مەملەكەت باسشىسى «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆتى قابىلدادى، دەپ حابارلايدى اقوردانىڭ باسپا ءسوز قىزمەتىنە سىلتەمە جاساپ.
كەزدەسۋدە قازاقستان پرەزيدەنتىنە پارتيانىڭ قازىرگى قىزمەتى جونىندە مالىمەت بەرىلىپ، «جاس وتان» جاستار قاناتىنىڭ IV سەزىنىڭ قورىتىندىسى تۋرالى باياندالدى.
ەلباسى مەملەكەتتىك ساياساتتى ىسكە اسىرۋ ۇدەرىسىندە پارتيانىڭ جاستار قاناتى ماڭىزدى ميسسيا اتقاراتىنىن ايتتى.
– «جاس وتان» جاستار قاناتىنىڭ سەزى تابىستى ءوتتى. مەنىڭ تاپسىرماما سايكەس، جاستار اراسىندا ساياسي جۇمىس جۇرگىزىلۋگە ءتيىس. «جاس وتاننىڭ» ماقساتى – قازاقستان جاستارىنىڭ بارلىعىن بىرىكتىرۋ، – دەدى نۇرسۇلتان نازاربايەۆ.
كەزدەسۋ بارىسىندا ماۋلەن اشىمبايەۆ سەزدىڭ قورىتىندىسى بويىنشا قول جەتكىزىلگەن ناتيجەلەرگە توقتالدى.
– ءىV سەزگە بارلىق وبلىستار مەن وڭىرلەردەن 1500-دەن استام دەلەگات قاتىستى. فورۋمنىڭ ءبىرىنشى كۇنى پارتيانىڭ كونفەرەنسياسى جانە ارنايى بەس پانەلدى سەسسيا ءوتتى، – دەدى «نۇر وتان» پارتياسى ءتوراعاسىنىڭ ءبىرىنشى ورىنباسارى.
بۇدان بولەك، م.اشىمبايەۆ نۇرسۇلتان نازاربايەۆقا ستراتەگيالىق مەملەكەتتىك جانە سالالىق باعدارلامالاردى، سونىڭ ىشىندە «رۋحاني جاڭعىرۋ» جانە «سيفرلىق قازاقستان» باعدارلامالارىن جۇزەگە اسىرۋ ۇدەرىسىنە پارتيانىڭ اتسالىسۋى تۋرالى باياندادى.
سونداي-اق، «نۇر وتان» پارتياسى ءتوراعاسىنىڭ ءبىرىنشى ورىنباسارى مەملەكەت باسشىسىنا پارتيانىڭ كادرلىق رەزەرۆىن قالىپتاستىرۋ بارىسى جونىندە مالىمدەدى.
كەزدەسۋ سوڭىندا نۇرسۇلتان نازاربايەۆ پارتيانىڭ ءتۇرلى باعىتتاعى جۇمىسىن جانداندىرۋ ءۇشىن ءبىرقاتار ناقتى تاپسىرما بەردى.
