ساحنانىڭ سانىنە اينالعان تانىمال تۇلعالاردىڭ اراسىندا كوپبالالى اتا-انا بارشىلىق. شۇكىر دەيمىز. ولاردى ۇلگى تۇتاتىن جاستار دا جەتەرلىك. Qamshy.kz اقپارات اگەنتتىگى حالىق سانىن ارتتىرۋعا ۇلەس قوسىپ جۇرگەن جۇلدىزدى وتباسىلاردى نازارلارىڭىزعا ۇسىنادى.

ءانشى، پروديۋسەر ءقىدىرالى بولمانوۆ پەن ونىڭ تانىمال جارى قاراقات ءابىلدينا جۇلدىزدى شاڭىراقتارىندا 5 بالا تاربيەلەپ وتىر. بىلتىر قاراقات ءتورت ۇلدان سوڭ وزىنە تارتقان قاراقات كوزدى ايالا ەسىمدى قىزدى دۇنيەگە اكەلدى. كوپتەن كۇتكەن حانشايىمدى ءقىدىرالى بولمانوۆ پەرزەنتحانادان سان-سالتاناتپەن شىعارىپ الدى.

ال وتكىر ازىلدەرىمەن قوعامداعى شىندىقتى ايتۋدان شارشامايتىن تۇرسىنبەك قاباتوۆقا جارى ءمولدىر ءۇش قىزدان كەيىن ءبىر ۇل سىيلادى. وتباسىداعى ەكىنشى بالا ايىم تۇرسىنبەك قىزى ەكسپو-2017 حالىقارالىق كورمەسىنىڭ جابىلۋ سالتاناتىندا ەلباسى نۇرسۇلتان ابىشۇلىمەن بىرگە كوپشىلىك الدىنا شىققان بولاتىن.

«سەن سىيعا تارتقان ورامال» دەپ ءان سالاتىن اق ورامالدى روزا ءالقوجا كوپبالالى انالاردىڭ كوشىن باستاپ تۇر. «ولەڭىنەن اجىراماس ايەلمىن، بالاسىنىڭ بۇتىن جۋىپ جاتىپ تا»، - دەپ جىرلايتىن اقىن ءارى ءانشى – بەس بالانىڭ اناسى، ونەر مەن وتباسى تىزگىنىن تەڭ ۇستاعان ادام. وتاعاسى – جۋرناليست ايدىن قابا. ول ەكەۋى ءۇش ۇل، ەكى قىز تاربيەلەپ وتىر.

كورەرمەندى كۇلكىگە قارىق قىلاتىن «الداراسپان» ءازىل-سىقاق تەاترىنىڭ اكتەرى، تۇركىستان قالاسىنىڭ قۇرمەتتى ازاماتى نۇرجان تولەندييەۆ – التى بالانىڭ اكەسى. نۇرجاننىڭ ۇلكەن ۇلى راۋان تەمىرحان بۇگىندە اكەسىمەن بىرگە ساحناعا شىعىپ ءجۇر.

ءانشى قايرات نۇرتاس پەن اكتريسا جۇلدىز ابدىكارىموۆانىڭ وتباسىندا ەكى ۇل، ەكى قىز بار. «ارمان. كوگدا ۆسە انگەلى سپيات» فيلمىندە جۇلدىزدى جۇپ باستى رولدەردى سومداعان. جارىن 10 جىلدان كەيىن حالىققا تانىستىرعان ءانشى «بالالارىمدى كورۋ ءۇشىن تاعى 10 جىل كۇتىڭىزدەر»، - دەپ ازىلدەپ قويادى.

ال وتاندىق ءان بايقاۋلارى ارقىلى ءدۇيىم جۇرتقا تانىلعان دينارا سۇلتان – ءۇش قىز بەن ءبىر ۇلدىڭ اناسى. جەلىگە سۇلۋ قىزدارى مەن سۇيكىمدى ۇلىنىڭ سۋرەتىن جۇكتەۋدەن ەش جالىقپايتىن ءانشى جولداسىنىڭ جۇمىس بابىنا بايلانىستى بەس جىل دۋبايدا تۇرعان. جات ەلدە ءجۇرىپ تۋعان جەرىن ساعىنعان ءانشى شىعارماشىلىققا بىلەك سىبانىپ كىرىسەتىنى انىق.

ق ر ەڭبەك سىڭىرگەن قايراتكەرى، «دارىن» مەملەكەتتىك سىيلىعىنىڭ لاۋرەاتى، تولە بي اۋدانىنىڭ قۇرمەتتى ازاماتى، ءانشى التىناي جورابايەۆا حالىققا ونەرىمەن عانا ەمەس، ومىرىمەن دە تانىلعان جۇلدىزداردىڭ تىزىمىندە. كوپبالالى انا بۇگىندە ءتورت قىز تاربيەلەپ وتىر. استانانىڭ 20 جىلدىق مەرەيتويىنا ارنالعان كونسەرتتە ەلباسى نۇرسۇلتان نازاربايەۆ ءانشىنىڭ قولىن الىپ، تىلەگىن ايتقان بولاتىن.  

ءانشى ينديرا راسىلحان دا ارىپتەستەرىنەن قالىسقان جوق. ءتورت بالانىڭ اناسى ونەردە ءوز ورنىن تاپقان. ايدينا، دارينا ەسىمدى ەگىز قىزدارى مەن اسلان اتتى ۇلى ەسەيىپ قالعان. ءسۇت كەنجەسى رايانا بيىل 5 جاستا.

وزگەنىڭ ءومىرىن تالقىلاۋدان اۋلاقپىز. تەك ۇلگى بولارلىق تۇستارىن اشىپ ايتقاندى ءجون سانادىق!