كەشە پرەزيدەنت جارلىعىمەن دارحان كالەتايەۆ ءدىن ىستەرى جانە ازاماتتىق قوعام ءمينيسترى بولىپ تاعايىندالدى. بۇدان بۇرىن پرەزيدەنت اكىمشىلىگى باسشىسىنىڭ ورىنباسارى، «نۇر وتان» پارتياسى ءتوراعاسىنىڭ ءبىرىنشى ورىنباسارى، «سامۇرىق-قازىنا» ۇلتتىق ءال-اۋقات قورىنىڭ باسقارۋشى ديرەكتورى قىزمەتتەرىن اتقارعان. بۇعان دەيىن پرەزيدەنتىنىڭ جارلىعىمەن پارلامەنت سەناتىنىڭ دەپۋتاتى بولىپ تاعايىندالعان بولاتىن.

دارحان كالەتايەۆ – ىشكى ساياساتتا وتە تاجىريبەلى تۇلعالاردىڭ ءبىرى. ول جاستار ساياساتىن وزگەرتۋگە باستاماشى بولعانداردىڭ ءبىرى سانالادى. بۇرىنعى مادەنيەت جانە قوعامدىق كەلىسىم مينيسترلىگى جاستار ساياساتى دەپارتامەنتىنىڭ ديرەكتورى بولعان كەزىندە-اق دارحان امان ۇلى «مەملەكەتتىك جاستار ساياساتى تۋرالى» زاڭ جوباسىن دايىنداۋعا ۇلكەن ۇلەسىن قوسقان بولاتىن. ونىڭ قاتىسۋىمەن ەلىمىزدە ءبىرقاتار جاستار ۇيىمى پايدا بولىپ، بەلسەندى جاستارعا ءوز مۇمكىندىكتەرىن كورسەتۋگە جاعداي جاسالدى. سونىمەن قاتار ول ساياسي پارتيالارمەن، مەملەكەتتىك ەمەس ۇيىمدارمەن، ءتۇرلى بىرلەستىكتەرمەن ءوزارا ديالوگ ورناتۋعا ۇيىتقى بولا ءبىلدى. پرەزيدەنت تاڭداۋىنىڭ دارحان كالەتايەۆقا ءتۇسۋى ونىڭ ساياسي كوممۋنيكاتيۆتىگىنەن بولسا كەرەك. كالەتايەۆ ءارقاشان ىشكى ساياساتتاعى كوممۋنيكاتور ستاتۋسىن ساقتاي بىلەدى، «سامۇرىق-قازىنا» سياقتى ەكونوميكا ماسەلەسىمەن اينالىساتىن قۇرىلىمدا مەنەدجەرلىك جۇمىسىمەن قاتار الەۋمەتتىك كوممۋنيكاتور ءرولىن اتقارا ءبىلدى. كالەتايەۆتىڭ زاڭ شىعارۋشى بيلىكتەن اتقارۋشى بيلىككە ءوتۋى سەناتتى السىرەتتى دەۋگە دە بولاتىن شىعار، سەبەبى ول دەپۋتات بولىپ تۇرعان كەزىندە ءوزىن ادەتىنشە وتە اشىق ۇستاپ، گازەت بەتتەرىندە، «Qazaqstan» ارناسىندا بولاتىن «1ء-شى ستۋديا» سياقتى ساياسي توك-شوۋلاردا وپپوزياسيا وكىلدەرىمەن اشىق پىكىر الماسىپ، قىزىقتى ويلارىمەن كورىنەتىن. مىسالى «جەر داۋى» كەزىندە «1ء-شى ستۋديا» ساياسي-توك شوۋىندا كالەتايەۆتىڭ: «قازاق ۇلتى جەردى ەكونوميكالىق كاتەگوريا دەپ ەمەس، رۋحاني قۇندىلىق رەتىندە تۇسىنەدى»، - دەگەن ءسوزى قوعام بەلسەندىلەرىنىڭ كوڭىلىنەن شىققان بولاتىن.

جالپى قازىرگى كەزدە ەكى تىلدە ءوز ويىن ەركىن جەتكىزە الاتىن دەپۋتاتتار مەن مينيستىرلەر نەكەن-ساياق، دارحان امان ۇلى ەكى بيلىك ورتاسىندا ءجۇرىپ كوممۋنيكاتيۆتىك قاسيەتتەرىن ودان ءارى دامىتىپ، ەلدەگى جاعدايدى ودان بەتەر تەرەڭ تۇسىنە باستادى، ال بۇل تاجىريبە جاڭا قىزمەتتە وتە پايدالى بولماق. ويتكەنى كالەتايەۆتىڭ مينيستر رەتىندە مەملەكەت پەن ءدىن اراسىنداعى قاتىناستى رەتتەۋدەگى العاشقى قادامى ءدىن تۋرالى جاڭا زاڭ جوباسىنىڭ پارلامەنت قابىرعاسىنا وتۋىندە بولماق.

نۇرعالي نۇرتاي