«جاس وتان» جاستار قاناتىنىڭ IV سەزىنىڭ ءبىرىنشى كۇنى وتكەن «رۋحاني جاڭعىرۋ» سەسسياسى جالعاسادى. ەستەرىڭىزگە سالامىز، 28-29 ناۋرىز كۇندەرى استانا قالاسىندا «نۇر وتان» پارتياسى «جاس وتان» جاستار قاناتىنىڭ كەزەكتى IV سەزى ءوتتى. «جاڭا الەمگە جول سالامىز» دەگەن ۇرانمەن وتكەن سەزگە ەلىمىزدىڭ ءار وڭىرىنەن كەلگەن 600 دەلەگات جانە 900-دەن استام قوناق قاتىستى. ءىس-شارانىڭ العاشقى كۇنى «Jas Otan conf» دەگەن اتاۋمەن كونفەرەنسيا فورماتىندا ۇيىمداستىرىلدى. وندا قاتىسۋشىلار عىلىم، ءبىلىم، يننوۆاسيا، كاسىپكەرلىكتى دامىتۋ، سيفرلاندىرۋ جانە سالاۋاتتى ۇلت قالىپتاستىرۋ ىسىنە قاتىستى وزەكتى ماسەلەلەر مەن ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى باسىم باعىتتاردى جۇزەگە اسىرۋ بارىسىن كەڭىنەن تالقىلادى. سەسسيا اياسىندا جاسوتاندىقتار قازىرگى جاعدايدى زەردەلەپ، كۇرمەۋى قيىن ماسەلەلەردىڭ مانىنە نازار اۋدارىپ، ولاردى شەشۋ جولدارىن ۇسىندى.

بۇگىن ق ر ۇلتتىق مۋزەيىندە جاستاردىڭ جازۋشى، قوعام قايراتكەرى مىرزاگەلدى كەمەلمەن كەزدەسۋى «رۋحاني جاڭعىرۋ» سەسسياسىنىڭ جالعاسى رەتىندە ءوتتى. ول رۋحانيات سالاسىندا 10 كىتاپ شىعارعان. ولاردىڭ ىشىندە ىزگىلىككە، يماندىلىققا، بىلىم-بىلىككە، اقىل-پاراساتقا ۇندەيتىن تانىمدىق-كوسەمسوزدىك ەڭبەكتەرىنە قوسا، «ابزالدىق الىپپەسى»، «وزىمە ساباق» سياقتى كىتاپتارى وقىرمان قاۋىمنان جوعارى باعاعا يە بولعان.

مىرزاگەلدى كەمەل، جازۋشى، قوعام قايراتكەرى جاستارعا ايتقان سوزىندە:

«ەلباسىنىڭ «رۋحاني جاڭعىرۋ» باعدارلامالىق ماقالاسىنىڭ شىققانىنا 1 جىل بولدى. رۋحاني جاڭعىرۋ – ءبزدىڭ وزگەرۋمىز، سانامىزدىڭ وزگەرۋى، مادەنيەتىمىزدىڭ ارتۋى، ومىرگە، جاڭا زامانعا بەيىمدەلۋىمىز، پراگماتيكالىق كوزقاراستىڭ پايدا بولۋى. جاستارعا بەرەر كەڭەسىم – كىتاپ وقۋ. ءقازىر ينتەرنەتتىڭ دامۋىمەن كىتاپتىڭ ءتۇر-تۇرىن تابۋعا بولادى. كەرەگىن تاڭداپ وقۋ كەرەك. ينتەرنەتتى مەڭگەرىڭدەر، سەبەبى، الداعى 20 جىلدا ءبىلىمسىز جاستارعا جۇمىس بولمايدى. «جاس وتاننىڭ» باستاماسى – جاستارمەن كەزدەسىپ، ءوز ويىممەن بولىسۋگە، اقىل-كەڭەسىمدى بەرۋگە ارنالعان پايدالى الاڭ».

كەزدەسۋگە سەزد سپيكەرلەرىنىڭ ءبىرى جاس ارحەولوگ، قازاقستاندىق وقۋ ورىندارىندا العاش PhD دارەجەسىن العان عالىمداردىڭ ءبىرى ايبار قاسەنالين، ق ر ۇلتتىق مۋزەيىنىڭ عىلىمي قىزمەتكەرلەرى جانە ەلوردالىق جوعارى وقۋ ورىندارىنىڭ ستۋدەنتتەرى قاتىستى. سونداي-اق، كەزدەسۋ قوناقتارى ءۇشىن قازاقستان تاريحى مەن قازاق ۇلتىنىڭ مادەني-تاريحي قۇندىلىقتارىن كورسەتەتىن ارنايى ەكسكۋرسيا ۇيىمداستىرىلدى. سەبەبى، ءوز ەلىنىڭ باي تاريحى مەن مادەنيەتىن جەتىك بىلگەن ادام عانا، بولاشاققا نىق سەنىممەن قادام باسىپ، الەمدەگى سوڭعى وزگەرىستەرگە ىلەسە الادى.

ايبار كاسەنالين، ارحەولوگ-عالىم:

«بۇگىن جاستار رۋحاني ازىق بولاتىن تۇششىمدى اڭگىمە عانا تىڭداعان جوق. كەش سوڭىندا قازاقستان رەسپۋبليكاسىنىڭ ۇلتتىق مۋزەيىنىڭ تاريحي جادىگەرلەرىمەن تانىسىپ، قازاق ەلىنىڭ باي تاريحىنا ساپار شەكتى. ارحەولوگ رەتىندە وسكەلەڭ ۇرپاقتىڭ ءوز ەلىنىڭ تاريحى مەن مادەنيەتىمەن تانىس بولۋى وتە ماڭىزدى دەپ ەسەپتەيمىن. وتكەنىن بىلمەگەن ەل، بولاشاققا نىق قادام باسا الماسى انىق. بارلىق جاستاردى مۋزەيگە شاقىرامىن».