قاراعاندىلىق جاس ونەرتاپقىش تىرەك-قيمىل مۇشەلەرى جاراقاتتانعان  ادامدار ءۇشىن ەكزوسكەلەت قۇرىلعىسىن جاسادى.

ينتەرن-حيرۋرگ ۆياچەسلاۆ ليتۆينوۆ «تمد-عا 100 يدەيا» حالىقارالىق كورمەسىنە قاتىسادى، وندا ول تىرەك-قيمىل مۇشەلەرىنە زاقىم كەلگەن  ادامدارعا  جانە ءوز ەركىمەن قوزعالۋ مۇمكىندىگىن جوعالتقان ادامدار ءۇشىن ەكزوسكەلەتتەردى قالپىنا كەلتىرۋدىڭ ءپورتاتيۆتى ۇلگىلەرىن جاساۋ جانە ىسكە اسىرۋعا باعىتتالعان جوباسىن ۇسىنادى.

ليتۆينوۆ قاراعاندى مەملەكەتتىك مەديسينا ۋنيۆەرسيتەتىنىڭ 6-شى كۋرس ستۋدەنتى جانە ول بايقاۋعا قازاقستاننىڭ اتىنان شىعاتىن  جالعىز ونەرتاپقىش ەمەس.

قازاقستان دەلەگاسياسىنىڭ قۇرامىندا سەرپىندى جانە يننوۆاسيالىق يدەيالارى بار 10 ادام بار. ولار قازاقستان رەسپۋبليكاسى ءدىن ىستەرى جانە ازاماتتىق قوعام مينيسترلىگى جانە «بولاشاق» قاۋىمداستىعى ۇيىمداستىرعان «جاستار وتانعا» يننوۆاسيالىق يدەيالارى مەن جوبالارى فەستيۆالىنىڭ قورىتىندىسى بويىنشا ۇزدىك جۇمىستاردىڭ اۆتورلارى بولىپ تابىلادى.

اتالعان اۋقىمدى كورمە 2018 جىلعى 11-13 ءساۋىر ارالىعىندا مينسك قالاسىندا (بەلارۋس رەسپۋبليكاسى) وتەدى. ءىس-شارا تمد-عا قاتىسۋشى مەملەكەتتەردىڭ جاستارىن ەلدەرىنىڭ ەكونوميكالارى مەن ۇزاق مەرزىمدى يننوۆاسيالىق دامۋ ماسەلەلەرىن شەشۋگە، عىلىمي، يننوۆاسيالىق جانە الەۋمەتتىك-ەكونوميكالىق سالالاردى دامىتۋعا ۇلەستەرىن قوستىرۋ ماقساتىندا ۇيىمداستىرىپ وتىر.  

قازاقستاننىڭ اتىنان قاتىسۋشىلار «مەنىڭ ەلىم دوستاستىقتا»، «قاۋىپسىزدىك»، «الەۋمەتتىك سالا»، «جاندى جۇيەلەر»، «نانوسيستەمالار ونەركاسىبى»، «IT-سالاسى»، «اۆياسيا جانە عارىش جانە كولىك جۇيەلەرى»،  «مەديسينا جانە دەنساۋلىق ساقتاۋ» نوميناسيالارى بويىنشا وزدەرىنىڭ دايىنداعان جوبالارىنىڭ ءتۇپنۇسقالارىن كورسەتەتىن بولادى.