قازاقستان رەسپۋبليكاسىنىڭ ءدىن ىستەرى جانە ازاماتتىق قوعام مينيسترلىگى ەلىمىزدىڭ بارلىق وڭىرلەرىندە مەملەكەتتىك الەۋمەتتىك تاپسىرىستى جۇزەگە اسىرۋ ۇردىسىنە قوعامدىق باقىلاۋ جۇرگىزەدى، دەپ جازادى Qamshy.kz اقپارات اگەنتتىگى ق ر ءدىن ىستەرى جانە ازاماتتىق قوعام مينيسترلىگىنە سىلتەمە جاساي وتىرىپ.

اتالعان جۇمىستاردى جۇزەگە اسىرۋعا «دەسەنتا» قوعامدىق قورى، «قازاقستان جاستارىنىڭ كونگرەسى» زاڭدى تۇلعالار بىرلەستىگى، «زۋبر» كونسالتينگ- ورتالىعى سياقتى قوعامدىق ۇيىمدار قاتىساتىن بولادى.

قوعامدىق مونيتورينگ شەڭبەرىندە مەملەكەتتىك الەۋمەتتىك تاپسىرىس نەگىزىندە (الەۋمەتتىك زەرتتەۋلەر، فوكۋس-توپتار، جۇرتشىلىقپەن جاسالعان ساۋالنامالار) قىزمەت كورسەتۋ ساپاسى تۋرالى اقپاراتتى جيناۋ جانە تالداۋ جۇمىستارىن وتكىزۋ جوسپارلانۋدا.

ق ر ءدىن ىستەرى جانە ازاماتتىق قوعام مينيسترلىگىنىڭ ازاماتتىق قوعام ىستەرى كوميتەتىنىڭ مالىمەتىنشە، مەملەكەتتىك الەۋمەتتىك تاپسىرىستىڭ مونيتورينگى - قىزمەتتەردىڭ ساپاسىن جۇيەلى جاقسارتۋ جانە مەملەكەتتىك الەۋمەتتىك تاپسىرىستىڭ ءتيىمدى قۇرالى بولىپ تابىلادى. ول مەملەكەتتىك الەۋمەتتىك تاپسىرىس اياسىندا قىزمەت كورسەتۋلەرگە جۇگىنەتىن حالىقتىڭ، ەڭ الدىمەن، ازاماتتاردىڭ الەۋمەتتىك جوبالارىن جۇزەگە اسىرۋعا باعا بەرەدى.  

جوبا قورىتىندىسى  بويىنشا الەۋمەتتىك ماڭىزى بار جوبالاردى ءتيىمدى ىسكە اسىرۋدى قامتاماسىز ەتۋگە باعىتتالعان جەدەل شارالار قابىلداۋ ءۇشىن ۇسىنىستار ازىرلەنەتىن بولادى.

«كوممەرسيالىق ەمەس ۇيىمداردىڭ قىزمەتى تۋرالى قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ شەڭبەرىندە الەۋمەتتىك جوبانىڭ تيىمدىلىگىن جانە حالىقتىڭ قىزمەت ساپاسىنا قاناعاتتانۋ دارەجەسىن انىقتايتىن مەملەكەتتىك تاپسىرىستىڭ ناتيجەلەرىن باعالاۋدى ەنگىزۋ جوسپارلانىپ وتىر.

2018 جىلى ەلىمىز بويىنشا 2 066 الەۋمەتتىك جوبانى جۇزەگە اسىرۋ جوسپارلانعان.  ولاردىڭ ىشىندە 40 جوبا رەسپۋبليكالىق دەڭگەيدە،  2026 جوبا وڭىرلىك دەڭگەيدە ىسكە اسىرىلاتىن بولادى.