وسىدان 17 جىل بۇرىن «تۇرانالەمبانكى» ينكاسساتورلارىنا قارۋلى شابۋىل جاسالدى. قاراقشىلار 17،5 ميلليون تەڭگە مەن 196 مىڭ اقش دوللارىن ولجالادى. بۇل سول كەزدە ادامنىڭ ءوڭى تۇگىلى تۇسىنە دە كىرمەيتىن سۇمدىق اقشا بولاتىن. ءبىر قىزىعى، باندالىق توپ قولعا تۇسكەنىمەن سول اقشانىڭ ءبىر بولىگىن ءبارىبىر قايتارعان جوق. قوماقتى قارجى الاتاۋدىڭ قاي جەرىندە تىعۋلى جاتقانى دا ءالى كۇنگە دەيىن بەلگىسىز.

تالتۇستەگى اتىس

الماتىنىڭ قىلمىستىق وقيعالار تاريحىندا بۇعان دەيىن ءدال مۇنشاما سوماداعى قارجى توناۋ دەرەگى تىركەلمەگەن. ءارى قاراقشىلىق شابۋىلدىڭ قاراڭعىدا ەمەس، كۇندىز جاسالۋى جۇرتتىڭ جاعاسىن ۇستاتتى.

2001 جىلدىڭ 18ء-ىنشى مامىرى. تاڭەرتەڭگى ساعات 8-دەن 10 مينۋت كەتكەن كەز. تۇرانالەم بانكىنىڭ ورتالىق كەڭسەسىنەن  شىققان ينكاسساتور كولىگى 7 مينۋتتان سوڭ فۋرمانوۆ كوشەسىندەگى (گوگول كوشەسىنەن ءسال تومەن) اركاعا قاراي بۇرىلعان. ءبىراق تاياق تاستام جەردەن وتە المادى. ويتكەنى ولاردىڭ جولىن كولىك بوگەگەن. اككى قاراقشىلار ادەيى تار وتكەلگە وسىلاي قاقپان قۇرىپتى. كولىكتەن تۇسكەن قاراقشىلار بىردەن وق جاۋدىرادى. اتىس كەزىندە ينكاسساتورلاردىڭ ەكەۋى اۋىر جارالانىپ، ءبىرى وقيعا ورنىندا كوز جۇمدى.  

بىرەر ميۋتتان سوڭ وقيعا ورنىندا بۇرشاقتاي جاۋعان وقتان شۇرق-تەسىك بولعان ينكاسساتور كولىگى مەن گاز اپاتىنان قۇتقارۋ قىزمەتىنىڭ «گازەل» كولىگى عانا قالدى. ال قاراقشىلار ءىز سۋىتقان «Grand Cherokee»  اۆتوكولىگى 10 مينۋت وتكەن سوڭ بوگەنباي باتىر كوشەسىندە وتقا ورانىپ جاتقان جەرىنەن تابىلدى. قولدى بولعان قارجىنىڭ جالپى سوماسى – 17 ميلليون 665 مىڭ تەڭگە جانە 196 مىڭ اقش دوللارى.

الماتى قالالىق ىىب-مەن ۇقك-نىڭ بىرلەسىپ جۇرگىزگەن شۇعىل ىزدەستىرۋ شاراسى ناتيجە بەرگەن جوق. قاتىگەز قاراقشىلار الماتى كوشەلەرىنە سۋداي ءسىڭىپ جوعالدى. الايدا بۇل سىرت كوزگە عانا سولاي كورىنەتىن. كانىگى ءىز كەسۋشىلەر وقيعا ورنىنا كەلگەندە-اق العاشقى دايەكتەردىڭ سىناماسىن الا باستاعان. سونىڭ ەڭ باستىسى، ورتەنگەن كولىكتىڭ ىشىنەن تابىلعان قان داقتارى. بۇل – قىلمىسكەرلەردىڭ ءبىرى جارالانعان بولۋى مۇمكىن دەگەن بولجامدى كۇشەيتتى. بۇدان وزگە دە ءبىرقاتار دەرەكتەر انىقتالدى. ماسەلەن قىلمىسكەرلەر قاجەتىنە جاراتقان «گازەل» مەن «Grand Cherokee» اۆتوكولىكتەرىنىڭ شىنايى يەلەرى بەلگىلى بولدى. ونىڭ ءبىرىن قىلمىسكەرلەر يەسىنەن ءبىر اي بۇرىن تارتىپ السا، ەكىنشىسىن قىلمىس بولاردان ەكى كۇن بۇرىن قوجايىنىمەن قوسا ۇرلاپ اكەتكەن.

الايدا تەرگەۋ-تەكسەرۋ ىسىنە زالالىن تيگىزبەس ءۇشىن مۇنداي مالىمەتتەردىڭ ەشبىرى بۇقارالىق اقپارات قۇرالدارىندا جاريالانبادى. اقپاراتتىڭ قۇپيا ساقتالۋى قىلمىسكەرلەردىڭ تايراڭداي تۇرۋىنا، وزدەرىن ەمىن-ەركىن سەزىنۋىنە سەپتىگىن تيگىزدى.

ماسەلەن قاراقشىلار ۇستالمايتىندارىنا سەنىپ، وزدەرىن ەركىن سەزىنگەندەرى سونشالىق، اتىس كەزىندە جارالانىپ، سول كۇنى اجال قۇشقان سەرىكتەرىن كەڭساي زيراتىنا جاسىرىن جەرلەگەن. دەرەك كوزدەرىنەن وسى اقپاردى الىسىمەن جەدەل ۋاكىلدەر ءمايىتتى قازىپ الىپ، ساراپتاماعا جونەلتتى. ىلە-شالا ونىڭ كونستانتين كورنيەنكو ەكەنى ءمالىم بولدى. قاندى-كويلەك سەرىكتەرىنىڭ موينىنا گالستۋك تاعىپ، كوستيۋم-شالبارمەن جەرلەگەن قاراقشىلاردىڭ كىمدەر ەكەنى بۇل كەزدە انىقتالىپ بولعان. ءبىراق ولاردى ۇستاۋعا ىڭعايلى جەر رەتىندە حالقى كوپ قالا ەمەس، ولىلەر مەكەنى – كەڭساي تاڭدالدى. قىلمىسكەرلەر كوپ كۇتتىرگەن جوق. دوستارىنىڭ جەتىسىندە بەيىت باسىنا توبىمەن كەلىپ، تورعا توپ ەتە ءتۇستى.

 «سۋكي» دەپ ايعايلادى دا، وق اتتى...»

مودان مۋحليسوۆتىڭ باندالىق  توبىن نەلىكتەن پوليسەيلەر قىلمىس الەمىندەگى ەڭ اككى توپتاردىڭ ءبىرى رەتىندە اتايدى؟ ولار شىنىمەن دە اسا ايلاكەر بولسا، قۇرىقتان نەگە قۇتىلىپ كەتە المادى؟ بۇل ساۋالعا جاۋاپ بەرۋ ءۇشىن باندالىق توپتىڭ مۇشەلەرىمەن تانىستىرا كەتكەندى ورىندى ساناپ وتىرمىز: ەدۋارد داۆلەتباكييەۆ 1976 جىلى وزبەكستاندا تۋعان. بۇرىن زاڭسىز قارۋ ساقتاعانى ءۇشىن ءىستى بولعان. كاسىبي كيكبوكسشى. يۋريي پوليكارپوۆ 1969 جىلى تۋعان. بۇرىن سوتتالماعان. مودان مۋحليسوۆ 1961 جىلى تۋعان. قارۋلى شابۋىل جاساعانى ءۇشىن رەسەيدە 6 جىلعا سوتتالىپ، جازاسىن وتەگەن. قاراقشىلىق توپتىڭ كوسەمى. بۇدان بولەك، اتىس كەزىندە كوز جۇمعان كونستانتين كورنيەنكو جانە  ۆ.ياكۋنين مەن ب.مۇقتاروۆ بار. العاشقىسى، نەگىزىنەن اۆتوكولىك ۇرلىعىمەن اينالىسقان. قارۋلى شابۋىلدان بىرنەشە اي بۇرىن تاجىكستاندا اۆتوكولىكتەردى گەروينگە ايىرباستاۋ بارىسىندا اجال قۇشقان. ءبىراق ول قانداي دا ءبىر قاستاندىقتان ەمەس، گەرويندى اسا كوپ مولشەردە تۇتىنۋدان كوز جۇمعانعا ۇقسايدى. ال ب.مۇقتاروۆتى ەلىمىزدەگى اسا بەدەلدى ءبىر ادامنىڭ ۇلى دەيتىندەر بار. ءبىراق ونىڭ ناقتى كىمنىڭ بالاسى ەكەنى تەرگەۋ دەرەكتەرىندە كورسەتىلمەگەن. وسى ۋاقىتقا دەيىن قۇپيا ساقتالعانىنا قاراعاندا، مۇقتاروۆ شىنىمەن دە ءىرى ءبىر دوكەيدىڭ ۇلى بولعان سەكىلدى.

ەندى قاندى وقيعاعا قايتا ورالايىق. «دايىندالىڭدار! ءبىر، ەكى ءۇش، باستاڭدار!». راسيا ارقىلى مودان مۋحليسوۆ سەرىكتەرىنە بۇيرىقتى ءدال وسىلاي بەرگەن. بۇل كەزدە اركانىڭ ارعى بەتىندە، تروتۋاردا تۇرعان «گازەل» ارتقا شەگىنىپ، ينكاسساتور كولىگىنىڭ جولىن بوگەيدى. كەيىن شەگىنبەك بولعاندا، ەكىنشى كولىك ارتىنان تۇمسىق تىرەي توقتاعان. گازەلدە پوليكارپوۆ پەن داۆلەتباكييەۆ، ال دجيپ كولىگىندە مۋحليسوۆ پەن كورنيەنكو بولعان. قاراقشىلاردىڭ جوسپارى بويىنشا ولار قىلمىس ورنىنان ادام شىعىنىنسىز كەتۋى ءتيىس ەدى. ويتكەنى توناۋ مەن كىسى ولتىرۋگە تاعايىندالار جازانىڭ ايىرماسىن ولار وتە جاقسى بىلگەن. سونداي-اق، مۋحليسوۆ سىزىپ بەرگەن جوسپاردا وزدەرىنىڭ قاۋىپسىزدىگى ەرەكشە ناقتىلانعان. مىسالى ينكاسساتور كولىگى ورتادا قالعاننان كەيىن بۇلار دەرەۋ كولىكتەرىنەن ءتۇسىپ، اركانىڭ ءتورت بۇرىشىنان قارۋ كەزەنۋى ءتيىس بولعان. «قولدارىڭدى كوتەرىپ، كولىكتەن تۇسىڭدەر!» دەگەن بۇيرىقتى ينكاسساتورلار ورىندايدى دەپ سەنگەن. سەبەبى سول كەزدە تۇرانالەمبانكىندەگى جالعىز برونسىز كولىك وسى ەدى. الايدا وقيعا مۇلدە بۇلار كۇتپەگەن جاعدايدا ءوربىدى. بىرىنشىدەن، ينكاسساتورلار قاراقشىلارعا قاسقايىپ قارسى تۇرا ءبىلدى. ەكىنشىدەن، قىلمىسكەرلەردىڭ ءبىرى قاۋىپسىزدىك شاراسىن ەستەن شىعارىپ العان.

• جاستىعى شىعار، كورنيەنكو ورتاق ەرەجەنى ساقتامادى. ءبىز قۇساپ الىستا تۇرۋى كەرەك ەدى. ول بىردەن ينكاسساتور كولىگىنىڭ جۇرگىزۋشى جاق ەسىگىنە جۇگىرىپ بارىپ، قارۋ كەزەندى دە، كولىكتەن ءتۇسۋدى تالاپ ەتتى. وسى كەزدە ىشتەن «سۋكي» دەپ ايعايلاعان داۋىس ەستىلدى دە، وق اتىلدى. كورنيەنكو قۇلاپ ءتۇستى، – دەيدى پوليكارپوۆ تەرگەۋ دەرەكتەرىندە ساقتالعان تۇسىنىكتەمەسىندە.

وسىدان كەيىن ەكى جاقتان دا وق اتىلعان. ينكاسساتورلار ءتىپتى كولىكتەن ءتۇسىپ ۇلگەرمەگەن. يۋريي سيۆاكوۆ وقيعا ورنىندا قازا تاپسا، اندرەي تىسكيي مەن قايرات مۇقانعالييەۆ اۋىر جارالانعان. ال قىلمىستىق توپتىڭ كورنيەنكودان وزگە مۇشەلەرى قانقۇيلى اتىستان ءدىن امان كەتتى. مۇنىڭ دا وزىندىك سەبەبى بار بولاتىن. قاراقشىلىق شابۋىلدى ءبىر مينۋتتا جۇزەگە اسىرعان باندالىق توپ بۇل وپەراسياعا 40 كۇن بويى دايىندالعان. تاۋدا ءجۇرىپ قارۋدان كوزدەپ اتۋعا ماشىقتانعان. يەسىنەن وزدەرى تارتىپ اكەتكەن «گازەلدىڭ» مەملەكەتتىك ءنومىرىن ايىرباستاپ، گاز اپاتىنان قۇتقارۋ قىزمەتىنىڭ بەلگىلەرىن جاپسىرعان. ارتقى بولىگىنە وققاعار قالقان جاساۋ ءۇشىن قالىڭ تەمىردى تاستاق بازارىنان ارنايى بارىپ، ساتىپ العان. «گازەلدەگى» پوليكارپوۆ پەن داۆلەتباكييەۆتىڭ جانىن الىپ قالعان دا وسى تەمىر. بۇل تەمىر كولىكتىڭ ارتقى ەسىگىنىڭ ىشىندە ورنالاسقان. ال قاراقشىلار جوعارىداعى الاقانداي تەرەزەدەن وق اتقان. ارينە، ينكاسساتورلار مۇنى بىلگەن جوق. ولاردىڭ جاندارمەن اتقان وقتارى قالىڭ تەمىرگە «قادالىپ» جاتتى.

ايتىلماي جۇرگەن دەرەكتەر

قاپ-قاپ اقشانى بوكتەرە قاشقان قىلمىسكەرلەر «Grand Cherokee» كولىگىن بوگەنباي باتىر كوشەسىندە جارىپ جىبەرەدى دە، سول جەرگە الدىن الا ازىرلەپ قويعان كەلەسى كولىكپەن ءىز سۋىتادى. قاندى قىلمىسقا ەرەكشە ەڭبەك سىڭىرگەن ەكى ادام بار. ونىڭ ءبىرى داۆلەتباكييەۆ بولسا، ەكىنشىسى، مۇقتاروۆ. مۇقتاروۆ اۆتوكولىكتىڭ جالعان نومىرلەرى مەن جالعان قۇجاتتار جاساۋمەن اينالىسقان. ماسەلەن ينكاسساتورلاردى كۇتكەندە كۇدىك تۋدىرماس ءۇشىن «Grand Cherokee» كولىگىنە پروكۋراتۋرانىڭ ءنومىرىن ازىرلەگەن. توپ مۇشەلەرىنىڭ ءارقايسىسىندا سالىق كوميتەتىنىڭ، پوليسيانىڭ ءتىپتى ۇقك-نىڭ جالعان كۋالىكتەرى بولعان. ونىڭ ءبارىن وسى مۇقتاروۆ جاساعان. ال داۆلەتباكييەۆتىڭ نەگىزگى ماماندىعى – بايلانىسشى. ول بايلانىس قۇرالدارىنىڭ ءتىلىن جەتىك بىلگەن. سونىڭ ارقاسىندا باندالىق توپ پوليسيانىڭ راسيا تولقىنىن «ۇستاي» العان. ياعني، پوليسيانىڭ نە ىستەپ، نە قويىپ جاتقانىنان ۇنەمى حاباردار بولىپ وتىرعان.

دەگەنمەن ك.كورنيەنكو سول كۇنى-اق ءولىپ كەتكەن ەدى. مۋحليسوۆ سەرىكتەرىنە تاپسىرما بەرىپ، بازاردان جاسىل ءتۇستى كىلەم الدىرادى. سوسىن ولگەن سەرىكتەرىن جۋىپ-شايىپ، جاقسىلاپ كيىندىرەدى دە، كىلەمگە وراپ، ءتۇندى كۇتەدى. ءتۇن ورتاسىندا الماتىداعى مىقتىلار «جاتاتىن» زيرات – كەڭسايعا بەتتەيدى.

قىلمىستىق توپ نەگە كورنيەنكونى مۇسىلماندار زيراتىنا جەرلەدى؟  اتىشۋلى ءىستى قاراعان الماتى قالالىق سوتىنىڭ بۇرىنعى سۋدياسى ادايبەك بەيىمبەتوۆ بىلاي دەيدى: «بۇل توپ سان ءتۇرلى ۇلت وكىلدەرىنەن قۇرالعان. ماسەلەن، مۋحليسوۆ – ۇيعىر بولسا، پوليكارپوۆ – ورىس، كورنيەنكو دەگەن بار، ول – ۋكراين، داۆلەتباكييەۆ  – تاتار، مۇقتاروۆ – قازاق. سوعان قاراماستان، ءبارى ءبىر دىندە بولدى، مۇسىلمان دىنىندە. مەن مۇنىڭ سىرىن مۋحليسوۆپەن بايلانىستى-اۋ دەپ شامالايمىن. ويتكەنى قىلمىسكەرلەر ءوز كوسەمدەرىن ەرەكشە قۇرمەت تۇتقان. وعان قۇدايىنداي تابىنباسا دا، سوعان جەتەقابىل باعالاعان. ونى ەڭ ءادىل ادام دەپ سەنگەن».

كورنيەنكونى تاق ءبىر تويعا اپاراتىنداي گالستۋك تاعىپ، جاسىل كىلەمگە وراپ، كەڭسايعا جەرلەۋى جانە جەتىسىندە سەرىكتەرىن تۇگەل ەرتىپ الىپ، قۇران وقۋعا بارۋى مۋحليسوۆتىڭ سول «ادىلدىگىنەن» سىر اڭداتسا كەرەك. وسى جولداردىڭ اۆتورى اتىشۋلى ىسكە ماتەريال ىزدەپ، بىرنەشە اداممەن سويلەسكەن ەدى. ولاردىڭ اراسىندا وتستاۆكاداعى پوليسيا قىزمەتكەرلەرى دە، اتىشۋلى ىسكە قاتىسقان ادوكاتتار دا بار. اڭگىمە اراسىندا ايتىلعان، ءبىراق رەسمي مالىمەت رەتىندە كەلتىرۋگە جارامايتىن ءبىرقاتار قىزىقتى دەرەكتەر دە جيناقتالدى. سونىڭ ءبىرى مىناۋ: الماتىداعى جوو-لاردىڭ ءبىرى ستۋدەنتتەردى شارىن شاتقالىنا اپارۋ ءۇشىن شاعىن اۆتوبۋس ىزدەپ، جارناما بەرەدى. بۇل جارنامانى كورگەن كولىگى بار ادامدار قىزمەت كورسەتۋگە دايىن ەكەنىن ءبىلدىرىپ، تەلەفوندارىن جىبەرگەن. مىنە، قاندى قىلمىسقا پايدالانىلعان «گازەلدى» قاراقشىلار وسىلاي تاپقان. وزدەرىن جوو-نىڭ وكىلى رەتىندە تانىستىرعاندار كولىگىن كورۋ ءۇشىن «گازەل» يەسىن كەزدەسۋگە شاقىرعان. سوسىن وعان: «سەنىڭ كولىگىڭدى مەملەكەتتىڭ قاجەتتىلىگى ءۇشىن ۋاقىتشا پايدالانامىز» دەيدى دە، قولىن كىسەندەپ،  گاراجعا قاماپ كەتەدى. وزدەرى قۇقىق قورعاۋ قىزمەتىنىڭ كيىم ۇلگىسىندە بولعان. ينكاسساتورلارعا شابۋىلداپ، ولجالى ورالعان ءتۇنى مۇنىڭ باسىنا قاپ كيگىزىپ، قالانىڭ سىرتىنا الىپ شىعادى دا: «ءبىز كەتكەن سوڭ 5 مينۋتتان كەيىن قاپتى شەش تە، جونىڭە كەتە بەر» دەيدى. مىنە، وسى ادامنىڭ كەيىن تەرگەۋشىمەن اڭگىمەسىندە مىناداي سوزدەر ايتىلسا كەرەك.

• ءسىز كولىگىڭىزدى الىپ كەتكەن كىسىلەردىڭ پوليسيا قىزمەتكەرلەرى ەمەس ەكەنىن ءبىلدىڭىز بە؟
• ارينە، ءبىلدىم.
• قالاي ءبىلدىڭىز؟
• ەندى ولار مەنى ۇرىپ-سوققان جوق قوي، ءتىپتى بوعاۋىز ءسوز دە ايتقان جوق.

200 مىڭ دوللار الاتاۋدىڭ قاي جەرىندە تىعۋلى جاتىر؟

تاعى ءبىر قىزىقتى دەرەكتى بىزگە اتىن اتاماۋدى وتىنگەن پوليسيا پولكوۆنيگى ايتتى. ونىڭ سوزىنشە، مۋحليسوۆتىڭ باندالىق توبى بۇعان دەيىن دە كوپتەگەن قارۋلى شابۋىلدار جاساعان. ءبىراق كىسى ولتىرمەگەن. الماتى ءىىد كۇدىكتى رەتىندە وسى توپتى دا باقىلاۋعا العان. الايدا بىردەن ۇستاۋعا جەتكىلىكتى دالەل بولماعان. ال سوڭدارىنان اڭدۋ تۇسكەنىن بىلگەن مۋحليسوۆ ءىىد باسشىلارىنىڭ بىرىنە تەلەفون شالىپ، «بالا-شاعاڭنان ايرىلعىڭ كەلىپ ءجۇر مە؟!» دەپ قوقان-لوقى كورسەتىپ، قورقىتقان كورىنەدى. بۇل بولسا، «سەنەن كەلگەن بالەنى كورىپ الدىم، جەر استىنا ءتۇسىپ كەتسەڭ دە، مەن سەنى تۇرمەگە تىعامىن» دەسە كەرەك. ەگەر پولكوۆنيكتىڭ وسى ءسوزى راس بولسا، داندايسىعان مۋحليسوۆپەن اناداي تاجىكەگە بارعان ادام بۇرىنعى الماتى ءىىد باسشىسى قۇرمانبەك ارتىقبايەۆ (بۇل كىسى كەيىن قورعاس ءىسى بويىنشا سوتتالىپ كەتتى – رەد)،  نە سول كەزدەگى ۇيىمداسقان قىلمىسقا قارسى كۇرەس ءبولىمىنىڭ باسشىسى ولەگ ماحروۆ بولۋى بەك مۇمكىن. «ءقازىر ونداي مىقتى ماماندار جوق قوي. شىنىن ايتقاندا، بۇل – اسا جوعارى دەڭگەيدە ۇيىمداسقان قىلمىستىق توپ پەن وعان قارسى كۇرەسەتىن پوليسيا قىزمەتكەرلەرىنىڭ ناعىز ايقاسى ەدى» دەپ ەسكە الادى الگى پولكوۆنيك.

وقيعاعا قايتا ورالايىق، مۋحليسوۆ باستاپقىداعى تۇسىنىگىندە ينكاسساتورلارعا تيەسىلى «پپ-90» تاپانشا-اۆتوماتىن الما-اراسان شاتقالىنا لاقتىردىم دەگەن ەدى. ول قارۋ ءبىراق شاتقالدان ەمەس، قاراقشى توپتىڭ قۇپيا قويماسىنان تابىلدى. قىلمىسكەرلەردىڭ جيعان قارۋ جاراعى تالايدى كورگەن تەرگەۋشىلەردىڭ ءوزىن ەستەن تاندىرعانداي: 3 «كالاشنيكوۆ» اۆتوماتى، 3 «تت» تاپانشاسى، 1 دىبىس شىعارمايتىن قوندىرعىسى بار «پسم» تاپانشاسى، «مۋحا» گراناتا اتقىشى، 7 رگد-5 گراناتاسى، 16-كاليبرلى 1 شولاق مىلتىق، «سايگا» مىلتىعى جانە كوپتەگەن وق-دارىلەر مەن بايلانىس قۇرالدارى، جالعان قۇجاتتار مەن قۇقىق قورعاۋ جانە سالىق پوليسياسىنىڭ كيىم فورمالارى تاركىلەندى. 

سوت ۇكىم كەستى. ەدۋارد داۆلەتباكييەۆتى 16 جىلعا، يۋريي پوليكارپوۆتى 18 جىلعا، ال مودان مۋحليسوۆتى 24 جىلعا باس بوستاندىعىنان ايىردى.

ەڭ قىزىعى، قارۋلى شابۋىل كەزىندە قولدى بولعان قوماقتى اقشانىڭ ءبىر بولىگى سول كۇيى تابىلماي كەتتى. ونىڭ قانشا ەكەنىن تۋرالى ناقتى دەرەك جوق. دەگەنمەن مۇراعاتتا ساقتالعان جەدەل ءتۇسىرىلىم كەزىندەگى بەينەماتەريالدارعا زەر سالساڭىز، تەرگەۋشىلەردىڭ ۇستەلدىڭ بەتىنە جايىپ قويىپ، ۋىس-ۋىس اقشا ساناپ وتىرعانىن بايقايسىز. دەمەك كەمىندە تونالعان قاراجاتتىڭ جارتىسى قايتقان بولۋى مۇمكىن. ودان كوپ بولۋى دا عاجاپ ەمەس. ال قايتارىلماعان اقشا قايدا كەتتى؟ بىزگە ءبىر ادۆوكات مىنانى ايتتى: «200 مىڭ دوللار اقشانى مۋحليسوۆ الاتاۋدىڭ ءبىر جەرىنە جاسىرعان. ونىڭ قاي جەردە ەكەنىن باسقا تۇگىلى، قاسىنداعى پوليكارپوۆ تا بىلمەيدى. تەك ءوزى بىلەدى. تىققان جەرىنىڭ كارتاسىن دا جاساعان. وسى كارتا تەرگەۋشىلەردىڭ قولىنا ءتۇستى. ونى تەرگەۋشىلەر الپينيستەرگە كورسەتىپ، كومەك سۇراعان. الايدا الپينيستەر جاردەم جاساي المادى. «بۇل تەك باعدار عانا، مۇنداي كارتامەن تاۋدا تىعىلعان دۇنيەنى تابۋ مۇمكىن ەمەس» دەدى ولار».

وسىنى ايتقان ادۆوكاتتىڭ سوزىنە قاراعاندا، پوليسيا وكىلدەرى جوعالعان اقشانى قايتارۋ ءۇشىن كوپتەگەن ايلا-شارعىعا بارىپ، مۋحليسوۆپەن كەلىسسوز جۇرگىزۋگە كۇش سالىپتى. ءبىراق ەشقايسىسى ناتيجە بەرمەگەن.

• اۋرە بولماڭدار، ول اقشا مەن تۇرمەدەن شىققانشا تاۋدا جاتادى، – دەپتى مۋحليسوۆ.

سانسىزباي نۇربابا