13 جەلتوقسان ۇلتتىق اكادەميالىق كىتاپحانادا تاڭجارىقتانۋ عىلىمىنىڭ نەگىزىن سالعان بەلگىلى ادەبيەتتانۋشى عالىم، جازۋشى جانە فولكلورشى ورازانباي ەگەۋبايەۆتىڭ بەس تومدىق شىعارمالار جيناعىنىڭ تۇساۋكەسەرى ءوتتى. 

شىعىس تۇركىستانداعى قازاق ادەبيەتىنىڭ جارىق جۇلدىزى تاڭجارىق جولدى ۇلىنىڭ ءومىرى مەن شىعارمالارىن زەرتتەۋگە ءومىرىن ارناعان ورازانباي ەگەۋبايەۆ ەلىمىزگە قازاق فولكلورىنىڭ جيناۋشى ءھام زەرتتەۋشىسى رەتىندە دە جاقسى تانىس. ازات رۋحتىڭ الداسپانىنداي بولعان تاڭجارىق اقىننىڭ ەل اراسىنداعى مۇراسىن جيناپ-تەرىپ، تۇڭعىش تولىق جيناعىن شىعارعان  دا عالىم ورازانباي ەگەۋبايەۆ بولاتىن. كەيىننەن جارىق كورگەن بارلىق جيناقتار وسى اكادەميالىق جيناقتىڭ نەگىزىندە قۇراستىرىلىپ ءجۇر.

شىعىس تۇركىستان قازاقتارىنىڭ اسىل مۇرالارىن قازاقتىڭ باي مادەني مۇرالارىنىڭ قاتارىنا قوسىپ، ۇلتتىڭ رۋح بايلىعىن تۇگەندەۋ دە كەزەك كۇتتىرمەيتىن مىندەت. الەمدە تەڭدەسى جوق جوبا «بابالار ءسوزى» ءجۇز تومدىعىنا  ون بەس تومدىق مۇرا شىعىس تۇركىستان قازاقتارى فولكلورىن اكەپ قوسقان، سول تومداردىڭ رەداكتورلىق قىزمەتىن دە قوسا اتقاردى. ءبىر ينيستيتۋتتىڭ اتقارۋعا ءتيىستى مىندەتىن ءوزى اتقارعان  عالىمنىڭ قازاق مادەنيەتىنە قوسقان ۇلەسى ولشەۋسىز.

سونىمەن بىرگە ورازانباي ەگەۋبايەۆ جازۋشى رەتىندە دە بىرنەشە روماندار مەن حيكاياتتاردىڭ اۆتورى. ونىڭ پروزالىق شىعارمالارى دا وقىرماندى بەيجاي قالدىرماي، ەرەكشە تولعاندىرعان ءساتتى تۋىندىلار قاتارىنا جاتادى. عالىمنىڭ بۇل بەس تومدىعى اكە اماناتىنا ادال ۇرپاعى ايدىن ورازانباي ۇلى مەن اينۇر ورازانباي قىزىنىڭ مۇرىندىق بولۋىمەن جانە ورازانباي ەگەۋبايەۆتىڭ دوسى، جازۋشى ءسالي ءسادۋاقاس ۇلىنىڭ قۇراستىرۋىمەن وقىرمانعا قاۋىشىپ وتىر.

بەس تومدىقتىڭ تانىستىرىلىمىنا قازاق ادەبيەتىنىڭ بەلگىلى وكىلدەرى اقىن، مەملەكەتتىك سىيلىقتىڭ يەگەرى نەسىپبەك ايت ۇلى، تاريح عىلىمدارىنىڭ دوكتورى، پروفەسسور، جازۋشى تۇرسىنحان زاكەن ۇلى قاتارلى تۇلعالارمەن قاتار وقىرمان قاۋىم مەن بۇقارالىق اقپارات قۇرالدارىنىڭ وكىلدەرى قاتىستى. كەشتى الاشتانۋشى عالىم، پروفەسسور تۇرسىن جۇرتباي جۇرگىزدى.

سانالى عۇمىرىن قازاق مادەنيەتى مەن ادەبيەتىن زەرتتەۋ مەن ناسيحاتتاۋعا ارناعان قاجىرلى عالىمنىڭ شىعارمالارىنىڭ وقىرمان كوپپەن قاۋىشۋى ۇلت مادەنيەتى ءۇشىن ءسۇيىنشىلى جاڭالىق.

ەربول الشىنباي