سيريانىڭ اسكەري قاقتىعىس الاڭدارىندا اتىراۋ وبلىسىنىڭ 67 بالاسى بار. بۇل تۋرالى اتىراۋ وبلىسى ءدىن ىستەرى جونىندەگى باسقارما باسشىسى قايروللا قۇشقالييەۆ مالىمدەدى.

قايروللا قۇشقالييەۆتىڭ ايتۋىنشا، 2011 جىلدان بەرى سيرياعا اتىراۋلىق 54-كە جۋىق ەرەسەك ادامدار اتتانعان. كەيبىر وتباسىلىلار بالالارىمەن كەتتى. سوڭعى دەرەكتەرگە سايكەس، قازىرگى ۋاقىتتا سيريانىڭ قاقتىعىس الاڭدارىندا اتىراۋ وبلىسىنىڭ 67 بالاسى بار. ولاردىڭ ەكەۋى 18-گە تولعان، 34ء-ى مەكتەپ جاسىنداعىلار بولسا، قالعان 31ء-ى مەكتەپ جاسىنا دەيىنگى بالالار.

ءدىن ىستەرى جونىندەگى باسقارما باسشىسى 2017 جىلى اراب مەملەكەتتەرىنە ءبىلىم الۋعا اتتانعان 10 ستۋدەنتتىڭ ەلگە قايتارىلعانىن حابارلادى.

«بىلتىر 35 ستۋدەنت بولعان. ولاردىڭ وتباسى مۇشەلەرىمەن سويلەسىپ، 10 ستۋدەنتتى ەلگە قايتاردىق»، - دەدى قۇشقالييەۆ.

ق ر ۇقك-نىڭ دەرەگىنشە، 2017 جىلى سوعىس وشاقتارىنان قازاقستانعا 63 بالا قايتارىلدى.

قازاقستان ەلشىلىگى سيريادا اككرەديتتەلگەن كونسۋلمەن بىرلەسىپ، سوعىس ايماعىنداعى قازاقستاندىق بالالاردىڭ سانىن انىقتاۋ جۇمىستارىمەن اينالىسۋدا. «بالالاردىڭ ناقتى سانى بەلگىسىز، سەبەبى سوعىس ايماقتارىنا اتتانعان  قازاقستان ازاماتتارىن ەشكىم باقىلامايدى»، - دەدى ق ر ءسىم.