اقش-تىڭ اركانزاس شتاتىندا جاس وتباسى قىزدارىن ەگەۋقۇيرىقتان قورعاماعانى ءۇشىن اباقتىعا جابىلدى، دەپ جازادى Qamshy.kz اقپارات اگەنتتىگى شەتەلدىك باق-قا سىلتەمە جاساپ.

دەرەكتەردە كورسەتىلگەندەي، 2017 جىلدىڭ كوكتەمىندە 19 جاستاعى ەريكا شريوك پەن 18 جاستاعى چارلز ەليوت جارتىلاي قيراپ قالعان ۇيدە تۇرعان، 14 مامىردا ەكى اپتالىق قىزدارىن قانسىراپ جاتقانىن كورگەن. كىشكەنتاي ءسابيدى ەگەۋقۇيرىقتار تىستەپ تاستاعاندىعى بەلگىلى بولعان. ەگەۋقۇيرىقتار ءسابيدىڭ ماڭدايىنان قاتتى تىستەپ العاندىقتان وعان وتا جاساۋعا تۋرا كەلگەن.

سابيگە ەگەۋقۇيرىقتاردىڭ شابۋىل جاساعانى تەكسەرىس بارىسىندا بەلگىلى بولعان. ونىڭ اتا-اناسىن سالعىرتتىق تانىتىپ، بالالارىن مۇنداي قاتەردەن قورعاي الماعانى ءۇشىن ايىپتاپ، قاماۋعا الىنعان. ءسابيدىڭ دەنەسىندە جۇزدەن اسا جاراقات بەلگىلەرى بولعان. مامانداردىڭ ايتۋىنشا، ءسابيدىڭ دەنەسىندەگى جاراقات ىزدەرىنە قاراپ، ەگەۋقۇيرىقتار ونى ۇزاق ۋاقىت بويى تالاعانىن بىلۋگە بولادى. ال اتا-اناسى بۇل ۋاقىتتا قايدا بولدى، نە ىستەدى؟ سونىمەن قاتار، ءسابيدىڭ اناسى دا، اكەسى دە ەسىرتكى پايدالانعاندارى بەلگىلى بولدى.

ەريكا شريوك پەن چارلز ەليوتتى ءسابيدىڭ ومىرىنە ءقاۋىپ ءتوندىردى دەپ ايىپتاپ، بەس جىلعا باس بوستاندىعىنان ايىرۋعا ۇكىم شىعارىلدى. ال ءسابيدى باسقا وتباسى اسىراپ العان.