ادامنىڭ ءوز الدىنا قوياتىن ماڭىزدى تاپسىرمالارىندا تابىسقا جەتۋى نەمەسە ساتسىزدىككە ۇشىراۋى ونىڭ پسيحولوگيالىق احۋالىنا بايلانىستى. ەگەردە ول كوكسەگەن مۇراتىنا جەتەمىن دەپ، ءوز-وزىن سانالىق تۇرعىدان سەندىرسە، اللانىڭ قالاۋىمەن دەگەنىنە جەتەدى.

ال، نامازدىڭ ماقساتى ─ اللاعا جاقىنداۋ. ناماز وقىماس بۇرىن سول ماقساتقا نيەتتەنۋ كەرەك، دىتتەگەنىمدى ورىندايمىن دەگەن ويدا بەكەم ءارى تاباندى بولۋ قاجەت. وسىلايشا، ءسىز نامازعا دايىندالاسىز. دارەت الۋ كەزىندە وز-وزىڭىزگە ىشتەي: «مەن اللانىڭ قۇزىرىنا بارامىن!»  -دەپ ويلاڭىز. ونىمەن كەزدەسۋ ءۇشىن جاساپ جاتقان ارەكەتىڭىزدىڭ سەبەبىمەن كۇنالارىڭىزدىڭ توگىلەتىنىن ەسكە الىڭىز. اللا تاعالا ءوز ق ۇلىنىڭ نامازدا ونىمەن كەزدەسۋگە دەگەن تىلەگىن لايىقتى تۇردە باعالاپ، ونىڭ كۇنالارىن كەشىرەدى. اللا تاعالامەن جۇزدەسۋدىڭ نەگىزىندە شىندىعىندا نە جاتقاندىعىن ويلانىپ كورىڭىز. ءسىزدىڭ رۋحاني ساياحاتىڭىز وسى جەردەن باستالادى.

نامازعا تۇرعان كەزدە اللانىڭ الدىندا تۇرعانىڭىزدى جاقسىلاپ ساناڭىزعا قۇيىپ الۋعا تىرىسىڭىز. تىم بولماعاندا، «اللا مەنى كورىپ تۇر» دەگەن سەنىمدە بولۋعا تالپىنىڭىز. اللانىڭ ۇلىقتىعىن ويلاڭىز. «اللاحۋ اكبار» دەگەن تاحريما تاكبىرىنىڭ سوزدەرى اللانىڭ ۇلىقتىعىن تولىق ۇعىنۋمەن، جۇرەگىڭىزدىڭ تۇكپىرىنەن شىعۋى ءتيىس. ءوزىڭىز ويلاپ كورىڭىزشى، ونىمەن تىلدەسۋ مۇمكىندىگىنە يە بولعان ءسىز نەتكەن باقىتتىسىز. «بۇل ─ مەنىڭ سوڭعى مۇمكىندىگىم. كەلەسى نامازعا دەيىن ءومىر سۇرمەۋىم مۇمكىن»، - دەپ ەلەستەتىڭىز.

شىن جۇرەگىڭىزبەن، بار جان-تانىڭىزبەن، اقىل-ويىڭىزبەن قۇلشىلىق جاساڭىز. بار نازارىڭىز اللانىڭ پاكتىگى مەن ونىڭ ۇلىقتىعىندا بولسىن. «ءال-فاتيحا» سۇرەسى مەن ودان كەيىنگى سۇرەلەردى وقىعاندا ونداعى سوزدەردىڭ ماعىناسىنا وي جۇرگىرتىڭىز. بۇل ─ ءسىزدىڭ اللاعا باعىتتالعان سوزدەرىڭىز. «قۇراندى ءوز تىلىممەن وقي الاتىن مەن نە دەگەن باقىتتى جان ەدىم»، - دەپ ىشتەي ءتۇسىنىڭىز. رۋكۋعقا بارعاندا ءوزىڭىزدىڭ جاي عانا يىلمەگەنىڭىزدى، اللاعا بويۇسىنىپ يىلگەنىڭىزدى قاپەرىڭىزگە الىڭىز. جاراتقان يەمىزگە دەگەن قۇرمەتىڭىزدى ءبىلدىرىپ، «سۋبحاناللاحۋل ازيم» ۇلىقتاۋ سوزدەرىن اللانى ماداقتاۋدان ءلاززات الىپ، شىن جۇرەگىڭىزبەن ايتىڭىز.

ساجدەگە بارعاندا باسىڭىزدان باستاپ، اياعىڭىزعا دەيىن بۇكىل ءتانىڭىزدىڭ ءوزىنىڭ جاراتۋشىسىنىڭ الدىندا تۇرعانىن ەستە ساقتاڭىز. ءبىز سوعان عانا باعىنامىز جانە جاراتقان راببىمىز كەمشىلىك اتاۋلىدان پاك (سۋبحانا رابيل ال’ا) ەكەنىن ايتامىز. تاشاحۋدتا «ءاتتاحياتتى» وقىپ وتىرىپ، پايعامباردىڭ، وعان اللانىڭ يگىلىگى مەن سالەمى بولسىن، ميعراج كەزىندە ءوزىنىڭ بويۇسىنۋشىلىعىن بىلدىرگەنىن ويلاڭىز. ال، ءسىزدىڭ مۇنى نامازدا سۇراۋعا مۇمكىندىگىڭىز بار: «مەنىڭ نامازىم – مەنىڭ ميعراجىم. مەن اللانىڭ الدىندامىن». ناماز كەزىندە قاسىڭىزدا پەرىشتەلەر بولادى. سالەم بەرگەندە وڭ جاعىڭىز بەن سول جاعىڭىزداعى پەرىشتەلەرگە سالەم بەرۋگە نيەتتەنىڭىز. نامازدى وقىپ بولعان سوڭ يستيعفار جاساپ، اللانىڭ بارلىق قۇقىقتارىنىڭ ورنىن تولتىرا المايتىندىعىمىز ءۇشىن ودان كەشىرىم سۇراڭىز.

سودان سوڭ اللادان نامازىڭىزدى قابىل الۋىن سۇراپ، دۇعا جاساڭىز. نامازدى وسىنداي دەڭگەيدە وقۋعا جەتۋ ءۇشىن كۇش سالۋ كەرەك. بار اقىل-ويىڭىزدى اللاعا بۇرىپ، قىسقا نامازدان باستاڭىز. ءسويتىپ، ونى بىرتە-بىرتە ۇزارتىڭىز. نامازىڭىزدىڭ ساپاسى ارتقاندا جۇرەگىڭىزدەگى كىرشىكسىز نيەتتىڭ قايتا جاندانعاندىعىن سەزىنەسىز. ونىڭ ءسىزدىڭ ءومىرىڭىزدىڭ بارلىق تۇستارىنا ىقپال ەتەرى ءشۇباسىز. سودان كەيىن ءوزىڭىزدى باسقاشا سەزىنەتىن، باسقاشا سويلەيتىن، باسقاشا كورەتىن، ءتىپتى باسقاشا ەستيتىن بولاسىز. وسىنىڭ ءبارى اللانىڭ ءسىزدى كورىپ تۇرعانىن ءتۇيسىنۋدىڭ ارقاسىندا. مۇنداي نامازدى وقۋ كەزىندەگى جۇرەك تىنىشتىعىن ەشقانداي جايلىلىق پەن ءسان-سالتاناتقا ساتىپ الا الماسسىز، ءسىرا.

muftyat.kz