ءماجىلىس دەپۋتاتى  ورالداعى اسكەري ءبولىمنىڭ جاۋىنگەرلەرىمەن كەزدەستى، دەپ جازادى Qamshy.kz اقپارات اگەنتتىگى «باتىس» ءوڭىرلىق قولباسشىلىعىنىڭ باسپا ءسوز قىزمەتىنە سىلتەمە جاساي وتىرىپ.

باقىتبەك سماعۇل وڭىرگە جۇمىس ساپارى بارىسىندا ۇلتتىق ۇلان جاۋىنگەرلەرىمەن كەزدەستى،

كەزدەسۋ  بارىسىندا  حالىق قالاۋلىسى 5517-اسكەري ءبولىمنىڭ تىنىس-تىرشىلىگىمەن تانىستى.

 «باتىس» وڭىرلىك قولباسشىلىعىنىڭ باسقارماسى جانە اسكەري ءبولىمنىڭ قىزمەتكەرلەرىمەن جۇزدەسۋدە ءماجىلىس دەپۋتاتى ەلباسىنىڭ بيىلعى جولداۋىنا، «بولاشاققا باعدار: رۋحاني جاڭعىرۋ» باعدارلامالىق ماقالاسىنا جانە «پرەزيدەنتتىڭ بەس الەۋمەتتىك باستاماسىنا» بايلانىستى الدا تۇرعان ماقسات-مىندەتتەردى اڭگىمەلەپ بەردى.

ماڭگى مۇرات - اتا-بابالارىمىز قانىن دا، جانىن دا اياماعان ازاتتىعىمىزدى ايالاپ، ۇلى مارتەبەلى تاۋەلسىزدىگىمىزدى باياندى ەتۋ. ەلدىڭ بىرلىگى باردا - دامۋ دا بار. وسى ورايدا بەس الەۋمەتتىك باستاما بارلىق سالاداعى قىزمەتكەرلەردىڭ، سونىڭ ىشىندە اسكەري قىزمەتشىلەردىڭ ماقسات-مۇددەسىنە ساي ورىستەي بەرەتىن بولادى. ەڭ باستىسى، ۇلتتىق رۋح مىقتى بولۋى كەرەك. دەپۋتات ءسوزىنىڭ نەگىزگى ءتۇيىنى وسىعان سايدى. باقىتبەك سماعۇل ءوز ومىرىندەگى ەلەۋلى كەزەڭ

- اۋعان سوعىسىنا ەرەكشە توقتالدى. تالاي قاندى جورىقتى باستان وتكىزگەن مايدانگەر قالامگەر، قازاقستان جازۋشىلار وداعى مۇشەسىنىڭ «اۋعاننىڭ وت جالىنى»، «مەن كورگەن سوعىس» سىندى كىتاپتار جازعانى بەلگىلى. جاۋىنگەرلەر ارداگەردىڭ ءسوزىن ۇيىپ تىڭداپ، ءون بويىنان وتكىزگەندەي بولدى.

ءماجىلىس دەپۋتاتى جۋىردا پرەمەراسى بولعان «التىنشى بەكەت» كوركەم ءفيلمى تۋرالى دا ايتىپ، ۇلتتىق ۇلان قاتارىندا ءوز وتانىن قورعايتىن جاۋىنگەرلەردىڭ كوبەيە بەرەتىنىنە سەنىم ءبىلدىردى.سودان كەيىن وسىعان قاتىستى ءوز ولەڭىن وقىپ بەردى.

مۋزەيگە ەكسكۋرسيا بارىسىندا «باتىس» وڭىرلىك قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى، پولكوۆنيك بەرىك وماروۆ وڭىرلىك قولباسشىلىقتىڭ ونەگەلى تاريحى تۋرالى اڭگىمەلەپ بەردى.

ءوز كەزەگىندە 5517-اسكەري ءبولىمنىڭ قاتارداعى جاۋىنگەرى ۋسال ماعجان ءماجىلىس دەپۋتاتىنىڭ نازارىنا ءوز جىرىن  ۇسىندى. بۇعان اسەرلەنگەن باقىتبەك سماعۇل جاۋىنگەرگە ريزاشىلىعىن جەتكىزىپ، اسكەري بورىشىن ابىرويمەن اتقارۋىنا جانە تۋعاندارىنا امان-ەسەن ورالۋىنا تىلەكتەستىگىن ءبىلدىردى.

ايتا كەتەيىك، ءماجىلىس دەپۋتاتتارى باقىتبەك سماعۇل، امانجان جامالوۆ، ساپارحان وماروۆ، سونداي-اق سەناتورلار ەربولات مۇقايەۆ، ناريمان تورەعالييەۆ بقو-عا جۇمىس ساپارى بارىسىندا كاسىپورىن-مەكەمەلەردە، وبلىس اۋداندارىندا بولىپ، تۇرعىندارعا ەلباسى جولداۋى، بەس الەۋمەتتىك باستاما جانە مەملەكەتتىك باعدارلامالاردىڭ جۇزەگە اسىرىلۋ بارىسىن ايتىپ بەردى.