ەلباسى رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ءتوراعاسى نۇرمۇحامبەت ابدىبەكوۆتى قابىلدادى، دەپ جازادى Qamshy.kz اقپارات اگەنتتىگى اقوردا بەرگەن مالىمەتكە سۇيەنىپ.

كەزدەسۋ بارىسىندا ن.ابدىبەكوۆ نۇرسۇلتان نازاربايەۆقا ەسەپ كوميتەتىنىڭ 2017 جىلعى جۇمىسىنىڭ نەگىزگى ناتيجەلەرى مەن الداعى كەزەڭدەگى مىندەتتەرى جونىندە باياندادى.

وتكەن جىلدىڭ قورىتىندىسى بويىنشا بۇل ورگان 354 نىسانعا 25 تەكسەرۋ جۇرگىزگەن. اۋديتورلىق ءىس-شارالار ناتيجەسىندە قايتارىلۋعا ءتيىستى 307،3 ميلليارد تەڭگەنىڭ 198،5 ميللياردى وتەلگەنىن مالىمدەدى.

نۇرسۇلتان نازاربايەۆ ەسەپ كوميتەتىنە «مەملەكەتتىك اۋديت جانە قارجىلىق باقىلاۋ تۋرالى» زاڭ نورمالارىنىڭ جۇزەگە اسىرىلۋىن قامتاماسىز ەتۋدى تاپسىردى.

سونىمەن قاتار قازاقستان پرەزيدەنتى بيۋدجەت قاراجاتىن ءتيىمدى پايدالانۋ ىسىنە ەسەپ كوميتەتى تاراپىنان نەعۇرلىم مۇقيات باعالاۋ جۇرگىزۋدىڭ ماڭىزدىلىعىنا توقتالىپ، زاڭ بۇزۋشىلىققا جول بەرمەۋ ءۇشىن جۇيەلى شارالار قاراستىرۋ كەرەك ەكەنىن ايتتى.

مەملەكەت باسشىسى ەسەپ كوميتەتىنىڭ وڭىردەگى تەكسەرۋ كوميسسيالارىنىڭ جۇمىسىن ۇيلەستىرۋدە، سونداي-اق ولاردىڭ قىزمەتىن جاقسارتۋ جونىندەگى ادىستەمەلىك جانە تاجىريبەلىك ۇسىنىمداردى ازىرلەۋ ىسىندە ماڭىزدى ءرول اتقاراتىنىن اتاپ ءوتتى.

كەزدەسۋ سوڭىندا نۇرسۇلتان نازاربايەۆ مەملەكەتتىك اۋديت جانە قارجىلىق باقىلاۋ ورگاندارىنىڭ قىزمەتىن بۇعان دەيىن قابىلدانعان نورماتيۆتىك قۇقىقتىق اكتىلەرگە جانە مەملەكەتتىك باعدارلامالارعا سايكەس جەتىلدىرۋ جونىندە ءبىرقاتار ناقتى تاپسىرما بەردى.