الماتى وبلىسىنىڭ الاكول اۋدانىنداعى كولباي اۋىلىنىڭ اكىمى قاردى تراكتورمەن ءوزى تازالاپ ءجۇر. جەرگىلىكتى تۇرعىندار اۋىل باسشىسىنىڭ ەڭبەكقورلىعىنا ءتانتى بولىپ، ۆيدەوعا تۇسىرگەن، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ. 

ەرجان شاكەروۆ، ءسىز اكىم رەتىندە تراكتورعا وتىرىپ، قار تازالاعانىڭىزعا نامىستانبايسىز با؟

جوق، كەرىسىنشە. مەن وسى كولباي اۋىلىندا تۋعانمىن. كىندىك قانىم تامعان تۋعان اۋىلىمنىڭ حالقىنا قىزمەت ەتۋدەن ەشقاشان شارشامايمىن. قار تازالايتىن مەكەمەلەر ءبىزدىڭ اۋىلدىڭ ىشكى جولدارىن تولىقتاي بىلمەيدى. ال مەن تراكتورعا وتىرىپ الىپ، جالعىز ادام جۇرەتىن جولداردى دا تازالايمىن. ول جۇمىسىم ءۇشىن ەشۋاقىتتا نامىستانعان ەمەسپىن. كەرىسىنشە، حالقىما پايدامنىڭ تيگەنىنە ريزامىن. وسىدان ەكى كۇن بۇرىن عانا قاردى تازالاپ ەدىم، تاعى دا جاۋدى. ءقازىر تازالاپ جاتىرمىن — ، دەيدى كولباي اۋىلىنىڭ اكىمى ەرجان شاكەروۆ.

37 جاستاعى ەرجان شاكەروۆ بەس بالانىڭ اكەسى. ول ونەردەن دە كەندە ەمەس. ولەڭ جازىپ، ءان شىرقاپ، دومبىرانىڭ قۇلاعىندا وينايدى. ال ونىڭ كولباي اۋىلىنىڭ اكىمى بولعانىنا 1 جىل 2 اي بولىپتى.

ايتا كەتۋ كەرەك، ەرجان شاكەروۆ اۋىلعا ايرىقشا سىڭىرگەن ەڭبەگى ءۇشىن پرەزيدەنتتىڭ «قۇرمەت» گراموتاسىمەن ماراپاتتالعان بولاتىن. ول مۇنداي قۇرمەتكە 2017 جىلى تاۋەلسىزدىك مەرەكەسى قارساڭىندا بولەندى. الماتى وبلىسىنىڭ اكىمى ەرجان شاكەروۆكە ماراپاتتى سالتاناتتى شارا بارىسىندا تابىستادى.