جىل ساناپ مەملەكەت قولداۋىنىڭ ارقاسىندا ەلىمىزدىڭ ءوندىرىسى وركەندەپ، ەكونوميكانىڭ قۋاتتىلىعى ارتا تۇسۋدە. كۇنى كەشە يندۋستريالاندىرۋ كۇنىنە ارنالعان جالپىۇلتتىق تەلەكوپىردە الەۋمەتتىڭ الەۋەتىن كوتەرۋگە كۇش سالاتىن تاعى  جۇزگە جۋىق كاسىپورىندار مەن ونەركاسىپ ورىندارى   ەلباسىنا تانىستىرىلدى. ونىڭ ىشىندە ءبىزدىڭ ءوڭىر ەكى بىردەي ينۆەستيسيالىق جوبانى ەل نازارىنا ۇسىندى، دەپ حابارلايدى Qamshy.kz اقپارات اگەنتتىگى taraztv.kz سايتىنا سىلتەمە جاساي وتىرىپ.

ەلباسىنا تانىستىرىلعان جامبىل وڭىرىندەگى ءىرى كاسىپورىننىڭ ءبىرى مويىنقۇمداعى گرانيت وندىرەتىن «ورگستروي» كومپانياسى. جاپان تۇزگە جان بىتىرگەن كاسىپكەردىڭ باستاماسىمەن ىسكە قوسىلعان زاۋىت جىلىنا 800 مىڭ شارشى مەتر گرانيت  تاقتاسىن وندىرۋگە قاۋقارلى. ءوندىرىس ورنىنىڭ اياققا تۇرىپ، ارى قاراي دامۋىنا البەتتە مەملەكەتتىڭ  قولداۋى سەرپىن بەردى. جاڭا زاۋىتتىڭ جۇمىسىن ەلباسىنا كاسىپورىن ديرەكتورى قالي عىلىمحان تانىستىردى.

قۋاتتى كاسىپورىن مۇنىمەن توقتاپ قالماق ەمەس. ءوندىرىس كولەمىن ارتتىرىپ،  ودان ارى ورلەۋدى كوزدەيدى. بۇيىرسا، الداعى جىلى تاعى 150 جاڭا جۇمىس ورنى اشىلماق مۇندا. دەمەك، ايماقتا 150 ادامعا جۇمىسسىزدار سانى كەميدى دەگەن ءسوز. كيەلى ولكە قويناۋى قازىناعا باي. ونى نەگە ەل يگىلىگىنە جاراتپاسقا، دەيدى كاسىپكەر.

"حالقىما، ەلىمە، وتانىما، تاۋەلسىز، ەڭبەك ەتسەم دەپ ارماندايمىن. ەڭبەك ەتۋگە ءناسىپ ەتسە دەپ تىلەيمىن، قازاق حالقىنا، جالپى بارلىق جۇمىسشىلارىما جاقسى جۇمىس بەرسەم دەيمىن"، - دەپ مالىمدەدى «ورگستروي» كومپانياسىنىڭ ديرەكتورى قالي عىلىمحان.

اتالمىش كومپانيانىڭ جۇمىسكەرى ەرجان سۇيىنبايەۆ: "قازاقستانىمىز ايگىلى بولىپ، وسىنداي تاسىمىز، وسىنداي بايلىعىمىز بار دەگەنگە ماقتان ەتەم. بۇگىنگى تەلەكوپىرىمىز اسەرلى بولدى، ەلباسىنىڭ ماقتانىشىن الىپ، سوعان قۋانىپ تۇرمىن"، - دەپ ايتىپ ءوتتى.

ەلباسىنا جالپىۇلتتىق تەلەكوپىر ارقىلى تانىستىرلعان ەكىنشى نىسان دا ناق وسى مويىنقۇم اۋدانىنا تيەسىلى. كاسىپورىن پرەزيدەنتتىڭ  قازىرگى كەزدە  ەرەكشە ەكپىن بەرىپ وتىرعان سيفرلىق باسقارۋ جۇيەسىن تاۋ-كەن وندىرىسىنە العاشقىلاردىڭ ءبىرى بولىپ ەنگىزگەن ءوندىرىس وشاعى.

ايتا كەتەيىك، «جامبىل» جىلجىمالى تەلەستۋدياسى وسىمەن ون بەسىنشى رەت رەسپۋبليكا كولەمىندە  تىكەلەي بايلانىسقا شىعىپ، ەلباسىمەن بولعان تەلەكوپىر بويىنشا ساپالى حابار تاراتىپ وتىر. بۇل رەتتە اۋقىمدى جوبالاردى ەلباسىنا تانىستىرۋدا تىنىمسىز ەڭبەك ەتىپ، ەل الدىنا شىعۋىنا ءوز ۇلەسىن قوسقان «جامبىل» تەلەارناسىنىڭ ۇجىمىنا ايماق باسشىسى كارىم كوكىرەكبايەۆ ءوز العىسىن ءبىلدىردى.

ەلىمىزدىڭ يندۋستريالدى-يننوۆاسيالىق دامۋ مەملەكەتتىك باعدارلاماسى اياسىندا جامبىل وبلىسىندا جالپى ينۆەستيسيالار كولەمى 159 ملرد تگ بولاتىن، 53 كاسىپورىن ىسكە قوسىلسا، 6 200-گە جۋىق جاڭا جۇمىس ورنى اشىلعان. وڭىرگە ينۆەستيسيالار تارتۋ ماڭىزدى باسىمدىقتاردىڭ ءبىرى بولىپ قالا بەرمەك.