ەلىمىزدىڭ باس مەرەكەسى – تاۋەلسىزدىك كۇنى قازاقستان رەسپۋبليكاسى ۇلتتىق ۇلانىنىڭ الماتى قالاسىنداعى «وڭتۇستىك» وڭىرلىك قولباسشىلىعىنىڭ باسقارماسىندا ايشىقتى مەرەكەگە ارنالعان ءبىرقاتار سالتاناتتى شارالار ءوتتى، دەپ حابارلايدى Qamshy.kz اقپارات اگەنتتىگى.
اتاپ ايتقاندا، وسى شارا بارىسىندا جاۋىنگەرلىك قىزمەتتە ەرىك، جىگەرىمەن، تاباندىلىعى جانە ەڭبەكسۇيگىشتىگىمەن دارالانعان اسكەري قىزمەتشىلەرگە ەلىمىزدىڭ ىشكى ىستەر ءمينيسترى، ۇلتتىق ۇلان باس قولباسشىسى اتىنان بەرىلگەن مەملەكەتتىك ماراپاتتاردى «وڭتۇستىك» وڭىرلىك قولباسشىلىقتىڭ قولباسشىسى گەنەرال-مايور قايرات اقتانوۆ تابىستاپ، ماراپات يەلەرىنە سىي-قۇرمەت كورسەتتى.
سونىمەن قاتار سالتاناتتى جيىن بارىسىندا «ەلباسى ساباقتارى» دەپ اتالاتىن اقپاراتتىق-ناسيحات شارا وتكىزىلىپ، وندا وڭىرلىك قولباسشىلىق قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى پولكوۆنيك سابىرجان سۇلەيمەنوۆ ەلباسى ن.ءا.نازاربايەۆتىڭ ساليقالى ساياساتىنىڭ ارقاسىندا تاۋەلسىزدىك جىلدارى ەلىمىزدىڭ جەتكەن بارشا جەتىستىكتەرى جايلى كەڭ تۇرعىدا ءتۇسىندىرىپ، بايانداما جاسادى.
جانە دە وسى شارا بارىسىندا سانالى عۇمىرلارىن وتان قورعاۋ قىزمەتىنە ارناپ، قىزمەتتە بولۋدىڭ شەكتى جاسىنان جەتكەن 6 بىردەي جوعارى شەندى اسكەري قىزمەتشىنى قۇرمەتتى ەڭبەك دەمالىسىنا شىعارىپ سالۋعا ارنالعان ۇلىقتاۋ شاراسى دا ءوتتى. اتاپ ايتساق، وڭىرلىك قولباسشىلىقتىڭ مەديسينا قىزمەتىن ۇزاق جىلدار بويى باسقارعان مەديسينا قىزمەتىنىڭ پولكوۆنيگى قالىبەك بۇرالحييەۆ: «اسكەري قىزمەت بولعانىما جالپى العاندا بارلىعى 30 جىلدان اسا ۋاقىت ءوتىپتى. ارينە، ءبىز قىزمەتكە كەزدە وتكەن عاسىردىڭ 80ء-شى جىلدارى ەدى. كەيىن ءتاۋ ەتەر تاۋەلسىزدىك تە باسىمىزعا باقىت قۇسى بولىپ قونىپ، ەگەمەندىك الدىق. سول تۇستاعى قيىنشىلىق جىلدار ءالى ەسىمىزدە. كادر تاپشىلىعى، تەحنيكالىق بازانىڭ السىزدىگى، ءتىپتى تىزە بەرسەك كوپ، ءبىر كۇن اسكەري بولىمدەرىمىزدەردە ەلەكتر جارىعى بولىپ، ءبىر كۇن بولماعان تۇستاردى باستان وتكىزدىك. ارينە، نارىق جىلدارى وتە قىسپاققا تولى بولدى. ءبىراق، سونىن بارلىعىن ەلىمىز ەڭسەردى. ەلباسىمىزدىڭ ساليقالى ساياساتىنىڭ ارقاسىندا ەڭسەردىك. ءقازىر سول تۇستاردى ەسكە السام كورگەن تۇستەي بولادى دا تۇرادى. ەندى مىنە، بۇگىن قۇرمەتتى زەينەتكەرلىك دەمالىسقا شىعىپ وتىرمىن. وسى ءساتتىڭ ءوزى تاۋەلسىزدىگىمىزدىڭ 26 جىلدىق مەرەكەسىمەن تۇسپا-تۇس كەلىپ، وسى كۇنى شىعىپ وتىرعانىم دا مەن ءۇشىن زور قۋانىش دەپ بىلەمىن»، - دەپ اتاپ ءوتتى.
سونداي-اق، وڭىرلىك قولباسشىلىق باسشىلىعى تاراپىنان ەلىمىزدىڭ باس مەيرامى - تاۋەلسىزدىك كۇنىنە وراي ارنايى كونسەرتتىك تارتۋ جاساۋ تۋرالى شەشىم قابىلدانعان بولاتىن. وسىعان سايكەس اتالعان شارانىڭ سوڭى وڭىرلىك قولباسشىلىققا قاراستى 5571 اسكەري ءبولىمىنىڭ اسكەري ءان-بي وركەسترىنىڭ مەرەكەلىك كونسەرتىنە ۇلاستى. بۇل ءان شاشۋعا ارنايى باعدارلاما دا دايىندالدى. وندا ەلىمىزگە تانىمال پاتريوتتىق اۋەندەر شىرقالىپ، اسكەري وركەستر ۇجىمىنان بولەك باسقا دا ەلگە تانىمال ونەرپاز مەن ۇجىمدار ونەر كورسەتتى. مەرەكەگە ارنالعان ۇلكەن كونسەرتكە الماتى قالاسى اكىمشىلىگىنىڭ، قالاداعى كۇش-قۋات ورگاندارىنىڭ، «نۇر وتان» پارتياسىنىڭ، جانە باسقا دا ءوزارا ىقپالداستىق مەكەمەلەرىنىڭ وكىلدەرى، ارداگەرلەر، اسكەري قىزمەتشىلەر مەن ولاردىڭ وتباسى مۇشەلەرى مەن ورتا ءبىلىم بەرۋ ورىندارىنىڭ وقۋشىلارى قاتىستى.
