الماتى وبلىسى بيىلعى جىلى كارتوپ ءوسىرۋدى وندىرىستىك دەڭگەيدە دامىتۋدى باستاعالى وتىر. بۇل تۋرالى بۇگىن وبلىس اكىمى ا. باتالوۆ تۇرعىندار الدىنداعى ەسەپ بەرۋ جيىنىندا ايتتى، - دەپ حابارلايدى Qamshy.kz اقپارات اگەنتتىگى الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
كارتوپ وسىرۋگە ماماندانعان رايىمبەك اۋدانىندا وسى جىلى وبلىس باسشىلىعىنىڭ قولداۋىمەن كارتوپ وسىرۋگە ەرەكشە دەن قويىلىپ، ارنايى اۋىل شارۋاشىلىعى تەحنيكالارى ساتىپ الىناتىن 2 سەرۆيستىك-دايىنداۋ ورتالىقتارى قۇرىلاتىن بولادى. بۇل ورايدا يرريگاسيالىق جۇيەلەردى قالپىنا كەلتىرۋگە دە قولداۋ كورسەتىلمەك. بۇل اۋداندا سىيىمدىلىعى 16 مىڭ توننالىق كوكونىس ساقتاۋ قويمالارى بۇرىننان بار. كارتوپ ءوسىرۋدىڭ قىر-سىرىن جاقسى بىلەتىن كەربۇلاق اۋدانىنىڭ شارۋاشىلىقتارى دا بۇل ىسكە اتسالىساتىن بولادى.
اتاپ وتسەك، ىلە اۋدانىنداعى يندۋستريالدى ايماقتا «فارم فريتس» ترانسۇلتتىق كومپانياسىن تارتا وتىرىپ، كارتوپ وڭدەۋ جۇزەگە اسىرىلماق.
