ەلباسى وبلىستاردىڭ، استانا جانە الماتى قالالارىنىڭ اكىمدەرىمەن كەڭەس وتكىزدى، دەپ جازادى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.

مەملەكەت باسشىسى جيىن بارىسىندا وبلىستار مەن رەسپۋبليكالىق ماڭىزى بار قالالاردىڭ اكىمدەرىنە ازىق-تۇلىك باعاسىنىڭ تۇراقتىلىعىن باقىلاۋ جانە تاريفتەردى رەتتەۋ ماسەلەسىن نازاردا ۇستاۋ قاجەتتىگىن ايتتى.

نۇرسۇلتان نازاربايەۆ وبلىستاردا جىلىتۋ ماۋسىمىن ىركىلىسسىز جۇرگىزۋدىڭ ماڭىزدىلىعىن اتاپ ءوتتى.

سونداي-اق، قازاقستان پرەزيدەنتى ۇكىمەتكە وبلىستار اكىمدەرىمەن بىرلەسىپ، كوكتەمدەگى سۋ تاسقىنى ءقاۋپىنىڭ الدىن الۋ جانە ونى بولدىرماۋ جونىندە شارالار قابىلداۋدى تاپسىردى.

مەملەكەت باسشىسى ەرىگەن قاردىڭ سۋىن توعاندارعا جيناپ، ولاردى اۋىل شارۋاشىلىعى قاجەتتىلىگىنە پايدالانۋ مۇمكىندىكتەرىن قاراستىرۋدى ۇسىندى.

– حالىق سانى ەكى مىڭنان اساتىن اۋىلدىق ەلدى مەكەندەردە جەرگىلىكتى ءوزىن-وزى باسقارۋ جۇيەسى ەنگىزىلەتىن بولادى. بۇل – بيۋدجەتتىڭ ءتورتىنشى دەڭگەيى. جەرگىلىكتى جەرلەرگە سالىقتىڭ 7 ءتۇرىن جيناۋ مۇمكىندىگى بەرىلدى، سونداي-اق قاراجات شىعىسى 19 باعىت بويىنشا جۇزەگە اسىرىلادى. الدىن الا جاسالعان تالداۋ بويىنشا، اۋىلدىق وكرۋگتەردىڭ 11 پايىزى عانا وزدەرىن قامتاماسىز ەتىپ، ءوز كىرىسى ەسەبىنەن شىعىندارىن جابا الادى. سوندىقتان ۇكىمەت وبلىستار باسشىلارىمەن بىرلەسە وتىرىپ، وسى ماسەلەنى دە باقىلاۋعا الۋعا ءتيىس، – دەدى نۇرسۇلتان نازاربايەۆ.

سونىمەن بىرگە، قازاقستان پرەزيدەنتى ەلىمىزدى دامىتۋ جوبالارى مەن باعدارلامالارىنىڭ ماڭىزدى سيپاتقا يە بولىپ وتىرعانىن حالىققا كەڭىنەن ءتۇسىندىرۋ جانە بۇل ىسكە «نۇر وتان» پارتياسىن تارتۋ قاجەتتىگىن اتاپ ءوتتى.

باسقوسۋ بارىسىندا استانا قالاسىنىڭ، قىزىلوردا، قاراعاندى جانە شىعىس قازاقستان وبلىستارىنىڭ اكىمدەرى وڭىرلەردەگى احۋال تۋرالى باياندادى.