2011 جىلى «ەكسترەميزم» بابى بويىنشا 12 جىلعا سوتتالعان پروفەسسور سايات ىبىرايەۆتىڭ مەرزىمىنەن بۇرىن بوساپ شىعۋىنا ەش كەدەرگى جوق. بۇل تۋرالى سايات ىبىرايەۆتىڭ ىسىمەن اينالىسىپ جۇرگەن ادۆوكاتى ابزال قۇسپان Qamshy.kz اقپارات اگەنتتىگىنىڭ تىلشىسىنە ايتىپ بەردى.

ادۆوكاتتىڭ ءدال قازىرگى ۋاقىتتا كوتەرىپ وتىرعان ەڭ ماڭىزدى ماسەلەسى – سايات ىبىرايەۆتى مەرزىمىنەن بۇرىن شارتتى تۇردە بوساتۋ.

«سايات ىبىرايەۆ زاڭسىز سوتتالدى ما، زاڭدى ما – بۇل ماڭىزدى ەمەس. ءبىزدىڭ قازىرگى كوتەرىپ وتىرعان ماسەلە – پروفەسسورىمىزدى مەرزىمىنەن بۇرىن شارتتى تۇردە بوساتۋ. ونىڭ جاسى ءقازىر 51-دە. عىلىمعا بەرگەنىنەن بەرەرى كوپ.

ۇكىم شىققالى سەمەيدەگى قاتاڭ رەجيمدەگى كولونياسىندا جازاسىن وتەپ جاتىر. وسى جىلدار ىشىندە مۇلدەم ءتارتىپ بۇزعان جوق. قايتا كىتاپ جازىپ، عىلىمي جۇمىستارمەن اينالىسىپ جاتىر»، - دەگەن ادۆوكات سايات ىبىرايدىڭ قازاقستانعا كەرەك تۇلعا ەكەنىن اتاپ ءوتتى.

«بارىمىزگە بەلگىلى، ول – تەحنيكا عىلىمدارىنىڭ دوكتورى. ءقازىر تۇرمەدە ەكەنىنە قاراماستان، اينالىسىپ جۇرگەن باعىتى – روبوتوتەحنيكا. قازاقستاندا بۇل سالانىڭ تەورياسىن دا، پراكتيكاسىن دا جەتىك مەڭگەرگەن عالىم ول. ءدال سايات ىبىرايدىڭ دەڭگەيىندە عالىم جوق. سايات ىبىرايەۆتى تۇرمەدەن شىعارعاننان ۇتپاساق، ۇتىلمايمىز.

ادەتتە قوعامعا ءقاۋىپتى ادامداردى: ادام ولتىرگەن، بالا زورلاعان، ۇرلىق جاساعانداردى سوتتايدى. سانالى عۇمىرىن عىلىمعا ارناعان سايات ىبىرايەۆتىڭ قوعامعا تيگىزەر پايداسى كوپ»، - دەدى ابزال قۇسپان.

ادۆوكاتتىڭ ايتۋىنشا، زاڭ بويىنشا عالىمدى مەرزىمىنەن بۇرىن بوساتۋعا ەش كەدەرگى جوق. بۇعان دەيىن سايات ىبىرايدى مەرزىمىنەن بۇرىن بوساتۋ تۋرالى وتىنىشكە سەمەي قالالىق سوتى قارسى جاۋاپ بەرگەن. الايدا ابزال قۇسپان قايتا شاعىم جاسادى. بيىل ءساۋىردىڭ ورتاسىندا شقو سوتىنىڭ اپپەلياسيا القاسى شاعىمدى قارايتىن بولادى.

ايتا كەتەيىك، بۇگىن قازاقتىڭ ءبىر توپ زيالىسى جوعارعى سوت ءتوراعاسى جاقىپ اسانوۆتىڭ اتىنا سايات ىبىرايەۆتى مەرزىمىنەن بۇرىن بوساتۋ ماسەلەسىن كوتەرىپ، اشىق حات جولدادى. وندا سماعۇل ەلۋباي، اسقار جۇمادىلدايەۆ باستاعان ءبىر توپ زيالى الەمدىك دەڭگەيدە مويىندالعان قازاق عالىمىنىڭ ولشەۋسىز ەڭبەكتەرىن ايتىپ، سونداي ادامنىڭ بۇگىندە تۇرمەدە وتىرعانىنا وكىنىش بىلدىرگەن.

«سايات ىبىرايەۆتىڭ عىلىمدا جاڭالىق اشار دەر شاعى. ول ەل يگىلىگىنە جارار تالاي عىلىمي جاڭالىقتارعا مۇرىندىق بولار ەدى، يننوۆاسيالىق باعىتتا كوشىمىزدىڭ تۇزەلۋىنە ات سالىسار ەدى،  ۇستازدىڭ دارىسىنە ءزارۋ جاستارعا ءتالىم بەرەر ەدى»، - دەلىنگەن اشىق حاتتا.

ال 2017 جىلدىڭ سوڭىندا Qamshy.kz پورتالى وتكىزگەن حالىقتىق ساۋالناما ناتيجەسىندە سايات ىبىرايەۆ تاۋەلسىزدىكتىڭ نىعايۋىنا قوسقان ۇلەسى ءۇشىن حالىقتىق «الاش ارىستارىنىڭ ءىزباسارى» قۇرمەتتى اتاعىمەن ماراپاتتالدى. اتالمىش مەدالمەن بۇگىندە تار قاپاستا جاتقان تاعى بىرنەشە ازامات ماراپاتتالدى.