قازاقستان رەسپۋبليكاسى اقپارات جانە كوممۋنيكاسيالار مينيسترلىگى جانە "قازاقستان" ۇلتتىق ارناسىنىڭ قولداۋىمەن وتكەن وتاندىق مەگاجوبادا كۇي، تەرمە جانە ءداستۇرلى ءان قاتارلى ءۇش اتالىمدا ب ا ق سىناعان جاس تالانتتاردى ىرىكتەۋ سوڭعى كەزەڭدەردە قازىلار القاسىنا دا ۇلكەن قيىندىق تۋدىرعان. ول - فينالعا شىعار ۇزدىكتەردى سارالاۋداعى قيىندىق ەدى. سەبەبى ءۇش ايعا سوزىلعان تەلەنۇسقادا سۋىرىلىپ سوڭعى التى ۇمىتكەر قالعان بولاتىن. ءتىپتى سوڭعى اينالىمداعى 12 قاتىسۋشىدان التى ۇزدىكتى انىقتاپ، فينالعا شىعارۋدىڭ ءوزى وڭاي بولعان جوق.

«بۇل بايقاۋدا ءبىز بارىنشا ءادىل بولىپ، كورەرمەن حالىقتىڭ پىكىرىمەن بارىنشا ساناسىپ شەشىم شىعارۋعا تىرىستىق. دەگەنمەن «جۇيرىكتەن جۇيرىك وزار جارىسقاندا» دەگەندەي بايقاۋ بولعان سوڭ بىرەۋ وزىپ، بىرەۋ قالاتىنى زاڭدىلىق. وزدەرىڭىزگە ۋادە بەرگەنىمدەي، وتكەن بايقاۋدىڭ قورىتىندىسى ساقتالعان كونۆەرت قالتامدا، جەڭىمپازدىڭ كىم بولعانىن سول ارقىلى عانا بىلەتىن بولامىز. ال بۇل «مەن قازاقپىن» جوباسى حالىقتىڭ كوپتەن كۇتكەن، ۇلتتىڭ، ەلدىڭ كوكەيىندە كوپتەن بەرى ساقتالىپ كەلە جاتقان جوبا ەدى، مينيسترلىككە، تەلەارنا باسشىلىعىنا كەلگەن بىلىكتى جىگىتتەردىڭ ارقاسىندا جۇزەگە استى، العىستان باسقا ايتارىم جوق» - دەدى جوباداعى قازىلار القاسىنىڭ ءتوراعاسى مىرزاتاي جولداسبەكوۆ.

سونىمەن مىرزاتاي جولداسبەكوۆتىڭ قالتاسىنداعى حاتتا جاسىرىلعان جەڭىمپازدار مىنالار ەكەن:

كۇي – الماس ەلەۋسىزوۆ (اقتوبە)

تەرمە – وسپان قۇلسىماق (ماڭعىستاۋ)

ءداستۇرلى ءان – بەيبىت مۇسايەۆ (الماتى وبلىسى)

ءار جەڭىمپازعا 1 ملن تەڭگەدەن جۇلدە بەرىلدى.

سونىمەن قاتار جوباعا قاتىسىپ، «كورەرمەن كوزايىمىنا» اينالعان جامبىل وبلىسىنان كەلگەن سۇلۋجان ابەنوۆا ارنايى سىيلىققا يە بولدى.

ال وتكەن باعدارلامادا ۇزدىك 12 قاتىسۋشىنىڭ ءبىرى بولىپ، ءوزىنىڭ ەرەكشە دارىنىمەن كوزكە تۇسكەن جوبانىڭ ەڭ جاس قاتىسۋشىسى ماڭعىستاۋلىق كۇيشى الماز جەتىبايەۆقا ءوزى ۋادە بەرگەنىندەي مىرزاتاي جولداسبەكوۆ ارنايى سىيلىعىن بەردى.