جايناماز ۇستىندە وتىرىك ساجدەگە باس يگەن بوپ، كوزدى الا بەرە مەشىتتە ۇرلىق جاسايتىندار سانى تىيىلار ەمەس. كەشە عانا ەلورداداعى قۇلشىلىق ۇيىنە ناماز وقۋعا كەلگەن ازامات ۇيالى تەلەفونى مەن سىرت كيىمىنەن ايرىلىپ قالعان. ايازدى كۇندە كۇرتەسىز قالعان جىگىت پوليسياعا حابار بەرىپتى. مەشىت قىزمەتكەرلەرى قاۋىپسىزدىكتى كۇشەيتتىك دەگەنىنە قاراماستان، كەيبىر اككى ۇرىلار كامەرا تۇرعان ورىندارعا تۇسپەي ءىزىن سۋىتىپ كەتەتىنىن ايتادى. جالپى بۇگىندە بوتەننىڭ مۇلكىن ۇرلاۋ ۇلكەن ماسەلەگە اينالعانى بەلگىلى. دەگەنمەن ادامنىڭ اللانىڭ ۇيىندە باسسىزدىق جاساۋعا نە يتەرمەلەيدى؟
بۇرىندارى «مەشىتكە بارىپ اياقكيىم جاڭارتىپ قايتۋ كەرەك ەدى» دەگەن قاعىتپا بولۋشى ەدى. ءبىراق بۇل بۇگىنگىنىڭ شىندىعى بولىپ تۇرعانى وكىنىشتى. جاقىندا عانا وسى مەشىتكە قۇلشىلىققا جىگىت سىرت كيىمى مەن ۇيالى تەلەفونىنان ايرىلىپ قالدى. ۇرىنى ۇستاۋ ءۇشىن بەينەكامەراداعى جازبانى قاراعان پوليسەيلەر ونى كوپ ۇزاماي قولعا تۇسىرگەن.
سوڭىنان بۇل ءىس سوتقا دەيىن جەتىپتى. ءبىراق جۇرەگىندە يمانى بار جىگىت، ءوزىنىڭ مۇلكىن قولدى ەتكەن باۋكەسپەگە كەشىرىم بەرگەن.
«كەشىرە بەرەدى ەكەن دەپ ارى قاراي قىلمىسكەر ادام ءوز ءىسىن جالعاستىرا بەرۋىنە بولمايدى. پوليسيا قىزمەتكەرلەرى ارى قاراي ونىڭ باسقا دا قىلمىستارعا قاتىسى بار ما، جوق پا ەكەنىن انىقتاپ جاتقان جاعدايدا، باسقا قوعامدىق جەرلەردە وسىنداي قىلمىسقا بارعان جاعدايدا، جاۋاپقا تارتىلۋى ءتيىس» - دەيدى «نۇر استانا» ورتالىق مەشىتىنىڭ نايب يمامى نۇرلان رامازانوۆ.
ال مىنا بەينەكادرلەر وسى كۇزدە تۇركىستان قالاسىنداعى مەشىتتەردىڭ بىرىندە تۇسىرىلگەن. وندا تەپسە تەمىر ۇزەتىن جىگىت، ساداققا جاشىگىن جالاڭ قولمەن اشقىسى كەلگەن كورىندى. ءبىراق ونىسىنان تۇك شىقپاعان سوڭ، سىرتتان تەمىر زات الىپ كەلىپ، اۋرەگە تۇسەدى.
ال مىنا كادرلاردا قۇلشىلىق ورنىنا كەلگەن باۋكەسپە اۋەلى جان-جاعىنا اسىقپاي قاراپ تۇر. سوڭىنان كىسى اياعى ازايعان كەزدە بوگدە ادامنىڭ كيىمىنەن ءامياننىن الىپ، قاشا جونەلەدى.
ال الماتى قالاسىنداعى مەشىتتە ۇرلىق ۇستىندە قولعا تۇسكەن سۇعاناقتى يمامداردىڭ ءوزى قولعا ءتۇسىرىپ، بەينەكامەرا الدىندا قىلمىسىن مويىنداتتىرعان. قادردان جاس جىگىتتىڭ قولدى بولعان گادجەتتى كىلەمنىڭ استىنان جايباراقات الىپ، ۇستەلدىڭ ۇستىنە قويعانىن كورۋگە بولادى. جۇزىندە «ۇيات بولدى-اۋ»دەگەن ويدىڭ ۇشقىنى دا جوق. جالپى مۇنداي سۇعاناق قولدىلاردىڭ جەر بەتىندەگى ەڭ قاسيەتتى جەردە دە تايسالماۋىنا نە سەبەپ؟ تاياۋدا عانا ەلىمىزدىڭ بۇرىنعى باس پروكۋرورى، قازىرگى جوعارعى سوت ءتوراعاسى جاقىپ اسانوۆ ولار ءوزىنىڭ قولعا تۇسپەيتىنىن جاقسى بىلەتىنىن ايتقان ەدى.
«ءبىز ىلعي جاقسى كورەمىز عوي، ساقتىقتا قورلىق جوق دەپ ايتۋدى. ونىڭ ءبارى ءقازىر ەسكىردى. ءقازىر دەگەن ۇرىلار، بۇرىنعىداي ەمەس، وتە قۋ. ولاردىڭ قۋلىقتارى كوپ. جالپى حالىق قۇقىق قورعاۋ ورگاندارىنا سەنبەيدى. ويتكەنى تىركەلگەن ۇرلىقتاردىڭ 70 پايىزى جىل سايىن اشىلماي قالىپ جاتادى» - ق ر بۇرىنعى باس پروكۋرورى جاقىپ اسانوۆ.
يمامداردىڭ ايتۋىنشا، ۇرلىق-قارلىق كوبىنە جۇما نامازى سەكىلدى، جۇرتتىڭ قاراسى قالىڭ كەزدەردە بولادى ەكەن. كەيبىر اككىلەر كامەرا تۇرعان ورىنداردى بەس ساۋساعىنداي جاتتاپ العان. ول جەرلەردەن ءجۇزىن كورسەتپەي وتە شىعادى. دەگەنمەن مەشىت قىزمەتكەرلەرى ۇرلىقشى ءىسىن ادامنان جاسىرعانمەن، اللادان جاسىرا المايتىنىن ايتادى.
«ۇرلىقشىعا ايتارىمىز، بۇل شاريعاتتا دۇرىس ەمەس. ۇرلىقتىڭ دىنىمىزدە ەڭ ۇلكەن كۇنا ەكەنىن ەسكەرتەمىز. سەبەبى پايعامبارىمىزدىڭ حاديسىندە ايتادى: مۇسىلماننىڭ ارى، ونىڭ نامىسى، ونىڭ مال-دۇنيەسى كەلەسى ءبىر مۇسىلمانعا ارا دەلىنگەن. قۇراننىڭ اياتتارىندا دا، ۇرلىقتىڭ ەڭ ۇلكەن كۇنانىڭ قاتارىندا ەكەنىن ەسكەرتەدى» - دەيدى «نۇر استانا» ورتالىق مەشىتىنىڭ نايب يمامى نۇرلان رامازانوۆ.
مەشىت قىزمەتكەرلەرى ۇرىلاردىڭ يماندىلىقتىڭ ۇياسى سانالاتىن جەردە دە ارەكەت ەتۋى ازاماتتاردىڭ قۇلشىلىق ورنىنا اياعىن اڭداپ باساتىن حالگە جەتكىزدى دەيدى. دەگەنمەن ماماندار قيامەت كۇنى بارلىق قىلمىستىڭ، جاسىرىلعان جىمىسقى ارەكەتتەردىڭ بەتى اشىلىپ، كۇنالىلەر جازالاناتىنىن ايتادى. ول كۇنى ەشكىم ەشتەڭە دە جاسىرا المايدى.
گۇلنۇر جاقسىلىقوۆا
