بۇگىن ق ر پرەمەر-مينيسترى باقىتجان ساعىنتايەۆ ق ر اشم ۇجىمىنا جاڭا ءمينيسترى ءومىرزاق شوكەيەۆتى تانىستىردى دەپ حابارلايدى Qamshy.kz اقپارات اگەنتتىگى قازاقستان رەسپۋبليكاسىنىڭ پرەمەر-مينيسترىنىڭ باسپا ءسوز قىزمەتىنە سىلتەمە جاساي وتىرىپ.
باقىتجان ساعىنتايەۆ اسقار مىرزاحمەتوۆكە بىرلەسىپ اتقارعان ناتيجەلى جۇمىسى ءۇشىن العىس ءبىلدىرىپ، ەلىمىزدىڭ اۋىل شارۋاشىلىعى سالاسىن دامىتۋعا قوسقان ەلەۋلى ۇلەسىن اتاپ ءوتتى.
«مينيسترلىكتىڭ الدىندا اگروونەركاسىپتىك كەشەندى دامىتۋدىڭ مەملەكەتتىك باعدارلاماسىن ىسكە اسىرۋ سەكىلدى وتە ماڭىزدى مىندەتتەر تۇر»، - دەدى پرەمەر-مينيستر ءومىرزاق شوكەيەۆتى تانىستىرا وتىرىپ. -مەملەكەت باسشىسى قازاقستان حالقىنا جولداۋىندا اگرارلىق سەكتور ەكونوميكانىڭ جاڭا قوزعاۋشى كۇشىنە اينالۋى ءتيىس ەكەنىن ايتىپ ءوتتى. پرەزيدەنت اۋىل شارۋاشىلىعى ونىمدەرىن وڭدەۋ، ءتۇسىمدى ارتتىرۋ، ەڭبەك ونىمدىلىگىن ۇلعايتۋ جانە سالانىڭ ەكسپورتتىق مۇمكىندىكتەرىن دامىتۋدى قامتاماسىز ەتۋگە ەرەكشە نازار اۋدارۋدى تاپسىردى. اۋىل شارۋاشىلىعى مينيسترلىگى جۇمىس قارقىنىن كۇشەيتىپ، جەدەلدەتۋى كەرەك. نەگىزگى باسىمدىق - جوعارى ساپالى جانە باسەكەگە قابىلەتتى ءونىم ءوندىرۋ».
ب.ساعىنتايەۆ جاڭا مينيسترگە جانە مينيسترلىك ۇجىمىنا تابىس تىلەپ، العا قويىلعان مىندەتتەردى ىسكە اسىرۋعا بەلسەنە ارالاسىپ، بارىنشا كۇش جۇمىلدىرۋ قاجەتتىگىن ايتتى.
پىكىر قالدىرۋ