قازۇۋ-دا «رۋحاني جاڭعىرۋ» باعدارلاماسىن جۇزەگە اسىرۋ شەڭبەرىندە «U 38» ۋنيۆەرسيتەتتەر اليانسى ولكەتانۋشى-ەتنوگرافتار كلۋبىنىڭ باستاماسىمەن «الماتى قالاسى جايلى 100 قىزىقتى دەرەك» اتتى بىرەگەي جوبا باستاۋ الدى.

«U 38» ۋنيۆەرسيتەتتەر اليانسى ولكەتانۋشى-ەتنوگرافتار كلۋبىنىڭ جەتەكشىسى، ءال-فارابي اتىنداعى قازۇۋ-دىڭ تاريح، ارحەولوگيا جانە ەتنولوگيا فاكۋلتەتىنىڭ دەكانى مەڭدىگۇل نوعايبايەۆانىڭ ايتۋىنشا، تۋعان ولكەنى زەرتتەۋ سالاسىنداعى ماڭىزدى الەۋمەتتىك تاجىريبەگە جاستاردى تارتۋ بۇل باستامانىڭ نەگىزگى ماقساتى. ول ءوز سوزىندە: «قۇرامىندا تاريحشى عالىمدار – ارحەولوگيا، ولكەتانۋ جانە ەتنوگرافيا سالالارىنىڭ ماماندارى بار ءبىزدىڭ جوباعا بۇگىننىڭ وزىندە بىرنەشە مىڭ الماتىلىق وقۋشىلار مەن ستۋدەنتتەر تارتىلعان»، - دەپ اتاپ ءوتتى. «جاستار ءۇشىن بۇل «وقۋلىق شەكاراسىنان» شىنايى ومىرگە شىعۋعا ءارى ەمپيريكالىق جولمەن، تاريحي-ولكەتانۋ جانە ەتنوگرافيكالىق ىزدەۋلەر ارقىلى تاريحقا ءارى قالا مادەنيەتىنە «جاناسۋعا» مۇمكىندىك بەرەدى. مۇنداي ۇلگى جاستاردىڭ جاسامپاز تاجىريبەسىن بايىتادى سونىمەن بىرگە تۋعان ولكەنىڭ تاريحي مۇراسىن قۇنتتاۋعا ءارى قىزىعۋشىلىقتارىن دامىتۋعا  سەپتىگىن تيگىزەدى».

«الماتى – بۇل مىڭجىلدىق تاريحى بار قايتالانباس قالا. بۇل جەر ارحيتەكتۋرانىڭ جانە مادەنيەتتىڭ بىرەگەي ەسكەرتكىشتەرىنە تولى جانە كونە ءارى قىزىقتى جەرلەر شوعىرلانعان. قالا شەتەلدىك جانە وتاندىق ساياحاتشىلاردىڭ تۋريزم ورتالىعى بولىپ تابىلادى ءارى مۇنداي جوبا الماتىنىڭ جاڭا قىرىن اشادى»، - دەيدى قازاق سپورت جانە تۋريزم اكادەمياسىنىڭ دوسەنتى، ەكسكۋرسوۆود و.گ. ليۋتەروۆيچ.

قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ دوسەنتى ءاليا يسايەۆا ءوز بايانداماسىندا ستۋدەنت-ەرىكتىلەر توبىنىڭ ەتنوگرافيكالىق سيپاتتاعى ساۋالنامانى جۇرگىزۋ جۇمىستارى تۋرالى جانە ولاردىڭ الماتىنىڭ ارحەولوگيالىق جانە تاريحي كارتاسىن جاساۋعا قاتىسۋى جايلى ايتىپ ءوتتى.

م. بازاربايەۆ اتىنداعى №138 گيمنازيانىڭ 11 سىنىپ وقۋشىسى دىنمۇحامەد ءالياسقاروۆ الماتى قالاسىندا پايدا بولعان كوشە، عيمارات اتاۋلارىنىڭ تاريحى تۋرالى جانە اتاقتى تۇرعىندار جايلى جاڭا ماعلۇماتتارمەن ءبولىستى. وقۋشى ايتقانداي، مۇنداي زەرتتەۋلەر سۇيىسپەنشىلىكتى، قۇرمەت سەزىمىن، پاتريوتتىقتى وياتادى ءارى جارقىن بولاشاققا دەگەن سەنىمدىلىكتى نىعايتادى. 

باستاۋ العان جوبا قاتىسۋشىلارى قوعامدى ءاردايىم زەرتتەۋ بارىسىمەن تانىستىرىپ وتىرۋدى جوسپارلاۋدا. جاس ولكەتانۋشىلار وزدەرىنىڭ اسەرلەرىمەن جانە جاڭالىقتارىمەن الەۋمەتتىك جەلىلەردە، سونىڭ ىشىندە ينتەراكتيۆتى رەجيمدە جانە باسىلىم بەتتەرىندە بولىسەتىن بولادى

جوبا قورىتىندىسى نەگىزىندە «الماتى قالاسى جايلى 100 قىزىقتى دەرەك»  جيناعى جارىققا شىقپاق، سونىمەن بىرگە وڭتۇستىك استانانىڭ جانە ونىڭ ماڭايىنداعى ارحەولوگيالىق جانە تاريحي ەسكەرتكىشتەردىڭ كارتاسى جاسالادى.