2018 جىلدىڭ 5 ساۋىرىندە QAZAQ BATYRY جەكپە-جەك اكادەمياسىندا ق ر گرەپپلينگ قاۋىمداستىعىنىڭ پرەزيدەنتى قانات الين كوكتەمگى سپورت ماۋسىمىنا جوسپارلاعان جوبالارىمەن ءبولىستى. سونىمەن قاتار، قىسقى ماۋسىمدا جەتكەن تولايىم جەتىستىكتەرىنە دە توقتالا ءوتتى.
بىرەگەي سپورت ءتۇرى ەلىمىزدە قارقىندى دامۋ ۇستىندە. قاۋىمداستىق بۇل سپورت تۇرىنە دەگەن ماحاباتتى مەكتەپ تابالدىرىعان باستاپ ۇيالاتۋدى كوزدەپ وتىر. الەمدىك تاجىريبەلەردى زەرتتەي كەلە گرەپپلينگ قاۋىمداستىعى “مەكتەپ ليگاسى” قب بىرلەسىپ «School Grappling League» جوباسىن جۇزەگە اسىرۋدا. بۇگىندە «ءبىلىم - يننوۆاسيا» ليسەي بازاسىندا استانا جانە قوستاناي قالالارىندا فاكۋلتاتيۆتى ساباقتار اشىلدى. جاقىندا سپورتتىق ۇيىم استانا قالاسى سارىارقا اۋدانىنىڭ اكىمىنەن قولداۋ العان بولاتىن. جالپى ءبىلىم بەرۋ مەكەمەلەرىندە ەندى تەگىن گرەپپلينگ سەكسيالارى بەلسەندى تۇردە اشىلا باستايدى. باسپا ءسوز كونفەرەنسياسى بارىسىندا قاۋىمداستىق باسشىسى قانات تولەۋبەك ۇلى مەن «مەكتەپ ليگاسى» قوعامدىق ۇيىمىنىڭ ءتوراعاسى نۇرلان يرگيزبايەۆ ىنتىقماقتاستىق جونىندە مەموراندۋمعا قول قويدى.
ەلىمىزدە گرەپپلينگتىڭ شىنىمەن دە قارقىن قوسقاندىعى بايقالادى. ايماقتارداعى قىزۋعۋشىلىق كۇننەن كۇنگە ارتىپ كەلەتىنى دە جاسىرىن ەمەس. قانات ءاليننىڭ ايتۋى بويىنشا: «ق ر گرەپپلينگ قاۋىمداستىعىنىڭ باستى ماقساتى – قازاقستاندىقتاردى اتا-بابالارىمىزدىڭ قالدىرعان ۇلتتىق قۇندىلىقتارىن ساقتاي وتىرا رۋحاني جانە فيزيكالىق تۇرعىدا دامىتۋ. ەلباسىنىڭ سىڭدارلى ساياساتىنىڭ ارقاسىندا ءبىزدىڭ ەل گرەپپلينگتەن الەم چەمپيوناتىن استانا قالاسىندا وتكىزۋ مۇمكىندىگىنە يە بولدى. قاۋىمداستىق ءوز كەزەگىندە، 6-9 قىركۇيەك كۇندەرى وتەتىن ايتۋلى دوداعا دايىندىعىن باستادى».
قىسقى ماۋسىمدى قاۋىمداستىق حالىقارالىق «Astana Open 2018» تۋرنيرىمەن باستادى. استانا قالاسىندا وتكەن بايگەگە الەمنىڭ التى ەلىنەن كەلگەن 600 استام سپورتشى قاتىستى. قازاقستان، رەسەي، گرۋزيا، وزبەكستان، قىرعىزستان مەن ءۇندى ەلدەرى جىلدىڭ باستى دوداسىندا باقتالاستى. ايتا كەتۋ كەرەك، اتالمىش حالىقارالىق تۋرنير قاتارىنان ءۇشىنشى رەت ۇيىمداستىرىلىپ وتىر.
كەلەسى كەزەكتە جاستار سارايىندا ەرەسەكتەر جانە ارداگەرلەر اراسىندا 10-11 اقپان كۇندەرى ارالىعىندا استانا قالاسىندا وتكەن گرەپپلينگتەن قازاقستان رەسپۋبليكاسىنىڭ چەمپيوناتى. جارىسقا ەلىمىزدىڭ بارلىق ايماقتارىنان 500-گە جۋىق سپورتشى قاتىستى. تۋرنير ناتيجەسىنە سايكەس ۇلتتىق قۇراما جاساقتالدى. ايتا كەتەيىك، بۇل جولى دا وتانداستارىمىز قورجىنىمىزدى التىنعا تولتىردى.
قازاقستان ۇلتتىق قۇراماسى گرەپپلينگتەن بىشكەكتە وتكەن ازيا بىرىنشىلىگىندە 30-دان استام مەدال (12 التىن، 12 كۇمىس جانە 9 قولا) جانە ءبىرىنشى جالپى كوماندالىق ورىندى قانجىعاسىنا بايلادى. قازاقستاندىقتار نەگىزگى قارسىلاستارى – تۋرنير قوجايىندارى قىرعىزستاندى (2 ورىن) جانە يران قۇراماسىن قاپى قالدىردى. ەستەرىڭىزگە سالا كەتەيىك، 5 ناۋرىزدا قىرعىزستان استاناسى بىشكەكتە ەرلەر جانە ايەلدەر اراسىندا گرەپپلينگ جانە گرەپپلينگ گيدەن ازيا چەمپيوناتى ءوتتى. اتالمىش بىرىنشىلىك العاش رەت UWW دۇنيەجۇزىلىك كۇرەس قاۋىمداستىعىنىڭ ەرەجەسىنە سايكەس وليمپيادا جانۇياسىنا كىرەتىن گرەك-ريم، ەركىن جانە ايەلدەر كۇرەس تۇرلەرىمەن قاتار ۇيىمداستىرىلدى. وتكەن جىلى استانا قالاسىندا ازيا چەمپيوناتىندا ءبىزدىڭ پالۋاندار قىرىقتان استام مەدالدى قانجىعالارىنا بايلاپ ءبىرىنشى ورىنعا يە بولعان ەدى. ءدال وسىلاي قازاقستان ازيا كونتينەنتىندە ۇزدىك ەكەندىگىن ەكىنشى مارتە دالەلدەي ءتۇستى.
1 ءساۋىر كۇنى QAZAQ BATYRY KIDS ءتۋرنيرى ۇيىمداستىرىلدى. قازاقستاندىق بالالار كىلەمىندە اسا ۇلكەن سۇرانىسقا يە جارىسقا ەكى جۇزدەن استام 4-تەن 11 جاسقا دەيىنگى كىشكەنتاي پالۋاندار قاتىستى. ال 7 جانە 8 ءساۋىر ارالىعىندا جاستار سارايىندا بالالار، جاستار جانە يۋنيورلار اراسىندا ق ر چەمپيوناتى وتەدى.
باسپا ءسوز كونفەرەنسياسى بارىسىندا قاۋىمداستىق دەرەكتى فيلمدەر لەگىمەن تانىستىردى. جارىستار بارىسىندا تۇسىرىلگەن بەينەماتەريالدار سپورت سۇيەر قاۋىم عالامتور جەلىسىنەن جاقىن ۋاقىتتا تاماشالاي الادى. سپورتتىق ۇيىم بۇل باعىتتا ءالى دە تالاي جۇمىس ىستەۋ كەرەك ەكەندىگىن جاسىرمادى. جاستاردى سپورتقا باۋلۋ جانە ىنتالاندىرۋ - بۇگىنگە قويىپ وتىرعان باستى ماقسات.
