كەۋدەسىنە تەرگەۋشىنىڭ ءاتى-جونىن ويىپ جازعان باۋىرجان ۋنەرزاك قىلمىستىق كودەكستىڭ «بۇزاقىلىق» بابى بويىنشا ايىپتى دەپ تانىلدى. ول جازاسىن شارتتى تۇردە وتەيدى، دەپ Qamshy.kz اقپارات اگەنتتىگى قازاقپاراتقا سۇيەنە وتىرىپ جازادى. 

«اقتوبە قالاسىنداعى تۇنگى كلۋبتاردىڭ بىرىندە توبەلەس بولىپ، سول توپتى اجىراتۋ ءۇشىن باردىم» دەگەن باۋىرجان ۋنەرزاك تەرگەۋ قاپاسىندا وتىرىپ، پروكۋرورلاردىڭ كومەك سۇراعان بولاتىن. اقتوبە وبلىستىق پروكۋراتۋراسى تەرگەۋ كەزىندە زاڭسىزدىقتارعا جول بەرىلگەنىن انىقتاپ، سوت شەشىمىمەن ايىپتالۋشى ءۇيقاماققا جىبەرىلدى.

№2 اقتوبە قالالىق سوتى قىلمىستىق ىسكە ۇكىم شىعاردى. باۋىرجان ۋنەرزاك قىلمىستىق كودەكستىڭ «بۇزاقىلىق» بابى بويىنشا ايىپتى دەپ تانىلىپ، 3 جىلعا شارتتى تۇردە باس بوستاندىعىنان شەتتەتىلدى. سونىمەن قاتار، ول جەرگىلىكتى اتقارۋشى ورگاننىڭ نۇسقاۋىمەن 100 ساعات جۇمىس ىستەۋى ءتيىس. ب.ۋنەرزاك 306 مىڭ تەڭگە سوت شىعىنىن وتەيدى. ءىس ماتەريالىنا سۇيەنسەك، ب.ۋنەرزاك 25 ماۋسىم كۇنى دوستارىمەن تۇنگى كلۋبقا بارادى. سول كەزدە تاعى ءبىر توپ قىدىرىپ جۇرگەن.

توبەلەس تۇنگى كلۋبقا كىرەبەرىستە بولىپ، ب.ۋنەرزاك بىرنەشە ادامدى ۇرادى. سول كەزدە كلۋب جانىنا كولىك كەلىپ، توبەلەسكەن توپتى تاراتادى. وسى ءساتتى پايدالانعان جابىرلەنۋشىلەر وقيعا ورنىنان قاشىپ كەتكەن. ايىپتالۋشى باۋىرجان ۋنەرزاك وزىنە تاعىلعان ايىپپەن كەلىسكەن جوق. ول تۇنگى كلۋبقا جالعىز ءوزى بارعانىن، جانىنداعى ادامداردى تانىمايتىنىن، دالاعا شىققان كەزدە توبەلەسىپ جاتقان توپتى كورىپ، جاس جىگىتتەرگە اراشا تۇسكەنىن ايتتى.