كەزدەسۋ بارىسىندا نۇرسۇلتان نازاربايەۆ سەرىكباي قاجى ورازدى قازاقستاننىڭ باس ءمۇفتيى لاۋازىمىنا سايلانۋىمەن قۇتتىقتادى، دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ. 

– مەن تاۋەلسىزدىك كۇنى قارساڭىندا ءسىزدى وسىنداي جوعارى لاۋازىمعا سايلانۋىڭىزبەن قۇتتىقتاۋ ءۇشىن شاقىردىم. تاۋەلسىزدىكتىڭ ارقاسىندا ءداستۇرىمىزدى قايتا جاڭعىرتىپ، اتا-بابامىزدىڭ ءدىنىن ۇستانۋ مۇمكىندىگىنە يە بولدىق. مەملەكەت تاراپىنان كەز كەلگەن ازاماتتىڭ ءدىني بوستاندىعىن قامتاماسىز ەتۋ ءۇشىن بارلىق جاعداي جاسالدى، – دەدى قازاقستان پرەزيدەنتى.

ەلباسى ءدىن ىستەرى جانە ازاماتتىق قوعام مينيسترلىگى ارقىلى ءدىني قاتىناستار سالاسىن رەتتەۋدە مەملەكەت ەرەكشە ءرول اتقاراتىنىن ايتتى.

– قازاقستان – زايىرلى مەملەكەت. مينيسترلىك دىنگە قانداي دا ءبىر شەكتەۋ قويۋ ءۇشىن قۇرىلعان جوق. مينيسترلىك ءدىن سالاسىندا ءتارتىپ ورناتىپ، ءدىن جولىنداعى ادامدار ءبىر-بىرىنىڭ قۇقىعىن بۇزباۋىن قامتاماسىز ەتۋ ءۇشىن قۇرىلعان، – دەدى مەملەكەت باسشىسى.

سونداي-اق، نۇرسۇلتان نازاربايەۆ ازىرلەنىپ جاتقان ءدىني قىزمەت تۋرالى زاڭنىڭ نەگىزگى ەرەجەلەرىن كەڭ اۋقىمدا ءتۇسىندىرىپ، حالىققا جەتكىزۋ جونىندە بىرلەسە جۇمىس جۇرگىزۋدىڭ قاجەتتىگىنە نازار اۋداردى.

بۇدان بولەك، مەملەكەت باسشىسى قازاقستان مۇسىلماندارى ءدىني باسقارماسىنىڭ وكىلدەرىمەن بيىلعى ساۋىردەگى كەزدەسۋىنە توقتالىپ، وندا سانانى جاڭعىرتىپ، ەلىمىزدىڭ تاريحي جانە رۋحاني بايلىعىن ساقتاۋ قاجەتتىگى تالقىلانعانىن اتاپ ءوتتى.

– پاتريوتريزم، وتاندى ءسۇيۋ، ەلىمىزدەگى جانە وڭىردەگى تۇراقتىلىق – ءبىزدىڭ بولاشاعىمىزدىڭ كەپىلى. سول ءۇشىن ءبىز بىرلەسە جۇمىس ىستەۋىمىز كەرەك، – دەدى ەلباسى.

نۇرسۇلتان نازاربايەۆ قازاقستان مۇسىلماندارى ءۇشىن حانافي مازحابىنىڭ ءداستۇرلى سيپاتىنا نازار اۋدارىپ، بۇل اعىمنىڭ ءمانىن ۇعىندىرۋ قاجەتتىگىن ايتتى.

– ءدىن جولىنداعى ادامداردىڭ اراسىندا جاستار دا بار. مەشىتتەرگە ءسان ءۇشىن باراتىندار دا بار، شالبارىنىڭ بالاقتارىن قىسقارتىپ، ساقال قويعان ءدىندارلار دا بار. سولاردىڭ بارىنە يسلام ءدىنىنىڭ نەگىزىن ءتۇسىندىرۋ كەرەك، – دەدى قازاقستان پرەزيدەنتى.

سونداي-اق، مەملەكەت باسشىسى راديكالدى ءدىني اعىمداردى ۇستانۋشىلارمەن ارنايى ءتۇسىندىرۋ جۇمىستارىن جۇرگىزۋ قاجەتتىگىنە نازار اۋداردى.

– ءداستۇرلى حانافي مازحابىنىڭ قاعيدالارىن جانە ونىڭ تەرىس پيعىلدى ءدىني اعىمداردان ايىرماشىلىعىن ءتۇسىندىرۋ ءۇشىن قۇران مەن حاديستەردى بىلەتىن بىلىكتى يمامداردى تارتۋ قاجەت، – دەدى مەملەكەت باسشىسى.

سونىمەن قاتار ەلباسى مۇقتاج جاندارعا الەۋمەتتىك كومەك كورسەتۋ ءۇشىن عانا ەمەس، سونداي-اق عىلىمي زەرتتەۋلەر مەن كونفەرەنسيالار وتكىزىپ، ءاقپاراتتىق-تۇسىندىرۋ جۇمىستارىن جۇرگىزۋ ءۇشىن دە مەسەناتتىقتى دامىتۋدىڭ ماڭىزدىلىعىن اتاپ ءوتتى.

قازاقستاننىڭ باس ءمۇفتيى جىلى قابىلداعانى ءۇشىن مەملەكەت باسشىسىنا العىس ايتتى.

– قازاقستان مۇسىلماندارى ءدىني باسقارماسىنىڭ الدىندا تاريحي تۇرعىدان قالىپتاسقان ءداستۇرلى ءدىني مەكتەپتى قايتا جاڭعىرتۋعا بايلانىستى ۇلكەن مىندەتتەر تۇر، – دەدى سەرىكباي قاجى وراز.

– ءسىز «بولاشاققا باعدار: رۋحاني جاڭعىرۋ» اتتى ماقالاڭىزدا جاڭا ۇردىستەر مەن الەمدەگى وزگەرىستەرگە بەت بۇرۋ قاجەتتىگى تۋرالى ايتتىڭىز. بۇگىندە ءبىزدىڭ يمامدار جاڭا ادەبيەتتەردى زەرتتەپ، ۋاعىز ايتۋ مەن ءمىناجات ەتۋ بارىسىندا وسى بىلىمدەرىن قولدانۋدا، – دەدى باس ءمۇفتي.

كەزدەسۋ سوڭىندا نۇرسۇلتان نازاربايەۆ پەن سەرىكباي قاجى وراز ەلىمىزدەگى ءدىني ءبىلىم بەرۋ ماسەلەسىن تالقىلادى.