بۇل تۋرالى «اتامەكەن» ق ر ۇكپ باسقارما ءتوراعاسى ابىلاي مىرزاحمەتوۆ ق ر ۇكىمەتىنىڭ وتىرىسىندا حابارلادى، دەپ جازادى Qamshy.kz اقپارات اگەنتتىگى.

«سيفرلاندىرۋ اياسىندا 1 ساۋىرگە دەيىن كاسىپكەرلەرگە قىزمەت كورسەتۋ ورتالىقتارى مەن كاسىپكەرلىكتى قولداۋ ورتالىقتارىنىڭ فورماتىن تۇتاستاي وزگەرتۋ ءۇشىن ۇسىنىس دايىندايمىز. ونلاين-بايلانىسقا وتۋگە باسىمدىق بەرەمىز. بيىل پروسەستەردى اياقتاپ، كەلەسى جىلدان باستاپ وتەمىز دەپ ويلايمىن»، – دەپ حابارلادى ابىلاي مىرزاحمەتوۆ.

بىلتىر «بيزنەستىڭ جول كارتاسى – 2020» باعدارلاماسى اياسىندا «اتامەكەن» ق ر ۇكپ اتىنان 51 مىڭنان اسا كاسىپكەر سەرۆيستىك قىزمەت الدى، 113 مىڭ ادامعا كونسۋلتاسيالىق قولداۋ كورسەتىلدى، 22 مىڭنان اسا ازامات بيزنەس نەگىزدەرىنەن ءبىلىم الدى. بارلىق كورسەتكىش 105%-دان 170%-عا دەيىن ورىندالدى.

«ىسكەرلىك بايلانىس» – قولداۋ شارالارىنىڭ كەڭ تارالاعان ءتۇرى. 555 ادام وقىدى، 43 ادام گەرمانيادا تاعىلىمنامادان ءوتتى. مۇنداعى كورسەتكىش تە اسىرا ورىندالدى. ءبىز بارلىق جوبانى سۇيەمەلدەيمىز. سەرۆيستىك قىزمەت العان كاسىپكەرلەردىڭ 3403ء-ى جاڭا كاسىپورىن اشتى، 1،5 مىڭنان استامى رۇقسات قۇجاتتارىن الدى، ال 4625 كاسىپورىننىڭ جوبالارى سۇيەمەلدەندى. «بيزنەس مەكتەپ» بويىنشا: 22 مىڭ قاتىسۋشىدان 2708ء-ى بيزنەس اشتى. 2 مىڭنان استامى جۇمىس ىستەپ تۇرعان بيزنەسىن سەرۆيستىك قولداۋ ارقىلى كەڭەيتتى»، – دەپ اتاپ ءوتتى ابىلاي مىرزاحمەتوۆ.

«اتامەكەننىڭ» مالىمەتىنشە، بيزنەس ءۇشىن ەڭ تانىمالى بۋحگالتەرلىك، سالىق جانە زاڭ سالاسىنداعى سەرۆيستىك قىزمەتتەر. جالپى، كاسىپكەرلەردىڭ سۇرانىسىنا قاراي ءتىزىم ۇلعايا بەرەدى.

ەسكە سالساق، «اتامەكەن» ق ر ۇكپ – «بيزنەستىڭ جول كارتاسى –2020» ءبىرىڭعاي قولداۋ باعدارلاماسى اياسىندا كاسىپكەرلەرگە قارجىلاي ەمەس قولداۋ كورسەتۋ وپەراتورى. سەرۆيستىك قولداۋ رەسپۋبليكا بويىنشا كاسىپكەرلەرگە قىزمەت كورسەتۋ ورتالىقتارى مەن كاسىپكەرلىكتى قولداۋ ورتالىقتارىندا كورسەتىلەدى. ول تيىمدىلىكتى ارتتىرۋ ماقساتىندا كاسىپورىنداردى باسقارۋ جۇيەسىن جەتىلدىرۋگە باعىتتالعان جانە شاعىن جانە ورتا بيزنەس سۋبەكتىلەرىنە ارنايى قىزمەت پەن كەڭەس بەرۋدەن تۇرادى.