مەملەكەت باسشىسىنىڭ جارلىعىمەن ءمادينا ەراسىل قىزى ءابىلقاسىموۆا قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى قىزمەتىنە تاعايىندالدى، دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.

سونىمەن قاتار، پرەزيدەنت سايتىندا مەملەكەت باسشىسىنىڭ جارلىعىمەن تامارا دۇيسەنوۆانىڭ قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى قىزمەتىنەن بوساتىلعانى جايىندا حابارلاندى.

ءمادينا ەراسىل قىزى 1978 جىلى 1 تامىزدا تۋعان. 1999 جىلى قازاق مەملەكەتتىك باسقارۋ اكادەمياسىن «حالىقارالىق ەكونوميكالىق قاتىناستار» ماماندىعى بويىنشا بىتىرگەن. 2002 جىلى كولۋمبيا ۋنيۆەرسيتەتىن حالىقارالىق قاتىناستار ماگيسترى دارەجەسىمەن «ەكونوميكالىق ساياساتتى باسقارۋ» ماماندىعى بويىنشا بىتىرگەن. 2011 جىلى گارۆارد ۋنيۆەرسيتەتىنىڭ كەننەدي اتىنداعى مەملەكەتتىك باسقارۋ مەكتەبىن «مەملەكەتتىك باسقارۋ ماگيسترى» ماماندىعى بويىنشا بىتىرگەن.

ەڭبەك جولىن 1999 جىلدان 2001 جىلعا دەيىن - قازاقستان رەسپۋبليكاسىنىڭ ستراتەگيالىق جوسپارلاۋ اگەنتتىگىنىڭ باس مامانى بولىپ باستاعان.

2003 جىلدان 2004 جىلعا دەيىن - قازاقستان رەسپۋبليكاسىنىڭ ەكونوميكا جانە بيۋدجەتتىك جوسپارلاۋ مينيسترلىگىنىڭ ستراتەگيالىق جوسپارلاۋ باسقارماسىنىڭ باستىعى.

2004 جىلدان 2006 جىلعا دەيىن - «ماركەتينگتىك-تالدامالىق زەرتتەۋلەر ورتالىعى» اق مەملەكەتتىك ساياساتتى تالداۋ دەپارتامەنتىنىڭ ديرەكتورى.

2006 جىلعى اقپاننان 2008 جىلعى ناۋرىزعا دەيىن - قازاقستان رەسپۋبليكاسىنىڭ پرەمەر-مينيسترى كەڭسەسىنىڭ الەۋمەتتىك-ەكونوميكالىق ءبولىم مەڭگەرۋشىسىنىڭ ورىنباسارى.

2008 جىلعى ناۋرىزدان 2011 جىلعى قىركۇيەككە دەيىن - قازاقستان رەسپۋبليكاسىنىڭ پرەزيدەنت اكىمشىلىگىنىڭ ستراتەگيالىق ازىرلەمەلەر جانە تالداۋ ورتالىعى مەڭگەرۋشىسىنىڭ ورىنباسارى.

2011 جىلعى قىركۇيەكتەن 2013 جىلعى اقپانعا دەيىن - قازاقستان رەسپۋبليكاسىنىڭ ەكونوميكالىق دامۋ جانە ساۋدا ۆيسە-مينيسترى.

2012 جىلدان باستاپ دۇنيەجۇزىلىك بانكتىڭ قازاقستانداعى باسقارۋشىسىنىڭ ورىنباسارى

2013 جىلعى اقپاننان 2014 جىلعى تامىزعا دەيىن - قازاقستان رەسپۋبليكاسىنىڭ ەكونوميكا جانە بيۋدجەتتىك جوسپارلاۋ ۆيسە-مينيسترى.

تاعايىنداۋعا دەيىن 2014 جىلدىڭ تامىزىنان باستاپ قازاقستان رەسپۋبليكاسى ۇلتتىق ەكونوميكا ۆيسە-مينيسترى قىزمەتىن اتقاردى.

«استانانىڭ 10 جىلدىعى»، «قازاقستان رەسپۋبليكاسىنىڭ تاۋەلسىزدىگىنە 20 جىل»، «ەرەن ەڭبەگى ءۇشىن»، «قازاقستان حالقى اسسامبلەياسىنا 20 جىل»، ءىى دارەجەلى «ەۋرازيالىق ەكونوميكالىق وداعىن قۇرۋعا قوسقان ۇلەسى ءۇشىن»، «ق ر تاۋەلسىزدىگىنە 25 جىل» مەدالدارىمەن ماراپاتتالعان.

ەستەرىڭىزگە سالا كەتسەك، بۇگىن ق ر پرەزيدەنتى نۇرسۇلتان نازاربايەۆ تامارا دۇيسەنوۆاعا مىندەتتى الەۋمەتتىك مەديسينالىق ساقتاندىرۋدى ەنگىزۋدى ماسەلەسىنە قاتىستى سىن ايتقان بولاتىن.