مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ پاۆلودار وبلىسى بويىنشا دەپارتامەنتىنىڭ ۇجىمى ءبىر كۇندىك جالاقىسىن شىعىس قازاقستان وبلىسىنىڭ سۋ تاسقىنىنان زارداپ شەككەن تۇرعىندارىنا كومەك رەتىندە اۋداردى، دەپ حابارلايدى  Qamshy.kz اقپارات اگەنتتىگى pavlodarnews.kz سايتىنا سىلتەمە جاساي وتىرىپ. 

«ءبىز شىعىس قازاقستان وبلىسىنداعى ارىپتەستەرىمىزگە حابارلاسىپ، تاسقىننان زارداپ شەككەن حالىققا نە قاجەت ەكەنىن سۇرادىق. نەگىزىنەن، بۇل قۇرىلىس ماتەريالدارى، ازىق-تۇلىك پەن كيىم-كەشەك. جارتى ميلليون تەڭگە اۋدارامىز دەپ كەلىستىك. بۇل اقشاعا ولار وزدەرىنە قاجەت زاتىن ساتىپ الادى. بارلىق مەملەكەتتىك قىزمەتكەردى بەيتاراپ قالماي، بىزگە قوسىلۋعا شاقىرامىز»، — دەدى دەپارتامەنت باسشىسى ادىلبەك مۇقاشيەۆ. 

ەسكە سالىپ وتسەك، "جاس وتان" جاستار قاناتىنىڭ قىز-جىگىتتەرى پاۆلوداردا سۋ تاسقىنىنان زارداپ شەككەندەرگە گۋمانيتارلىق كومەك قابىلداۋ پۋنكتىن اشتى. پۋنكت تاۋلىك بويى جۇمىس ىستەيدى. 

كومەك جيناۋعا تەك ءىرى كاسىپورىندار عانا ەمەس، قاراپايىم تۇرعىندار دا اتسالىسۋدا. وبلىستىق ءماسليحات دەپۋتاتتارى ميلليون تەڭگە جيناپ بەردى.