قازاقستاننىڭ بيزنەس قوعامداستىعىنىڭ وكىلدەرى اعىمداعى جىلى ساۋىردە دۋباي قالاسىندا وتەتىن Annual Investment Meeting ينۆەستيسيالىق فورۋمىنا قاتىسادى. بۇل تۋرالى «Kazakh Invest» باسقارما ءتوراعاسى ساپاربەك تۇياقبايەۆ جانە قر-داعى ءباا ەلشىسى موحامماد احماد الدجابەردىڭ استاناداعى كەزدەسۋى بارىسىندا بەلگىلى بولدى، دەپ حابارلايدى Qamshy.kz اقپارات اگەنتتىگى.

دۋباي ق. ءساۋىر ايىنداعى فورۋم كەزىندە قازاقستاننىڭ ينۆەستيسيالىق مۇمكىندىكتەرىنىڭ پرەزەنتاسياسى جاسالىپ، قر-عا ينۆەستيسيا سالۋعا مۇددەلى امىرلىك كومپانيالارمەن بىرنەشە ەكى جاقتى كەزدەسۋلەر وتەدى.  

ءوز كەزەگىندە، بۇگىن استانادا «Kazakh Invest» تاراپىنان الدىن الا بىرىككەن اراب امىرلىكتەرى بيزنەسمەندەرىنىڭ ودان ءارى زەردەلەۋى ءۇشىن جالپى سوماسى شامامەن 20 ملرد. اقش دوللارىن قۇرايتىن 20 نەگىزگى جوبالار بويىنشا ينۆەستيسيالىق ۇسىنىستار بەرىلدى.

سونداي-اق تاراپتار كەزدەسۋدە ەلدەر اراسىنداعى ينۆەستيسيالىق ىنتىماقتاستىقتى جانداندىرۋ بويىنشا ودان ارعى ناقتى قادامداردى بەلگىلەدى، لوگيستيكا، تۋريستىك كلاستەر، اوك جانە باسقا سالاداعى بىرلەسكەن جوبالاردى ىسكە اسىرۋ مۇمكىندىكتەرى تالقىلاندى.

«ءبىز اوك جوبالارىنا، اتاپ ايتقاندا ورگانيكالىق وندىرىسكە، سونداي-اق قازاقستاننىڭ لوگيستيكالىق جوبالارىنا ينۆەستيسيا سالۋعا  دايىنبىز»، - دەپ ەرەكشە اتاپ ءوتتى، قر-داعى ءباا ەلشىسى موحامماد احماد الدجابەر.

 «Al Khaleej Sugar»  كومپانياسى  وڭتۇستىك قازاقستان وبلىسىنىڭ شاردارا ۋدانىندا ءىرى قانت زاۋىتى قۇرىلىسى بويىنشا ينۆەستيسيالىق جوبانى ىسكە اسىرۋعا قىزىعۋشىلىق بىلدىرۋدە. الدىن الا ەسەپ بويىنشا زاۋىتتىڭ قۇرىلىسىنا 375 ملن. اقش دوللارىن جۇمساۋ جوسپارلانۋدا.

كەزدەسۋ قورىتىندىلارى بويىنشا «Kazakh Invest» باسقارما ءتوراعاسى ساپاربەك تۇياقبايەۆ جانە قر-داعى ءباا ەلشىسى موحامماد احماد الدجابەر  ۇكىمەتارالىق دەڭگەيدە ينۆەستيسيالار تۋرالى كەلىسىم جاساسۋ مۇمكىندىگىن قاراستىرۋعا دايىن ەكەندىگىن ايتتى.

سونىمەن قاتار، قىسقا مەرزىمدە بىرلەسكەن جول ينۆەستيسيالىق كارتاسىن ازىرلەۋ جانە تۇراقتى نەگىزدە كەزدەسۋلەر وتكىزۋ تۋرالى شەشىم قابىلداندى. ءسويتىپ، كەلەسى بىرلەسكەن ءىس-شارانى وتكىزۋ اقپاننىڭ سوڭىنا جوسپارلاندى.