الماتى وبلىسىنداعى بايسەركە اۋىلىندا جۇك كولىگى قاعىپ، قايتىس بولعان وقۋشى جايلى جاڭا دەرەك شىقتى، دەپ حابارلايدى Qamshy.kz اقپارات اگەنتتىگى قازاقپارات مالىمەتىنە سۇيەنىپ.

مارقۇم بولعان بالانىڭ اتا-اناسى ۇلىن ولىمگە الدەكىمدەر يتەرمەلەدى دەپ كۇدىكتەنەدى. كوڭىل ايتا كەلگەن ءبىر توپ اتا-انا دا مەكتەپتەگى الىمجەتتىكتى ايىپتايدى. «وسى وقيعادان كەيىن بالامىزدى ساباققا جىبەرۋگە قورقامىز»،  دەيدى ولار.

ال 8-سىنىپ وقۋشىسى ءبىلىم العان مەكتەپتىڭ ديرەكتورى الىمجەتتىك  تۋرالى بىلاي تۇسىنىك بەردى.

«مەكتەپتە وقۋشىلاردىڭ الىمجەتتىك كورسەتۋى، ءقازىر ەندى بارلىعى ايتىلىپ جاتادى. بارلىق جۇمىستار، وزىمىزگە ءتيستى شارالار اتقارىلىپ جاتىر. مەن مەكتەپ باسشىسى رەتىندە مەكتەپتەگى بالالاردى بوپسالاۋ، بىر-بىرىنە كۇش كورسەتۋ، الىمجەتتىك بار دەپ سانامايمىن»، - دەدى بايسەركە اۋىلىنداعى №12 ورتا مەكتەپتىڭ ديرەكتورى تابيعات يبرايموۆا.

مارقۇم بولعان 8 سىنىپ وقۋشىسى قايعىلى جاعداي بولار ساتتەن بۇرىن بازارداعى ساتۋشىلاردان 2 مەتر ءجىپ سۇراعان. ءبىراق قانداي ماقساتتا سۇراعانى بەلگىسىز. «بازاردىڭ ءبارى بىلەدى عوي. وسى جەردەن ءجىپ سۇراعان، ەشكىم بەرمەگەن. ءسويتىپ انا جاققا بارعان دا سەكىرگەن»، - دەيدى بايسەركە اۋىلىنىڭ تۇرعىنى جۇماباي جولداس ۇلى.

ەستەرىڭىزگە سالا كەتەيىك، قايعىلى جاعداي بولعان كۇنى 8-سىنىپ وقۋشىسى  ساباققا بارماعانىن وبلىستىڭ ءبىلىم باسقارماسى ءمالىم ەتكەن ەدى. ال قايتىس بولعان  نۇربول تۋعانباي وتباسىداعى ۇلكەن بالا بولعان.