بۇگىن ۇكىمەت ۇيىندە قازاقستان رەسپۋبليكاسى پرەمەر-مينيسترى باقىتجان ساعىنتايەۆتىڭ توراعالىعىمەن الەۋمەتتىك ارىپتەستىك پەن الەۋمەتتىك جانە ەڭبەك قاتىناستارىن رەتتەۋ جونىندەگى رەسپۋبليكالىق ءۇشجاقتى كوميسسيا وتىرىسى ءوتتى، دەپ جازادى Qamshy.kz اقپارات اگەنتتىگى.

كوميسسيا جۇمىسىنا ق ر كاسىپوداقتار فەدەراسياسىنىڭ، قازاقستان ەڭبەك كونفەدەراسياسىنىڭ، تاۋ-كەن ءوندىرۋ جانە تاۋ-كەن مەتاللۋرگيا كاسىپورىندارىنىڭ رەسپۋبليكالىق قاۋىمداستىعىنىڭ باسشىلارى، سونداي-اق سەلەكتور رەجيمىندە وبلىس اكىمدەرىنىڭ ورىنباسارلارى قاتىستى.

وتىرىس بارىسىندا مەملەكەتتىڭ الەۋمەتتىك-ەڭبەك ساياساتى جانە  «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» جولداۋىندا ق ر پرەزيدەنتى ن. نازاربايەۆ جۇكتەگەن مىندەتتەرگە سايكەس ەلىمىزدىڭ ازاماتتارى ءۇشىن لايىقتى ەڭبەك جاعدايلارىن جاساۋ ماسەلەلەرى تالقىلاندى.

وتىرىس بارىسىندا الەۋمەتتىك-ەڭبەك قاتىناستارىن رەتتەۋدىڭ نەگىزگى باعىتتارى بويىنشا تاراپتاردىڭ كەلىسىلگەن پوزيسيالارىن انىقتايتىن قازاقستان رەسپۋبليكاسى ۇكىمەتى، رەسپۋبليكالىق جۇمىسكەرلەر بىرلەستىكتەرى جانە رەسپۋبليكالىق جۇمىس بەرۋشىلەر بىرلەستىكتەرى اراسىندا 2018-2020 جىلدارعا ارنالعان باس كەلىسىمگە قول قويىلدى. باس كەلىسىم اياسىندا قابىلدانعان مىندەتتەمەلەردى ىسكە اسىرۋ بويىنشا ءىس-شارالار جوسپارى (جول كارتاسى) قارالدى جانە بەكىتىلدى.

قۇجاتقا الەۋمەتتىك ارىپتەستىك جانە الەۋمەتتىك-ەڭبەك قاتىناستارىن رەتتەۋ جونىندەگى رەسپۋبليكالىق ءۇشجاقتى كوميسسيانىڭ تاراپتارى قول قويدى: ۇكىمەتتەن – ق ر پرەمەر-مينيسترىنىڭ ورىنباسارى ە. دوسايەۆ، جۇمىسكەرلەر بىرلەستىكتەرىنەن – كاسىپوداقتار فەدەراسياسىنىڭ ءتوراعاسى ب. ءابدىرايىم جانە قازاقستان ەڭبەك كونفەدەراسياسىنىڭ باس حاتشىسى – م. ماشكەنوۆ، جۇمىس بەرۋشىلەر بىرلەستىكتەرىنەن – «اتامەكەن» ۇلتتىق كاسىپكەرلەر پالاتاسىنىڭ باسقارما ءتوراعاسى ا. مىرزاحمەتوۆ، جۇمىس بەرۋشىلەر كونفەدەراسياسىنىڭ باسقارما ءتوراعاسى ق. بايكەنوۆ، تاۋ-كەن ءوندىرۋ جانە تاۋ-كەن مەتاللۋرگيا كاسىپورىندارىنىڭ رەسپۋبليكالىق قاۋىمداستىعىنىڭ اتقارۋشى ديرەكتورى، قازاقستان تاۋار وندىرۋشىلەرى جانە ەكسپورتتاۋشىلار وداعىنىڭ پرەزيدەنتى ن. رادوستوۆەس.

2018-2020 جىلدارعا ارنالعان باس كەلىسىم ەكونوميكانى تەحنولوگيالىق جاڭعىرتۋ، بيزنەس ورتانى تۇبەگەيلى جاقسارتۋ، حالىقتى فورمالدى جانە ءونىمدى جۇمىسپەن قامتۋعا جاردەمدەسۋ، ادامي كاپيتال ساپاسىن، ەڭبەك جاعدايلارى مەن قورعاۋدى جاقسارتۋ، سونداي-اق ونەركاسىپتىك جانە ەكولوگيالىق قاۋىپسىزدىك ماسەلەلەرىنە قاتىستى بولدى.

انىقتاما:  ق ر ەڭبەك كودەكسىنىڭ 152 بابىنا سايكەس رەسپۋبليكالىق دەڭگەيدە قازاقستان رەسپۋبليكاسى ۇكىمەتى، رەسپۋبليكالىق جۇمىس بەرۋشىلەر بىرلەستىكتەرى جانە رەسپۋبليكالىق كاسىبي وداقتار بىرلەستىكتەرى اراسىندا باس كەلىسىم جاسالادى.

باس كەلىسىم ءار 3 جىل سايىن جاسالادى. 2017 جىلى 2015-2017 جىلدارعا ارنالعان باس كەلىسىمنىڭ مەرزىمى اياقتالدى.

2015-2017 جىلدارعا ارنالعان باس كەلىسىمدە قاراستىرىلعان شارالاردى ىسكە اسىرۋ ناتيجەسىندە جالپى الەۋمەتتىك-ەڭبەك قاتىناستارى سالاسىندا كورسەتكىشتەر جاقساردى. 

3 جىلدا ەلىمىزدىڭ كاسىپورىندارىندا وندىرىستىك جاراقاتتانۋ 1،4% ازايدى. ەلىمىزدىڭ ورتا جانە ءىرى كاسىپورىندارىندا ۇجىمدىق-شارتتىق قاتىناستارمەن قامتۋ 3،1% ارتتى.

ەلىمىزدىڭ 1 400 استام كاسىپورنى حالىقارالىق ەڭبەك ۇيىمدارى (OHSAS 18001، حەق-ەقبج) ۇسىنعان قاۋىپسىزدىك جانە ەڭبەكتى قورعاۋ بويىنشا ستاندارتتار ەنگىزدى.

12 مىڭنان استام وندىرىستىك كەڭەستەر قۇرىلدى، ولاردىڭ قۇرامىنا بارا-بارلىق نەگىزدە جۇمىس بەرۋشىلەر مەن جۇمىسكەرلەردىڭ وكىلدەرى كىرەدى.