اقتوبەدە ليفت جانشىپ ولتىرگەن تەلەجۇرگىزۋشىنىڭ اجالدان امان قالعان قىزى باس جاراقاتىمەن اۋرۋحاناعا ءتۇستى، دەپ جازادى Qamshy.kz اقپارات اگەنتتىگى كتك ارناسىنا سىلتەمە جاساي وتىرىپ.

اقتوبەدە كوپقاباتتى ءۇيدىڭ ليفتىندە تەلەجۋرناليست ايەل قازا تاپتى. ايزات ءابدىساماتتىڭ اياعى جەدەلساتى ەسىگىنە قىسىلىپ، تومەن سۇيرەپ كەتكەن. مارقۇمنىڭ 3 جاسار قىزى اناسىنىڭ قينالعان ءساتىن كوزىمەن كورىپتى. ءقازىر وسى وقيعاعا بايلانىستى قىلمىستىق ءىس قوزعالدى.

قايعىلى وقيعا بولعان ليفتىگە قاراۋعا جۇرەگىڭ داۋلامايدى. 28 جاستاعى ايزاتتىڭ قالاي وعان قىستىرىلىپ قالعانىن جاقىندارى دا تۇسىنبەي وتىر.

ءبىر اياعى ليفت كابيناسى مەن تابالدىرىعى اراسىنداعى قۋىسقا كىرىپ كەتىپتى. ليفت قوزعالىپ ونى تومەن سۇيرەپ اكەتكەن. ىسقاق قاراشولاقوۆ، مارقۇمنىڭ اعاسى:

– تروسى ۇزىلمەگەن دەيدى.  نەگىزى جارتىلاي ىستەپ تۇرعان ليفت. بالا ءبىراق ءىلىنىپ قالدى دەيدى. قاي جاققا ءىلىنىپ قالدى، بىلمەيمىز.

ليفت سۇيرەپ اكەتكەن كەلىنشەك بىردەن كوپ جۇمىپتى. ال كابينا ىشىندە ءۇش جاسار قىزى بولعان.

"جەدەل جاردەم جەتكەندە كەلىنشەك كوز جۇمعان. قاسىندا كىشكەنتاي قىزى جىلاپ وتىردى. ءبۇلدىرشىن شوشىنىپ قالعان. باس جاراقاتىن الىپتى. ونى بالالار اۋرۋحاناسىنا جەتكىزدىك. ال كەلىنشەكتىڭ امان قالۋى مۇمكىن ەمەس ەدى. سەبەبى قان تامىرلارىنىڭ بارلىعى ۇزىلگەن. ءليفتىنىڭ شاحتاسىمەن ەسىك جاقتاۋىنىڭ اراسىندا سۇيرەتىلگەن"، - دەيدى اقتوبە وبلىستىق جەدەل جاردەم بەكەتى باس دارىگەرىنىڭ ورىنباسارى داستان پانا قىزى.

وسى ءۇيدىڭ ءليفتىسىن باقىلاۋعا العان كومپانيا باسشىلارى وزدەرىنە شاڭ جۋىتپايدى. جەدەلساتىنى جاقىندا عانا جاڭارتقاندارىن ايتىپ وتىر.

كەنەن جاڭابەكوۆ، «جاڭابەك سەرۆيس» پيك ءتوراعاسى:

– ليفت ءۇزىلىپ كەتكەن جوق. بىلتىر عانا جاڭادان ورناتتىق. ال وسىدان 5 كۇن بۇرىن سىمدارىن اۋىستىرعانبىز. ءبىر جۇما جاقسى جۇمىس ىستەپ تۇردى. بۇزىلعان دا جوق.

ءقازىر ىشكى ىستەر دەپارتامەنتىنىڭ قىزمەتكەرلەرى قايعىلى وقيعاعا قاتىستى تەرگەۋ جۇرگىزۋدە. ولار كىنالىلىردى انىقتايتىن بولادى.

ەربولات سارقۇلوۆ، اقتوبە وبلىستىق ءىىد باسپا ءسوز قىزمەتىنىڭ جەتەكشىسى:

– قازىرگى تاڭدا ق ر قك 278 بابى 2 بولىگى بويىنشا ساپاسىز قۇرىلىس كەسىرىنەن ادام ولىمىنە اكەلىپ سوقتىرۋ دەرەگى بويىنشا قىلمىستىق ءىس قوزعالدى جانە بىرنەشە ساراپتاما تاعايىندالدى.

– قايعىلى وقيعادان كەيىن ءليفتىنى ماماندار مايىستىرىپ اشقان. ءقازىر ەسىگى وپىرايىپ اشىق تۇر. قاۋىپسىزدىك ءۇشىن تەك قانا مىنا سارى لەنتادان وزگە ەشقانداي قورشاۋ قويىلماپتى.

قازا تاپقان ايزات ءابدىسامات جەرگىلىكتى تەلەارنادا جۇمىس ىستەيدى. تاڭعى جانە بالالار باعدارلاماسىن جۇرگىزەدى ەكەن. ءقازىر بالا كۇتىمىنە بايلانىستى دەمالىستا ۇيىندە وتىرعان.