ەركىندىگىم.
قاسيەتتىم.
قاستەرلىم.
ءوزىڭ باردا وزەگىمدە جوق شەر مۇڭ!
كەشە سەنىڭ كەلبەتىڭدى ارمان عىپ،
بودانىنا بۇعاۋلاندىق باسقا ەلدىڭ.
بابالاردىڭ باسىن تىگىپ بايگەگە،
انالاردىڭ جانارىنا جاس بەردىڭ!
ۋا، ەركىندىك،
قوش كەلدىڭ!وزەگىمدى ورتكە وراعان قوعامدا،
ءوز ۇيىمە ءوزىم وگەي بولام با؟!
الشاڭ باسىپ جۇرە الماسا التى الاش
ازاتتىعىم! ءقادىرىڭ دە جوق وندا!
…ساعان جەتۋ قيىن بولسا قانشالىق،
ساقتاپ تۇرۋ قيىنىراق ودان دا!
اللا بەرگەن ازاتتىقتىڭ ءار ءساتى-
امانات قوي
ماعان،
ساعان
وعان دا!
ساياساتقا سەرمەي الماي سەمسەردى،
ەزگى كۇنگە تەرى قىلدىم ەڭسەمدى!
جەلتوقساندا جالىن اتىپ جاستىعىم،
قۇرساۋ بولعان تەمىر قوعام تەڭسەلدى!
ەستە داڭقى قىرشىنداردىڭ قالدى ما،
سەكسەن التى ەرلىگىم بە-ەي، ەڭ سوڭعى!؟
ۋا، ەركىندىك،
قۇنىڭ نەمەن ولشەڭدى!؟
ۋا، ەركىندىك!
قۇنىڭ نەمەن ولشەندى؟!
سەنى كوكسەپ
بوزداقتارىم ولسە ءولدى!
سەنسىڭ مەنىڭ ەڭ عاجايىپ ولەڭىم،
ەڭ شۋاقتى،
ەڭ شىرايلى،
ەڭ شەرلى!
ءار تاڭىڭدى سۇيىنشىلەپ تۇرايىن-
قۇداي بەرگەن عۇمىرىمدا ولشەۋلى!
قالقامان سارين
