2017 جىلى استاناداعى 28 ايالداما مەن ءبىرقاتار قوعامدىق ورىندا QR-كودتارى بار ءۇش تىلدە ۇسىنىلعان كىتاپتار تاقتاسى پايدا بولدى، دەپ حابارلايدى Qamshy.kz اقپارات اگەنتتىگى ەلوردا اكىمدىگىنىڭ رەسمي سايتىنا سىلتەمە جاساپ.
«رۋحاني جاڭعىرۋ» باعدارلاماسىنىڭ اياسىندا قولعا الىنعان «Astana – Bilimland» جوباسىنا WikiBilim قوعامدىق قورى مەن ەلوردا اكىمدىگى مۇرىندىق بولدى. ۇلتتىق اۋدارما بيۋروسى قوعامدىق قورىنىڭ اتقارۋشى ديرەكتورى راۋان كەنجەحان ۇلىنىڭ ايتۋىنا قاراعاندا، اتالمىش جوبانى جۇزەگە اسىرۋدىڭ تاجىريبەسى ەلىمىزدىڭ باسقا وڭىرلەرىندە دە قولدانىلا باستاعان.
«Astana – Bilimland» جوباسى اياسىندا قازاقى رۋحانياتتى قولداۋ، ونى زامانعا ساي ۇلگىدە تاراتۋ، قالادا قىزىق اتموسفەرا تۋعىزۋ ۇيلەسىم تاۋىپ، حالىقتىڭ جاقسى باعاسىنا يە بولدى. ولاي دەپ ايتۋىمنىڭ سەبەبى، استانا قالاسىنىڭ وسى تاجىريبەسىن باسقا دا كوپتەگەن ايماقتار الىپ جاتىر. قىزىلوردا، اقتوبە، الماتى وبلىستارىنداعى قوعامدىق ورىنداردا وسىنداي تاقتالار ورناتىلعاندىعىن ەستىپ، قۋانىپ جاتىرمىز. حالىققا قىزمەت كورسەتۋ ورتالىقتارىندا، وقۋ ورىندارىنىڭ كىتاپحانالارىندا، ەمحانالار مەن اۋرۋحانالاردا، ادامدار كوپ جينالاتىن جەرلەردە بۇل جوبا تۋرالى بىلەدى»، – دەدى راۋان كەنجەحان ۇلى.
تاقتادا ۇسىنىلعان كىتاپتاردىڭ ىشىنەن ۇناعانىن وقۋ ءۇشىن ازاماتتاردىڭ ينتەرنەت جەلىسىنە قوسىلعان ۇيالى تەلەفونى بولسا، جەتكىلىكتى. وقىرماندار كىتاپتى تاڭداپ، ونى QR-كودى ارقىلى سكانەرلەپ، كىتاپتىڭ سىلتەمەسىن الا الادى.
بۇل كىتاپتاردىڭ بارلىعىن قازاقستاننىڭ ۇلتتىق ەلەكتروندى كىتاپحاناسى پلاتفورماسىنان تابۋعا بولادى. بەس جىل ىشىندە 10000 كىتاپ، 1500 اۋديوكىتاپ، 120 مىڭنان استام ءسوزى مەن ءسوز تىركەسى بار امبەباپ سوزدىك، كورنەكتى قوعام قايراتكەرلەرىنىڭ داۋىستارى جازىلعان پلاستينكالار ساندىق فورماتقا كوشىرىلىپ، ولاردىڭ ەلەكتروندى نۇسقالارى شىعارىلدى.
