قازاقستان رەسپۋبليكاسىنىڭ ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ بۇۇ تۇراقتى ۇيلەستىرۋشىسى، قازاقستانداعى بۇۇ دامۋ باعدارلاماسىنىڭ تۇراقتى وكىلى نوريماسا شيمومۋرا باستاعان دەلەگاسيامەن كەزدەستى، دەپ جازادى Qamshy.kz اقپارات اگەنتتىگى.
سونداي-اق، دەلەگاسيا قۇرامىندا قازاقستانداعى بۇۇ دامۋ باعدارلاماسى تۇراقتى وكىلىنىڭ ورىنباسارى مۋنحتۋيا التانگەرەل، ورتا ازيا بويىنشا بۇۇ ەرىكتىلەر باعدارلاماسىنىڭ ۇيلەستىرۋشىسى دميتريي فريششين، بۇۇ دامۋ باعدارلاماسى ءتيىمدى باسقارۋ دەپارتامەنتىنىڭ ديرەكتورى كونستانتين سوكۋلسكيي بولدى.
كەزدەسۋ بارىسىندا مينيستر بۇۇ دامۋ باعدارلاماسىمەن كونسترۋكتيۆتى ىنتىماقتاستىق ورناتۋدىڭ وزەكتىلىگىن، سونداي-اق تۇراقتى تۇردە وتكىزىلەتىن كەڭەستەر مەن بايلانىستاردىڭ ايرىقشا ماڭىزدىلىعىن اتاپ ءوتتى. بۇدان بولەك مينيستر ۆەدومستۆونىڭ ءدىن، ازاماتتىق قوعام سالاسىنداعى قىزمەتى، مەملەكەتتىك جاستار ساياساتىن ىسكە اسىرۋ بارىسى تۋرالى باياندادى.
تاراپتار بۇۇ دامۋ باعدارلاماسىنىڭ جاستار ساياساتى، ازاماتتىق قوعام جانە راديكالدىق ەكسترەميزمگە قارسى ءىس-قيمىل سالالارى بويىنشا قولعا العان جوبالارىن بىرلەسىپ ىسكە اسىرۋ ماسەلەلەرىن تالقىلادى.
قازاقستانداعى بۇۇ دامۋ باعدارلاماسىنىڭ تۇراقتى وكىلى نوريماسا شيمومۋرا كەزدەسۋگە قاتىسۋشىلاردى بۇۇ دامۋ باعدارلاماسىنىڭ «ورتا ازياداعى زورلىق-زومبىلىق باعىتتاعى ەكسترەميزمنىڭ الدىن الۋ ماقساتىندا جەرگىلىكتى قاۋىمداستىقتاردىڭ تۇراقتىلىعىن نىعايتۋ مەن ترانسشەكارالىق ىنتىماقتاستىق» جانە «ادام كاپيتالىن دامىتۋ ءۇشىن تۇرعىنداردى ۆولونتەرلىك قىزمەتكە تارتۋ جانە ازاماتتىق قاتىسۋدى نىعايتۋ» جوبالارىنىڭ مىندەتتەرى مەن ىسكە اسىرۋ تەتىكتەرى تۋرالى ايتىپ بەردى.
ىنتىماقتاستىقتىڭ پەرسپەكتيۆالىق باعىتتارىن تالقىلاعاننان كەيىن تاراپتار جاستار اراسىنداعى ەكسترەميزمنىڭ الدىن الۋ، سونداي-اق حالىقتى ۆولونتەرلىك قىزمەتكە تارتۋ ماسەلەلەرىن شەشۋ جولىندا تىعىز ىنتىماقتاستىق ورناتۋعا دايىن ەكەندىكتەرىن ءبىلدىردى.
پىكىر قالدىرۋ