نەسليحان شاشىن شايناۋدى، بۇعان قوسا شايناعان ساعىزدارىن جۇتۋدى ادەتكە اينالدىرعان. تۇركياداعى كونيا قالاسىنىڭ 12 جاستاعى تۇرعىنى نەسليحان كاراكوچ ءۇش جىل بويى ءىشىنىڭ اۋىراتىنىن ايتىپ شاعىمدانعان، دەپ Qamshy.kz اقپارات اگەنتتىگى 24.kz سۇيەنىپ جازادى. 

الايدا سوڭعى كەزدە قىزدىڭ اۋرۋى اسقىنىپ، اتا-اناسى ونى دارىگەرگە اپارۋعا تۋرا كەلگەن. 

جەرگىلىكتى اۋرۋحانانىڭ حيرۋرگى بيۋلەنت ەرەنوگلۋ 12 جاستاعى قىزدى قاراپ، قارىن بولىگىنىڭ نىعىزداپ قاتايعانىن بايقايدى. توموگرافيا ءتۇسىرىلىپ، كەيىن قىزعا وپەراسيا جاسالادى. 

ونىڭ اسقازانىنان 2 كەلى 800 گرامم بولاتىن شاش پەن ساعىزدان قۇرالعان ماسسا شىققان. ال بالانىڭ ىشىنەن شىققان كەسەكتىڭ ديامەترى 20 سانتيمەتردى قۇراعان. 

نەسليحان ءوزىنىڭ شاشىن شايناۋدى، بۇعان قوسا شايناعان ساعىزدارىن جۇتۋدى ادەتكە اينالدىرىپ كەلگەن ەكەن.

"ول 50-گە جۋىق ساعىز جۇتقان، سونىڭ سالدارىنان اسقازانىنداعى جۇتقان شاشتارى قاتتى ماسساعا اينالا بەرگەن. نەسليحان ءىشىنىڭ قاتۋىنا، قارنىنىڭ اۋرۋىنا جانە ناشار تابەتىنە شاعىمدانعان. ال نەگىزى شاشتى جەۋ — ول اۋرۋ. ونى مەديسينادا تريحوتيللومانيا دەپ اتايدى"، – دەيدى بيۋلەنت ەرەنوگلۋ.