ق ر سىرتقى ىستەر مينيسترلىگىنىڭ وكىلدەرى قىتايدا قايتىس بولعان 18 جاستاعى قىزدى زورلاۋ فاكتىسى راستالماعانىن ءمالىم ەتتى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

«قىز زورلاۋ فاكتىسى راستالمادى، الايدا زورلىق كورسەتۋگە دەگەن ۇمتىلىس بولعان. سوت-مەديسينالىق ساراپتامانىڭ قورىتىندىسى بويىنشا، قىز قۇلاۋدىڭ سالدارىنان مەرت بولعان»،- دەپ حابارلادى ق ر ءسىم-نىڭ باسپا ءسوز حاتشىسى ءانۋار جايناقوۆ.

ۆەدومستۆو وكىلدەرى سونىمەن قاتار قىتايدا 18 جاستاعى قىزدىڭ 14 قاباتتان قۇلاعان كەزىندە قاسىندا بولعان ەكى پاكىستان ازاماتى دا ۇستالعانىن ايتتى.

«وسى وقيعادان كەيىن جۇڭگو پوليسياسى تەرگەۋدى باستادى. پاكىستاننىڭ ەكى ازاماتى ۇستالدى. الدىن الا مالىمەتتەرگە سايكەس ولاردىڭ جاسى 26-30 ارالىعىندا. ولاردىڭ ستۋدەنت بولعان-بولماعانى ازىرگە بەلگىسىز. ولاردىڭ ءبىرى قاماۋدا وتىر، ال ەكىنشىسىنە تەرگەۋ اياقتالمايىنشا ەشقايدا كەتپەۋ بۇلتارتپاۋ شاراسى قولدانىلدى. تەرگەۋ ءجۇرىپ جاتىر. ەكىنشى قىز وقيعاعا قاتىستى تۇسىنىكتەمە بەرگەن، ءقازىر ول وقۋىن جالعاستىرۋدا»، - دەدى جايناقوۆ.

ءسىم وكىلى قازاقستاننىڭ شانحايداعى باس كونسۋلدىعىنىڭ ەرەكشە قاداعالاۋىندا ەكەندىگىن ايتادى. ديپلوماتيالىق ۆەدومستۆونىڭ مالىمەتىنشە، 1 جەلتوقسان كۇنى سۋدجوۋ ۋنيۆەرسيتەتتەرىنىڭ بىرىندە وقيتىن ون سەگىز جاستاعى قازاقستاندىق ستۋدەنت قىز قۇربىسىمەن بىرگە تانىسى پاكىستان ازاماتىنا قوناققا بارادى. ول جەردە ونىڭ دوسى دا بولعان. ءبىر كەزدە ماس كۇيدە ولار قىزدارعا جارماسا باستايدى. قىزدىڭ بىرەۋى جاسىرىنىپ قالادى، ال ەكىنشى قىز 14-قاباتتان قۇلاپ، مەرت بولعان.