دەموكراتيالىق كۇشتەردىڭ «قازاقستان-2050» جالپىۇلتتىق كواليسياسىنىڭ كەزەكتى وتىرىسى مەملەكەت باسشىسىنىڭ «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» جولداۋىنا ارنالدى.

جيىنعا ەلدەگى جەتەكشى پارتيالاردىڭ باسشىلارى، پارلامەنت دەپۋتاتتارى، قازاقستان حالقى اسسامبلەياسى جانە ءبىرقاتار قوعامدىق ۇيىمداردىڭ وكىلدەرى قاتىستى.  وتىرىستى اشقان «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد مەملەكەت باسشىسىنىڭ جىل سايىنعى جولداۋىن ەل  ومىرىندەگى باستى وقيعالاردىڭ ءبىرى دەپ اتاپ ءوتتى، دەپ جازادى Qamshy.kz اقپارات اگەنتتىگى قازاقپارات مالىمەتىنە سۇيەنىپ. 

«بۇكىلحالىقتىق تالقىلاۋعا ۇسىنىلىپ وتىرعان ەلباسىنىڭ بيىلعى جولداۋىن وسىعان دەيىنگى مەملەكەتتىك، ساياسي، الەۋمەتتىك، ەكونوميكالىق جانە رۋحاني جاڭعىرتۋعا باعىتتالعان اسا ۇلكەن باستامالاردىڭ زاڭدى جالعاسى دەپ ەسەپتەيمىن. جانە بۇل جولعى جولداۋ ءاربىر قازاقستاندىققا، ونىڭ ومىرىنە، ونىڭ دەنساۋلىعىنا، ءال-اۋقاتىنا دەگەن ەلباسىنىڭ ناقتى قامقورلىعىن ايقىن كورسەتىپ وتىرعان قۇجات. سوندىقتان سىزدەر مەن بىزدەردىڭ ەندىگى ماقساتىمىز وسى جولداۋدىڭ ءاربىر باستاماسىن، مازمۇنىن بارشا قازاقستاندىقتارعا جەتكىزۋ دەپ ەسەپتەيمىن»، - دەدى م. قۇل-مۇحاممەد بەيبىتشىلىك جانە كەلىسىم سارايىندا وتكەن دەموكراتيالىق كۇشتەردىڭ «قازاقستان-2050» جالپىۇلتتىق كواليسياسىنىڭ وتىرىسىندا.

ايتا كەتەيىك، دەموكراتيالىق كۇشتەردىڭ «قازاقستان-2050» جالپىۇلتتىق كواليسياسى «نۇر وتان» پارتياسىنىڭ باستاماسىمەن قۇرىلدى. ول 5 ساياسي پارتيانىڭ، 17 ءىرى قوعامدىق بىرلەستىكتىڭ جانە 500-دەن استام ۇكىمەتتىك ەمەس ۇيىمداردىڭ باسىن بىرىكتىرەدى.