعاراتىن مەحانيزمنىڭ ارنايى ينفراقۇرىلىمى قالىپتاسقان. بۇل ءبىزدىڭ نەگىزگى نۇسقامىز. مۇندا نارىق قاتىسۋشىلارىنىڭ اراسىنداعى قارىم-قاتىناس جاقسى قالىپتاسقان. بروكەرلىك كومپانيالار تۇگەل كورسەتىلگەن. سونىمەن قاتار، KASE بازاسىنداعى الاڭ اشىقتىق قاعيداتتارىنا تولىق جاۋاپ بەرە الاتىن ەدى. ءبىراق بۇل جاعداي رەگلامەنتتەۋدىڭ نورماتيۆتىك قۇجاتتارىن، بيرجا ەرەجەسىن، زاڭداردى وزگەرتۋگە تۋرا كەلەتىن ەدى. ال ەكىنشى نۇسقا وتس فورماتىنداعى بالاما - ەكىجاقتى تىكەلەي ساۋدانى بىلدىرەدى. ساتۋشى مەن ساتىپ الۋشى ءبىر-بىرىن ارنايى الاڭ ارقىلى تاۋىپ الادى. مۇنداي الاڭدى قۇرۋ اقپاراتتىق ينفراقۇرىلىمدى تالاپ ەتەرى ءسوزسىز. بۇل جاعدايدا كومپانيالار اۋديت، ەسەپ بەرۋگە دايىن بولۋى ءتيىس. ينۆەستورلار اقپاراتتى ارنايى الاڭ ارقىلى وزدەرى تاۋىپ الادى. ءۇشىنشى بالاما ۇسىنىس - پاي ينۆەستيسيالىق قورلار ارقىلى الاڭ اشۋ. باسقارۋشى كومپانيا بۇل جاعدايدا قاتىسۋشىلاردىڭ ۇلەسىن الاڭعا شىعارۋمەن اينالىساتىن بولادى. بۇل باسقارۋشى كومپانيا قورلارمەن دە بايلانىستا بولادى. بۇل بالاما بويىنشا دا زاڭدا شەكتەۋلەر كوپ»، - دەدى داۋرەن وڭايەۆ.
«قازىنا كاپيتال مەنەدجمەنت» باسقارما ءتوراعاسى اسقار دوستياروۆتىڭ ايتۋىنشا، تىكەلەي يۆنەستيسيا اعىمى قارجىلىق نارىقتىڭ دامۋىنا تىكەلەي بايلانىستى. قارجى نارىعىنىڭ كەيبىر بولشەكتەرىنىڭ جەتىسپەۋشىلىگى مىسالى شوب ءۇشىن ساۋدا الاڭى، ينۆەستيسيالىق قورلار ءۇشىن ەكىنشى دەڭگەيلى نارىق كوپتەگەن كومپانيالارعا private equity جۇيەسىنىڭ جولىن جابادى جانە حالىقارالىق ينۆەستورلاردى تارتۋعا كەدەرگى كەلتىرەدى.
«بۇل ماسەلە - قور نارىعى ارقىلى بالاما جولمەن شىعۋ ستراتەگياسى بىزدە نەگە جوق؟ وسى ماسەلە جازدا كوتەرىلگەن بولاتىن. حالىقارالىق تاجىريبەنى ەسكەرە كەلە private equity نارىعى قور نارىعىنىڭ دامۋىنا تىكەلەي بايلانىستى ەكەنىن تۇسىندىك. تىكەلەي ينۆەستيسيا قورلارى قور نارىعىنىڭ الاڭىن پايدالانا وتىرىپ، پوتەنسيالدى كليەنتتەرىن قالىپتاستىرا الاتىن ەدى. ءقازىر بۇعان قاجەتتىلىك تۋىپ وتىر. سوندىقتان، پورتفەلدىك كومپانيا وكىلدەرى، بيزنەس سالاسىنىڭ وكىلدەرىن، قور نارىعى سالاسىنان بيرجالىق كومپانيالاردى تارتىپ، بىرگە تالقىلاۋدى ءجون كوردىك. ياعني، كەلەسى جىلى تىكەلەي ينۆەستيسيا قورلارى قور نارىعى ارقىلى كىرە الاتىن ارنايى ينفراقۇرىلىم قۇرۋ مۇمكىندىگىن ىزدەيتىن بولامىز»، - دەدى ا.دوستياروۆ.
ءوز كەزەگىندە KASE وكىلدەرى بۇل مۇمكىندىكتى قاراستىرۋعا ءوز پىكىرلەرىن ءبىلدىردى.
«ءبىزدىڭ قوردا 4 الاڭ بار. ءبىز قۇندى قاعازدارمەن، دەريۆاتيۆتەرمەن جۇمىس جاسايمىز. سونداي-اق، ۆاليۋتا نارىعى بار. الايدا، تارتىمدى ەميتەنت تابۋ ءۇشىن ونى ءوسىرۋ كەرەك. سوندىقتان، ءبىز ستارتاپتان باستاپ IPO دەيىن دامىتۋ ستراتەگياسىن قولعا العانبىز. ەميتەنت نارىققا شىعىپ، ءوزىنىڭ ينۆەستور ىزدەيتىنىن جاريالاعان سوڭ كورپوراتيۆتىك باسقارۋ بويىنشا بارلىق تالاپتى ورىنداۋى ءتيىس. سوندىقتان، قازاقستاندا ۆەنچۋرلىك كاپيتال ۇلكەن ءرول وينايدى. ويتكەنى، كومپانيالارعا بيزنەس باستاعاندا قارجى كەرەك. ءبىز ءوز تاراپىمىزدان ستارتاپ الاڭىن قۇرۋدى قولعا الدىق. بۇل ينۆەستورلاردى تابۋدا باستى قادام بولادى. ويتكەنى ككم-دە قور نارىعىنا شىعۋعا دايىن كومپانيالار بار. بيرجا ينفراقۇرىلىمى بۇعان تولىعىمەن مۇمكىندىك بەرەدى»، - دەدى كاسە باسقارما ءتورايىمى الدامبەرگەنوۆا الينا
