اقتوبە قالاسىنىڭ تۇرعىندارى تۇرعىن ۇيلەردەگى ليفتتەردىڭ جاعدايى مۇشكىل ەكەنىن جەتكىزدى. 12 ىقشام اۋدانىنىڭ تۇرعىنى 1993 جىلى سالىنعان ءۇيدىڭ ليفتىنە ءبىر دە ءبىر رەت جوندەۋ جۇمىستارى جۇرگىزىلمەگەنىن ايتتى.

«ىنتىماق» پاتەر يەلەرىنىڭ كووپەراتيۆى «ليفتكە جاۋاپ بەرمەيمىز» دەپ تونىن الا قاشادى، ناتيجەسىندە زارداپ شەگەتىن – تۇرعىندار: بەسىك اربا ۇستاعان انالار، قارت كىسىلەر ت.ب.»، - دەپ اشىندى تۇرعىنداردىڭ ءبىرى.

ولار ليفتكە جاۋاپ بەرەتىن ءبىر ادامنىڭ بولعانىن تالاپ ەتىپ وتىر. سەبەبى ءليفتتىڭ ەڭ بولماعاندا ەكى اي ىستەپ تۇرۋى ءۇشىن تۇرعىندار ءوز قالتالارىنان اقشا شىعارىپ، جوندەۋ جۇمىستارىنا كىرىسىپ كەتەدى. الايدا ولاردىڭ قاۋىپسىزدىگىنە جاۋاپ بەرەتىن ەشكىم جوق. تەلەجۇرگىزۋشى قىزدىڭ جاعدايى ءبىزدىڭ دە باسىمىزدان قايتالانا ما دەپ ءار كۇنى ۇرەيلەنىپ وتىرادى.

«ليفتتە قامالىپ قالعان كەزدەرىمىز كوپ بولعان. بالالار قاتتى قورقادى، كوبىنە باسپالداقپەن شىعادى. ءبىراق مەكتەپتەن قايتقاندا اۋىر سومكەلەرىمەن ليفتكە مىنۋگە تۋرا كەلەدى»، - دەيدى تۇرعىندار.

ايتا كەتەيىك، ءساۋىردىڭ باسىندا تەلەجۇرگىزۋشى ايزات ءابدىسامات ليفتكە كىرىپ بارا جاتقاندا، ءليفتتىڭ ەسىگى جابىلىپ، ءجۇرىپ كەتكەن. ناتيجەسىندە جۋرناليست ەسىككە قىستىرىلىپ، وقيعا ورنىندا مەرت بولدى.