الماتى قالاسى «Ramada Almaty» قوناق ۇيىندە «رۋحاني جاڭعىرۋ» باعدارلاماسى اياسىندا الماتى قالاسىنىڭ بەلسەندى ازاماتتارىنىڭ فورۋمى ءوتتى.

فورۋمنىڭ باستى ماقساتى – حالىقتىڭ ازاماتتىق بەلسەندىلىگىن ارتتىرۋ، قوعامدىق جانە قايىرىمدىلىق قىزمەتتى دارىپتەۋ بولدى. الماتىقالاسىنىڭ بەلسەندى ازاماتتارىنا ارنالعان فورۋمعا مەملەكەتتىك ورگانداردىڭ وكىلدەرى، ءىرى كاسىپكەرلەر، مەسەناتتار، تاريحشىلار، مادەنيەت جانە سپورت قايراتكەرلەرى، ۇكىمەتتىك ەمەس ۇيىمداردىڭ وكىلدەرى مەن ەرىكتىلەر توبى قاتىستى.

فورۋم اياسىندا ومىرلىك بەلسەندى ۇستانىمى بار الماتى قالاسىنىڭ ازاماتتارى ماراپاتتارعا يە بولدى.

ەلباسى نۇرسۇلتان نازاربايەۆ “رۋحاني جاڭعىرۋ” باعدارلاماسىندا: “تۋعان جەرىنە كومەك جاساعان جانداردى قۇرمەتتەۋدىڭ ءتۇرلى جولدارىن تابۋ كەرەك” دەپ اتاپ كورسەتكەن بولاتىن.

اتالعان فورۋم ءوز الدىنا الماتى قالاسىنىڭ دامۋىنا ۇلەس قوسقان ازاماتتاردى ماراپاتتاي وتىرىپ تۇرعىنداردىڭ قوعامدىق بەلسەندىلىگىن ارتتىرۋ، ازاماتتاردىڭ ءوزىن-وزى دامىتۋ مۇمكىندىكتەرىن اشۋ، مەگاپوليستى دامىتۋعا دەگەن جەكە قىزىعۋشىلىعىنا قولداۋ كورسەتۋ مىندەتتەرىن جۇزەگە اسىرۋدى ماقسات ەتكەن بولاتىن. جيىندا اتالعان ماقساتتار مەن مىندەتتەر تولىعىمەن جۇزەگە استى دەپ ايتۋعا نەگىز بار.

“Ramada Almaty” قوناق ءۇيىنىڭ كامەرالىق زالىندا الماتى قالاسىنىڭ بەلسەندى ازاماتتارىنىڭ جۇمىستارى قويىلعان كورمە بولدى. ال “نوماد” زالىندا ەلۋ ۇمىتكەردىڭ ىشىنەن ىرىكتەلىپ شىققان ەڭ ۇزدىك جەتى ازامات “الماتى قالاسىنىڭ ەڭ بەلسەندى ازاماتى” نوميناسياسىمەن ماراپاتتالدى.

“الماتىدا جىل سايىن وسىعان ۇقساس ۇكىمەتتىك ەمەس ۇيىمداردىڭ فورۋمى وتەدى. ۇكىمەتتىك ەمەس ۇيىمداردىڭ سانى جونىنەن، ازاماتتىق بەلسەندىلىك جاعىنان دا الماتى قالاسى الدىڭعى ورىندا. ءقازىردىڭ وزىندە قالامىزدا 5 مىڭعا جۋق ۇكىمەتتىك ەمەس ۇيىمدار قىزمەت ەتەدى. وسىنىڭ ءوزى ازاماتتىق بەلسەندىلىكتىڭ جوعارى دارەجەدە ەكەنىن تانىتادى. قوعامداعى بەلسەندى ازاماتتاردىڭ ەڭبەگىن ەشكىم ەلەپ-ەسكەرە بەرمەيدى. ولار دا ءوز قىزمەتى ءۇشىن ماراپات تالاپ ەتپەيتىن ەرىكتى تۇلعالار. الايدا، ءبىزدىڭ قوعام ءۇشىن ولاردىڭ ەڭبەگى وتە ماڭىزدى. سوندىقتان، بۇگىن قوعام بەلسەندىلەرىن ماراپاتتاۋ ءۇشىن وسىندا شاقىرىپ وتىرمىز”، -دەدى الماتى قالاسى ىشكى ساياسات باسقارماسىنىڭ باسشىسى سىدىقوۆ نۇرلان ەربولات ۇلى.

الماتى قالاسىنىڭ بەلسەندى ازاماتى اتانعان ۇزدىك 7 بەلسەندىنىڭ قاتارىندا نەبارى 9 جاستاعى داۆيد تە بار. ول №68 قازاق-نەمىس گيمنازياسىنىڭ 3 سىنىبىندا وقيدى. داۆيد ءوز ءۇيىنىڭ اۋلاسىن قوقىستان تازارتىپ، الماتى قالاسى تۇرعىندارى اراسىندا الەۋمەتتىك جەلىدە اكسيا ۇيىمداستىرعان.

داۆيد الماتى قالاسىنداعى “قازاقفيلم” ىقشاماۋدانىندا تۇرادى. ول ءوز اۋلاسىن قوقىستان تازارتقان سوڭ، كورشى ءۇيدىڭ اۋلاسىنداعى قوقىستاردى دا جيناۋعا كىرىسكەن. وسىلايشا، اركىم تازالىقتى وزىنەن جانە ءوزىنىڭ اينالاسىنان باستاۋ كەرەك دەگەندى العا تارتقان 9 جاسار قالا قاھارمانى لايىقتى ماراپاتقا يە بولدى. سونداي-اق، داۆيد بوس ۋاقىتىندا سۋرەت سالۋدى ۇناتادى ەكەن.

“بارشاڭىزعا راقمەت! مەن كورشى اۋلانى قوقىستان تازارتقاندا، تىم بولماسا ءوزىمىز ءومىر سۇرەتىن، ءوزىمىز ءجۇرىپ-تۇراتىن اۋماق تازا بولسىن دەگەن نيەتپەن ىستەدىم. مەن كىشكەنتايمىن، سوندىقتان جاساعان ءىسىم دە شاعىن. وزدەرىڭىز ويلاپ قاراڭىزدارشى، ءبىر كوشەلەر تازا بولىپ تۇرعاندا، ءسىز دە ءوز كوشەڭىزدىڭ تازا بولعانىن قالايسىز عوي؟! مۇنىڭ ءبارى ءوز قولىمىزدا! مەنىڭ ءاربىر باستاماما قولداۋ كورسەتكەنى ءۇشىن ءوزىمنىڭ اتا-انام مەن جاقىندارىما العىسىمدى بىلدىرەمىن. قالانىڭ تازالىعى ءاربىر ادامنىڭ تازالىعىنان باستالاتىنىن ۇمىتپاساق ەكەن دەيمىن”، -دەدى جاس بەلسەندى.

ءداۆيدتىڭ بۇل ەڭبەگىنە جيىنداعى قاۋىم “بۇگىنگى كۇننىڭ كىشكەنتاي باتىرى” دەگەن باعا بەردى.