الماتىدا BRT جۇردەك اۆتوبۋستار جولىنىڭ العاشقى جەلىسى پايدالانۋعا بەرىلدى.

مۇنداي جاڭاشىلدىق وربيتا شاعىن اۋدانىنىڭ تۇرعىندارىندا ەكىۇداي پىكىر تۋعىزىپ جاتىر. قوعامدىق كولىكپەن قاتىنايتىن ازاماتتار قۋانىش ءبىلدىرىپ جاتسا، اۆتوجۇرگىزۋشىلەر نارازى بولىپ وتىر.

ولاردىڭ ايتۋىنشا، ال-فارابيدەن جاندوسوۆ كوشەسىنە دەيىنگى مۇستافين، رىسقۇلبەكوۆ، سۇلەيمەنوۆ كوشەلەرىمەن ءجۇرۋ مۇلدە ىڭعايسىز. جەكە كولىكتەرگە تەك 1 جولاقتان عانا جول قالدى.

قالالىق جولاۋشىلار كولىگى جانە اۆتوموبيل جولدارى باسقارماسىنىڭ حابارلاۋىنشا، BRT جولاعى ازىرگە تەستىلىك رەجىمدە پايدالانىلاتىن بولادى.

«قازىرگى تاڭدا   ال-فارابيدەن جاندوسوۆ كوشەسىنە دەيىنگى مۇستافين، رىسقۇلبەكوۆ، سۇلەيمەنوۆ كوشەلەرىندە جالپى ۇزىندىعى 2،7 كم بولاتىن جولاق جاسالىپ جاتىر. جولاق جولدىڭ ورتاسىندا، ياعني ەڭ شەتكى سول جاقتا ورنالاسادى. ءبىراق سۇلەيمەنوۆ كوشەسىنىڭ پياتنيسكييدەن جاندوسوۆ كوشەسىنە دەيىنگى ارالىعى اۆتوبۋستار وڭ جاق جولاقپەن، كولىكتەر - شەتكى سول جولاقپەن جۇرەتىن بولادى»، - دەدى باسقارمانىڭ جول ينفراقۇرىلىمى ءبولىمىنىڭ باسشىسى ەرنۇر ابجاحان.

ونىڭ ايتۋىنشا، جۇردەك اۆتوبۋس جەلىسىن ەنگىزۋ ءبىرىنشى كەزەكتە جولاۋشىلاردىڭ قاۋىپسىزدىگى ءۇشىن جاسالادى.

"بۇل ءبىزدىڭ ەلىمىزدەگى بىرەگەي جوبا. BRT جۇيەسىندە ايالدامالار جولدىڭ سول جاعىندا ورنالاسادى. جولاۋشىلارعا ارنالعان ارنايى جولاقتار سالىنادى. بۇگىندە ينفراقۇرىلىمدى جەتىلدىرۋ، جول بەلگىلەرىن سىزۋ، باعدارشام ورناتۋ جۇمىستارى جاسالىپ جاتىر. رەكونسترۋكسيا جۇمىستارى اياقتالعان سوڭ ناتيجە انىق بولادى"،- دەدى ول.

ونىڭ ايتۋىنشا كەلەسى جىلى BRT جولى جاندوسوۆ-تيميريازيەۆ، تيميريازيەۆ- جەلتوقسان كوشەلەرىندە جالعاسادى. تيميريازيەۆ كوشەسىندە ارنايى جولاق كوشەنىڭ ورتاسىندا بولادى. اتالعان ۋچاسكە اياقتالعان سوڭ 2018 جىلدىڭ اياعىنا تامان BRT جالپى ۇزاقتىعى 8،7 كم بولماق»،- دەدى  ەرنۇر ابجاحان.

اتالعان جولاقپەن تەك قوعامدىق كولىك قانا جۇرەدى. ارنايى جۇردەك اۆتوبۋستار 2018 سوڭىندا جولعا شىعادى. 

BRT جولىنىڭ كەلەسى جەلىسىنىڭ قۇرىلىسى 2019 جىلى باستالادى.

جول جەلتوقسان تيميريازيەۆ كوشەسىنەن تولە بي ارقىلى شىعىس اينالما جولعا شىعىپ قۇلجا تاس جولىمەن شىعىس اۆتوۆوكزالىنا دەيىن سوزىلادى. جولدىڭ ۇزىندىعى 22،4 شاقىرىم بولماق.

ءقازىر ەكىنشى كەزەك بويىنشا جوبالىق سمەتالىق قۇجاتتاما جاسالىپ جاتىر.