الماتىدا قالا بيلىگى ەگەۋقۇيرىقتاردى جويۋ شاراسىن جۇرگىزىپ جاتىر.

قوعام دەنساۋلىعىن قورعاۋ دەپارتامەنتىنىڭ حابارلاۋىنشا، اسا قاتەرلى ينفەكسيا تاراتاتىن ەگەۋقۇيرىقتاردى ۋلاۋ جىلىنا ەكى رەت - كۇز جانە كوكتەم اۋسىمىندا جۇرگىزىلەدى.

«داراتيزاسيا (ۋلاۋ) قالا بويىنشا 47 مىڭ 330 گەكتار اۋماقتا جۇرگىزىلەدى.  نەگىزىنەن، ەگەۋقۇيرىقتار كوپ بولاتىن وزەن جاعالارى، ساياجايلار، سكۆەرلەر، ارىق جەلىلەرى مەن قوعامدىق كولىك ايالدامالارى، كونتەينەرلەر الاڭىندا ۋلاۋ جۇمىستارى جۇرەدى. ۋلاۋ جۇمىستارىن جۇرگىزۋ ءۇشىن 2017 جىلى اكىمدىك تاراپىنان 86 ملن تەڭگە ءبولىندى»، - دەلىنگەن حابارلامادا.

قۇزىرلى مەكەمەنىڭ مالىمەتىنە سۇيەنسەك، ۋلاۋ جۇمىستارىن قالالىق اكىمدىكپەن قاتار قالاداعى ۇيىمدار مەن مەكەمەلەر، بازارلار مەن ساۋدا ورىندارى، كوممۋنالدىق، ءوندىرىس نىساندارى ءوز ەركىمەن جۇرگىزىپ كەلەدى.

«الماتىدا كەمىرگىشتەردى ۋلاۋمەن اينالىساتىن 40 فيرما تىركەلگەن. اتالعان نىسانداردا ءوز قاراجاتتارىمەن ەگەۋقۇيرىقتار مەن تىشقانداردى دە ۋلاپ جاتقاندار بار. سونىمەن قاتار، ءبىز «ەگەۋقۇيرىقتار نەسىمەن ءقاۋىپتى؟» تاقىرىبىمەن قالا دۇكەندەرىندە سانيتارلىق-ەپيدەميولوگيالىق نورمالاردىڭ ساقتالۋىن ناسيحاتتايتىن اكسيا وتكىزىپ، قالانىڭ جەكە سەكتورى تۇرعىندارىنا ءتۇسىندىرۋ جۇمىستارىن جۇرگىزەمىز»، - دەدى دەپارتامەنتتەگىلەر.

ەسكە سالا كەتەيىك، اتجالماندار ادام ومىرىنە ءقاۋىپتى يەرسينيوز، ليستەريوز، پاستەرەللەز، لەپتوسپيروز دەرتتەرىن تاراتادى.