الماتى وبلىسى ەڭبەكشىقازاق اۋدانى قاراكەمەر كەنتىندە ورنالاسقان  6654 اسكەري ءبولىمىنىڭ بازاسىندا كينولوگ مامانداردىڭ بىلىكتىلىگىن جوعارىلاتۋ (قايتا دايارلاۋ) كۋرسى اشىلدى. اتالعان كۋرس امەريكا قۇراما شتاتتارىنىڭ قازاقستان رەسپۋبليكاسى ەلشىلىگىندەگى اسكەري ىنتىماقتاستىق ءبولىمىنىڭ ۇيىمداستىرۋى ارقىلى، ەسىرتكىمەن كۇرەس باعدارلاماسى اياسىندا  وتەدى، دەپ حابارلايدى Qamshy.kz اقپارات اگەنتتىگى. 

ءتورت اپتاعا سوزىلاتىن وقۋ بارىسىندا اقش-تىڭ كونتراباندامەن كۇرەس جونىندەگى تاجىريبەلى ماماندارى ۇلتتىق ۇلان كينولوگتارىنا جاڭا ادىستەردى ۇيرەتپەك. ۇلتتىق ۇلاننىڭ ءار وڭىرىنەن كەلگەن كينولوگ ماماندار مەن ولاردىڭ قىزمەتتىك يتتەرى گەروين، ماريحۋانا جانە سينتەتيكالىق ەسىرتكىلەردى تابۋ جولدارىنىڭ مەيلىنشە جەتىلگەن تاسىلدەرىن مەڭگەرەتىن بولادى. وسى ماقساتتا ىس-تاجىريبەلىك وقۋلار مەن ترەنينگتەر نەعۇرلىم شىنايى بولۋى ءۇشىن ارنايى نىسانداردا وتكىزىلەدى.  بۇل كۋرستىڭ قازاقستان جانە امەريكا ساراپشىلارى ءۇشىن كينولوگيا سالاسىندا پىكىر الماسۋ، ءوزارا ىنتىماقتاستىق شارالارىن كەڭەيتۋ جانە قىزمەتتىك يتتەردى دايىنداۋ بويىنشا  تاجىريبە بولىسۋدە  بەرەرى زور.

وقۋ كۋرسىنىڭ اشىلۋىنا امەريكا تاراپىنان  ەسىرتكىمەن كۇرەس باعدارلاماسىنىڭ مەنەدجەرى مايور كريستوفەر كەنت جانە كينولوگ-نۇسقاۋشىلار بريۋس گۋدەيل مەن سكوت زايتنەر كەلدى. مايور ك.كەنت سويلەگەن سوزىندە  اتالعان باعدارلاما اياسىندا بۇل قازاقستاندا وتكىزىلىپ جاتقان ءۇشىنشى، ال ۇلتتىق ۇلاننىڭ وزىندە ءبىرىنشى كۋرس ەكەندىگىن اتاپ ءوتتى. ءار ەلدە قولدانىلاتىن يتپەن ەسىرتكى ىزدەۋ تاسىلدەرى ءار ءتۇرلى ەكەندىگىن، سونىڭ ىشىندە امەريكالىق تاسىلدەردى دە ءبىزدىڭ تاجىريبەگە قوسۋ ماقساتىندا كەلگەندىكتەرىن ايتتى. كينولوگ-نۇسقاۋشى ب. گۋدەيل ارنايى الىپ كەلگەن جابدىقتارىمەن تانىستىرىپ، ولاردى قالاي قولدانۋ كەرەكتىگىن كورسەتىپ شىقتى.  حالىقارالىق ترەنينگ سوڭىنان ۇلاندىقتار ەمتيحان تاپسىرىپ، سەرتيفيكات الادى، كۋرستى اياقتاعان ءار كينولوگقا امەريكالىق قۇرال-جابدىقتار سىيعا بەرىلەدى. ارنايى كۋرستان وتكەن ماماندار بولاشاقتا   امەريكالىق ءتاسىلدى ۇيرەتۋ بويىنشا دەربەس نۇسقاۋشى بولا الادى.

ايتا كەتەر بولساق، قاراكەمەر كەنتىندەگى كينولوگيالىق ورتالىق – ۇلتتىق ۇلانداعى بىرەگەي ورتالىقتىڭ ءبىرى. قىزمەتتىك يتتەردىڭ تۇقىمىن اسىلداندىرۋ، كوبەيتۋ، ولاردى قاجەتتى ماقساتتا پايدالانۋ ءۇشىن دايىنداۋ جانە قىزمەتكە پايدالانۋ 1962 جىلدان باستاپ قولعا الىنعان. ءار جىلدا  ەكى جۇزدەن استام اسكەري قىزمەتشى قازاقستاننىڭ ءار وڭىرىنەن كەلىپ، اسكەري كينولوگ ماماندىعىن  الىپ شىعادى. 

ۇلتتىق ۇلان «وڭتۇستىك» وڭىرلىك قولباسشىلىعىنىڭ باسپا ءسوز قىزمەتى،

مايور بايماعانبەتوۆا دانارا