اقش گەنەرالى پول سەلۆا اقش-تىڭ  رەسەيمەن جانە قىتايمەن بولۋى مۇمكىن سوعىستىڭ سەنارييىن اتادى، دەپ جازادى Qamshy.kz اقپارات اگەنتتىگى.

جاقىندا اقش، رەسەي جانە جۇڭگو اراسىنداعى باسەكەنى مويىندايتىن ستراتەگيا حالىقارالىق قاتىناستاردا ۇستەمدىك ەتەدى. سول سەبەپتى پەنتاگون ماسكەۋمەن جانە بەيجىڭمەن بولۋى مۇمكىن جانجالدىڭ سەنارييىن قۇراستىرىپ جاتىر.

«سوڭعى ون جىلدا الەم جۇرتشىلىعى قىتايدىڭ دۇنيە جۇزىنە، ال رەسەيدىڭ ازيا مەن ەۋروپاعا تيگىزىپ جاتقان ىقپالىن باقىلاۋمەن كەلەدى. اقش ەكى ەلمەن دە قاقتىعىسقا تۇسكەن»، - دەدى پول سەلۆا.

ونىڭ ايتۋىنشا، ەگەر بۇل مەملەكەتتەر اراسىندا ەشقانداي جانجال بولماسا، الەمدى «قالىپتى ساۋدا» بيلەيتىن ەدى، الايدا ءقازىر جاعداي ۋشىعىپ تۇر. گەنەرال 2018 جىلى رەسەيدىڭ گرۋزيادان ەكى ايماقتى تارتىپ العانىن، 2014 جىلى قىرىمدى اننەكسيالاعانىن جانە سيريا پرەزيدەنتى باشار اساد رەجيمىن قولداۋدى جالعاستىرىپ كەلە جاتقانىن ەسكە سالدى.

ال جۇڭگو وڭتۇستىك جۇڭگو تەڭىزىندە جاساندى ارال سالىپ، تەرريتوريالىق تالابىن كۇشەيتىپ وتىر.

«رەسەي، جۇڭگو جانە اقش اراسىندا بۇعان دەيىن دە قاقتىعىس بولعان، ءالى جالعاساتىنى انىق. ۇلى دەرجاۆالاردىڭ بۇل كيكىلجىڭى الەم ەكونوميكاسىنداعى بىرىنشىلىك ءۇشىن تالاستان تۋعان»، - دەدى سەلۆا.

اقش گەنەرالىنىڭ پىكىرىنشە، ۇلى دەرجاۆالاردىڭ كۇرەسى ءالى ءبىرتالاي جىلعا سوزىلۋى عاجاپ ەمەس. ول اقش پەن رەسەي سوعىسقان جاعدايدا ەكى جاق تا بارلىق كۇشىن جۇمىلدىراتىنىن ايتتى.

«رەسەيمەن جەردە دە، اۋەدە دە سوعىسۋىمىز مۇمكىن. الايدا اسكەري-تەڭىز كۇشتەرى ماڭىزدى ءرول وينايدى. سەبەبى رەسەي مەن ەۋروپاعا ۇلكەن كۇشتەردى تەك سولتۇستىك اتلانت اعىسى ارقىلى عانا جىبەرۋگە بولادى. الايدا شايقاستىڭ كوبى جەر بەتىندە جۇرەدى»، - دەپ ءتۇسىندىردى گەنەرال سوعىس سەنارييىن.

بىرنەشە كۇن بۇرىن پەنتاگون قابىلداعان ستراتەگياعا سايكەس، اقش جۇڭگو مەن رەسەيدى باستى قارسىلاستارى دەپ تانىعان، تەك ەكى ەلمەن ءبىر ۋاقىتتا سوعىس جۇرگىزۋگە ەلدىڭ رەسۋرس قورى جەتپەيدى.

بىلتىر تامىز ايىندا امەريكالىق National Interest جۋرنالى دەرجاۆالار اراسىنداعى جاھاندىق قاقتىعىستىڭ تاعى ءبىر نۇسقاسىن كەلتىرگەن. باسىلىم  رەسەيمەن جانە قىتايمەن سوعىسسا، اقش-تىڭ ءتۇبى جەڭىسكە جەتەتىنىن جازعان. كەم دەگەندە، جەڭىسكە ءبىر تابان جاقىندايدى.

«بۇل فاكت رەسەي مەن قىتايدىڭ ساياسي ويىندارعا دەگەن قۇمارلىعىن تىزگىندەيدى. امەريكانىڭ اسكەري قۋاتى وراسان جانە ول تاريحتاعى ەڭ مىقتى اسكەري وداقتى باسقارىپ وتىر. ماسكەۋ مەن بەيجىڭنىڭ قولىنان كەلەتىنى – ۇسا-تۇيەك ماسەلە تۋدىرۋ عانا، امەريكا ول قيىندىقتاردى ازعانتاي اكتيۆ ءبولىپ شەشە سالادى»، - دەلىنگەن امەريكالىق باسىلىم تاراتقان اقپاراتتا.