قازاقستان رەسپۋبليكاسىنىڭ كاسىپوداقتار فەدەراسياسىندا ەلباسىنىڭ «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى كاسىپوداقتار بەلسەندىلەرىنىڭ ءماجىلىسى ءوتتى، دەپ حابارلايدى Baq.kz.
اتالعان شارا ەلباسىنىڭ قازاقستان حالقىنا جولداۋىن ىسكە اسىرۋ اياسىندا ءوتتى. نۇرسۇلتان نازاربايەۆ جاپپاي سيفرلاندىرۋ ءداۋىرىنىڭ يندۋسترياسىن قۇرۋ ءۇشىن يندۋستريالاندىرۋدىڭ ءۇشىنشى بەسجىلدىق جوسپارىن ازىرلەپ باستاۋدى تاپسىردى. مۇنداي وتپەلى كەزەڭدە ەڭبەك كولەمىنىڭ كەڭەيۋ ءقاۋپى بولۋى ىقتيمال.
«پرەزيدەنت ءوز جولداۋىندا ءبىزدىڭ الدىمىزدا تۇرعان قيىندىقتارعا توتەپ بەرۋدى تاپسىردى. دەسەك تە، ونەركاسىپتىك ريەۆوليۋسيا – بۇل جاڭا مۇمكىندىكتەر مەن تاۋەكەلدىلىكتى دە تالاپ ەتەدى. جولداۋ اياسىندا قابىلدانعان الەۋمەتتىك سالاداعى ماڭىزدى شەشىمدەر ادامي كاپيتالدى جەتىلدىرۋگە عانا كومەكتەسپەيدى، سونىمەن قاتار، تۇراقتى جانە جاپپاي الەۋمەتتىك-ەكونوميكالىق پروگرەسس نەگىزى بولىپ تابىلادى. ارينە، جاڭا تەحنولوگيالىق قۇرىلىم جۇمىس ورىندارىن وڭتايلاندىرۋدى كوزدەيدى. قىزمەتكەرلەرىمىزگە مۇنىڭ نە سەبەپتى ەكەنىن جانە جاڭا ماماندىقتار بويىنشا قايتا بىلىكتىلىگىن جوعارىلاتۋدىڭ جانە وزگەرۋ ۇردىسىندە بولۋدىڭ قانداي مۇمكىندىكتەرى بار ەكەنىن ءتۇسىنۋىمىز كەرەك»، - دەيدى قازاقستان رەسپۋبليكاسى كاسىپوداقتار فەدەراسياسىنىڭ ءتوراعاسى باقىتجان ءابدىرايىم.
سپيكەردىڭ پىكىرىنشە، تاۋەكەلدىك ايماقتا ناقتى تابىس اكەلمەيتىن كاسىپتەر دە بار. سونداي-اق، مەحانيكالىق قايتالاناتىن ۇدەرىستەرگە ۇشىراعان تومەن بىلىكتى جۇمىسشى ماماندىقتار بۇگىنگى كۇندە جوعالۋدا.
«ەستەرىڭىزدە بولسا، وسىدان 5-6 جىل بۇرىن استانادا حالىقارالىق كەلىسسوزدەر جۇرگىزەتىن ارنايى پۋنكت بولعان. ءقازىر ول جوق. بۇل دەگەنىمىز، كوپتەگەن ماماندىق جوعالىپ كەتىپ جاتقانىن ايتادى. ءتىپتى زاڭگەرلەر دە باعدارلامالاۋ فورماتىنا جۇگىنىپ وتىر. قۇقىقتىق سالادا تۋىندايتىن بارلىق ماسەلە 90% كومپيۋتەرلىك جۇيەگە اۋىسقان. قازىرگى تاڭدا، ادامزات بالاسى كوكەيىندە تۇرعان سۇراقتىڭ جاۋابىن ارنايى ءبىر وكىلگە بارماي، ۇيدە وتىرىپ، جاڭا تەحنولوگيادان ءبىلىپ وتىرادى»، - دەيدى باقىتجان ءابدىرايىم.
ال تانىمال ساياساتتانۋشى ەرلان سايروۆ سيفرلىق داۋىرگە بەيىمدەلۋدىڭ بارىسىندا ەلىمىزگە ءتيىمدى جاقتارىن اتاپ ءوتتى.
«قازىرگى تاڭدا، بايقاساڭىزدار ادامنىڭ ەڭبەگىن جاساندى روبوتتار جاساۋدا. ياعني ادام ەڭبەك ەتۋ مونوپولياسىنان ايىرىلىپ جاتىر. سوندىقتان بۇل جولداۋدىڭ نەگىزگى ماقساتى وسى دۇنيەنىڭ جاڭا كەلبەتىنەن قالىس قالماۋ بولىپ تابىلادى. مۇندا ەلباسىنىڭ ايتىپ وتىرعانى، ماسەلەن شەت ەلدەگى تەحنولوگيالاردى، اسىرەسە اۋىل شارۋاشىلىق سالاسىنداعى تەحنولوگيالاردى ەلگە اكەلىپ، قازاقستاندى دۇنيەجۇزىلىك حابىنا اينالدىرۋ. سەبەبى، ادامزات بالاسىنىڭ سانى كۇننەن كۇنگە وسكەندىكتەن، ازىق-تۇلىك جاعىنان تاپشى بولىپ وتىر. ال قازاقستاننىڭ جەرى قۇنارلى. سوندىقتان زاماناۋي تەحنيكالاردى ەگىستىك القابىنا جۇمىلدىرساق، الەمدىك ماسەلەنىڭ ءبىر شەشۋىن تاپتىق دەسەك، ارتىق ەتپەس»، - دەيدى ەرلان سايروۆ.
