(قازاق حاندىعى - 550 جىل شىعارماشىلىق بايگەسىنە )

  اي استىندا عۇن بابام الماس قىلىش ويناتقان. ارلان باتىر اتتيلا الدىندا جاۋىن جايراتقان. التىن قازىق قاقتىرىپ ارعىماعىن بايلاتقان. كۇلىمدەسە كۇن تۋىپ، كۇرسىنگەندە اي باتقان. ورحون بويىن جاز جايلاپ وتىز كۇن ويىن ويناتقان. قىرىمنىڭ قىرىن قىستاۋ عىپ قىرىق كۇن تويىن تويلاتقان. جۇلدىزداي شىراق جاندىرىپ جۇلدىزدىڭ استىن جايناتقان.   سامال جەلگە ەركەلەپ سارى دالادا ساق بابام. سەلدىرەتىپ دۇشپاندى سەڭ سەكىلدى قاپتاعان. توپتى جاۋى كەز بولسا تارپاڭ سىندى تاپتاعان. كۇمىسپەنەن كۇپتەلگەن التىنمەنەن اپتالعان.   تورعىن بەلدەتونىكوك توپتاستىردى ۇلتىمدى. بىلگە حاعان بىرەگەي بىرىكتىردى جۇرتىمدى. كۇركىرەتكەن كۇن استىن كۇلتەگىندەي ۇل تۋدى.   التىن وردا ۇلىسى ەن جايلادى ەدىلدە. باتىس شەبى قىرىمدا شىعىس شەتى ەمىلدە. ۇلىس بولىپ ۇيىستى ۇلى دالا بەلىندە. تۇلپار سىندى تۇلعالى ۇلت تەكتىلىك بار تەگىندە!   كەرەي مەنەن جانىبەك: ەر پارىز ۇلى ءىس دەپ. اق وردانى كوتەردى، قازاق اتتى ۇلىس دەپ. شاڭىراعىن التىنداپ، كەرەگەسىن كۇمىستەپ...   وڭ جاعىنا وردانىڭ وتىز رۋ قوندىردى. سول جاعىنا وردانىڭ سانسىز اۋىل قوندىردى. شۇرقىراتىپ شۋ بويىن شۇبىرعان مالعا تولتىردى. ەگەۋلى نايزا سابى دەپ ەمەننەن سىرىق جوندىردى. ەدىل مەن ەرتىس اراسىن ەرۋ جورتار جول قىلدى.   الاش اتا بالاسى تۋ تۇبىنە جيىلدى. قازاق دەگەن ۇلى اتاۋ حاندىعىنا بۇيىردى. شۋعا قاراي جان-جاقتان شۇبىرىپ كوش قۇيىلدى. شالقايعانعا شالقايدى، ەڭكەيگەنگە ءيىلدى. بەرەكەگە بايلاندى، تاتۋلىققا ءتۇيىلدى.   كەرەي مەنەن جانىبەك: ۇلىس ماڭگى بولسىن دەپ، تۇعىرعا تىكتى تۋىمدى. جەلكىلدەگەن بايراعىم جاڭبىرمەنەن جۋىلدى، كۇن نۇرىمەن جىلىندى. قالاۋىمەن اللانىڭ قازاق ەلى قۇرىلدى.   قوس حان قۇرعان ۇلىسىم ۇلى كۇنگە ۇمتىلدى. سول جاعىنان اي تۋدى، وڭ جاعىنان كۇن تۋدى. بەكزات ۇلى بەستىدەي بەسىگىندە بۇلقىندى. سەڭ سەكىلدى بوگەتتىڭ سەلدىرەپ شەتى جىرتىلدى. جۇزىكتەي كۇنگە شاعىلعان جۇزىنە جۇرتتىڭ نۇر تۇندى.   جالاڭ قىلىش اسىنعان جاساقتى ەرتە سايلادى. بەس قارۋى بەلىندە، بەلدەۋگە تۇلپار بايلادى ايشىلىق جەرگە ەستىلدى ايباتى مەن ايبارى.   كۇلتوبەنىڭ باسىندا كۇندە بيلەر كەڭەستى. ىنتىماقشىل ۇلىستىڭ ىرىس، باعى تەڭ ءوستى. اسقاق الاش ء ۇلىنىڭ ايدارىنان جەل ەستى. ايماڭدايلى جاس قۇلىن ارعىماققا تەڭەستى.   جازيرلى جەرىنىڭ جاباعىسى قۇلانداي. جاس قوزىسى بۇلانداي. سۇڭقار قۇسى قىرانداي. جاس شىبىعى شىنارداي. قىزى بىتكەن قىرمىزى ۇلى بىتكەن ۇلانداي. قاراشاسى حانعا تەڭ. قويى قوڭىر اڭعا تەڭ. قوڭىر كەشى تاڭعا تەڭ. ىشسە قىمىز، بالعا تەڭ. جەسە جايا، جالعا تەڭ.   كەرەي مەنەن جانىبەك كەرەگە تاستى شىڭ بولدى. جۇدىرىقتاي جۇمىلىپ جۇلدىزدان كوپ مىڭ بولدى. كۇن باتقاندا اي بولدى، اي باتقاندا كۇن بولدى. كەرىسىپ كەتكەن دۇشپانى كۇلىن تاسىپ، كۇڭ بولدى.   قوس قىرانى جەرىمنىڭ كەرەي مەنەن جانىبەك! قوس بۇلاعى بەلىمنىڭ كەرەي مەنەن جانىبەك! قوس شىراعى ءتورىمنىڭ كەرەي مەنەن جانىبەك! قوس پىراعى بەلگىمنىڭ كەرەي مەنەن جانىبەك!   كەرەي مەنەن جانىبەك: كەلەلى كەڭەس قۇرعاندا كوشەلى ويلاپ كوسىلگەن. شەشەندىگى توگىلىپ شەبەر سويلەپ شەشىلگەن. جىگىتتە سۇلتان دەگىزىپ جىبەكتەي ءبىر ەسىلگەن. كەمەڭگەرىم، كەمەلىم كەتە مە، قازاق ەسىنەن؟   اسىل زاتتى كەرەي حان اسىپ تۋعان ارىستان. جەتەلى حان جانىبەك جەتە تۋعان دانىشپان. قوس سۇلتاننىڭ اقىلى ءبىر ارنادا توعىسقان. بولاشاعىن بولجاعان التى مىڭ جىل الىستان. بىرىنە ءبىرى تىرەك-تى جاۋمەن قاتار الىسقان. بەتەگەلى بەلدەردە بىرگە جىلقى باعىسقان. بىرگە كوشىپ، ءبىر قونىپ قازىعىن قاتار قاعىسقان. ەرلىكپەنەن ەلدىكتە ورتاق ويدا تابىسقان. تۇرقى بولەك قوس تۇلپار تۇياعىنان شاڭ ۇشقان.   كەرەي مەنەن جانىبەك! كەڭدىگىڭدى جىرلايىن. ۇيىستىرعان ۇلىستى ەلدىگىڭدى جىرلايىن. ۇلاعاتتى ۇلتىما تەڭدىگىڭدى جىرلايىن. وزگەگە تىزگىن بەرمەگەن ورلىگىڭدى جىرلايىن. ەرۋ جورتىپ قول باستار ەرلىگىڭدى جىرلايىن.   تولاعاي تالاي ەر وتكەن تور كوز ساۋىت جامىلىپ. جۇلدىزعا قاراپ جول تاۋىپ جورتتى قانشا سابىلىپ؟. قۇلىمىن دەپ اللانىڭ قۇدىرەتىنە باعىنىپ. جالاۋلى نايزا قولىندا جالاڭ قىلىش تاعىنىپ. جورىقتان ەسەن ورالسا جولىققان جۇرتى ساعىنىپ.   قاسقا جولدى قاسىم حان قاسارىسقان قاس جاۋعا قارعا ادىم جەر بەرمەي، ەڭسەگەي بويلى ەسىم حان ەرەگەسكەن ەسسىزگە ەلى سۇيەم بەل بەرمەي، قانجارداي وتكىر حاقنازار قاپتاپ كەلگەن دۇشپانعا جاعالاسقان جەڭ بەرمەي، تارلان سىندى تاۋكە حان توپتى كەلگەن توبىردى توز-توز قىلعان تەڭگەرمەي. ...ەرلەردىڭ ءىسى بىتكەن بە؟. ەرەگەسكەن ەسەردى ەر ۇستىنە وڭگەرمەي.   ابىلايدىڭ كەزىندە: قارىس سۇيەم جەر ءۇشىن! قان مەن توككەن تەر ءۇشىن! قاپى كەتكەن ەر ءۇشىن! بەدەر بەدەر بەل ءۇشىن! قايقى قىلىش سۋىرىپ قالماقپەنەن قىرقىستى. شۇرىپپەلى مىلتىق اسىنىپ شۇرشىتپەنەن جۇلقىستى. جان بەرىستى، جان الدى جاعا مەن جىرتىستى.   كەشەگى وتكەن كەنەكەم اق سەمسەرى قولىندا. سارجان وعىن سايلاعان ساردارلارى سوڭىندا. ەر ۇستىندە كۇن كەشكەن ەركىندىكتىڭ جولىندا: اي تۋعانشا ايقاسقان كۇن باتقانشا كۇرەسكەن. نايزاسى ايعا شاعىلعان نامىستى ەرلەر ىلەسكەن. تاسقىن سۋداي تاسىعان سەڭ سەكىلدى سىرەسكەن. قابىلانداي قارعىسا قالىڭ جاۋدىڭ ءۇنى وشكەن.   ازات ەلىم قازاعىم بەرەكەمەن بەل اسقان. ۇلى دا كىشى ۇلتتارعا قوس قۇشاعىن كەڭ اشقان. ءتورىم مەنىڭ بايتاق جەر! توبەم مەنىڭ كوك اسپان!   كوكتىڭ ءجۇزىن تورلاعان كوبەسىن بۇلتتىڭ اي ءتىلىپ... بەس ءجۇز ەلۋ بەلەستە الاشتىڭ اسىل جۇرتىنا التى اي ساۋىن ايتىلىپ. وشاعىمدا شوق تۇتاپ وتتاي جاندى قايتا ءۇمىت...   جەتكەنىمە قاناعات! وتكەنىمە سالاۋات! ەڭسەسى ەردىڭ تۇسپەسىن، ەلىم بولسىن سالامات! كەلەشەگىم كەرەمەت، بولاشاعىم عالامات! ازاتتىعىم اتادان الاشقا قالعان امانات!   اي سىمباتتى استانا تاڭدا كۇنمەن تالاسقان. بەيبىت ءبىزدىڭ بايتاق ەل بەرەكەسى جاراسقان. التى قۇرلىق اراسى الاشپەنەن ساناسقان. باياندى بولسىن باقىتىڭ بار ۇلىستان باعى اسقان!. اقتاي اسكەرحان – اقىن، دراماتۋرگ. بىرنەشە حالىقارالىق جانە رەسپۋبليكالىق جىر سايىستارىنىڭ جۇلدەگەرى